ଲକ୍ଷ୍ନୌ,୨୨।୧୨ : ଉତ୍ତରପ୍ରଦେଶ ମହୋବାର ପାନୱାଡିରେ ଅବସ୍ଥିତ ଜୁନିଅର ହାଇସ୍କୁଲ ୧୫ ଜଣ ଛାତ୍ରୀଛାତ୍ର୍ର ଅଚେତ ହେବା ପ୍ରସଙ୍ଗରେ ଏକ ନୂଆ ମୋଡ଼ ଆସିଛି। ଅଭିଭାବକମାନେ ନିଜ ପିଲାମାନଙ୍କୁ ସୁସ୍ଥ କରିବା ପାଇଁ ତନ୍ତ୍ର-ମନ୍ତ୍ର କରୁଥିବା ଚର୍ଚ୍ଚା ହେଉଛି। ଏବେ ତାନ୍ତ୍ରିକଙ୍କ ଦ୍ୱାରା ଛାତ୍ରୀଛାତ୍ରଙ୍କ ଚିକିତ୍ସା କରାଯାଉଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ତାନ୍ତ୍ରିକ ପିଲାମାନଙ୍କର କେଶ ଧରି ଝାଡ଼ଫୁଙ୍କ କରୁଥିବାର ଦେଖାଯାଉଛି। କିଛି ଗ୍ରାମବାସୀ ସ୍କୁଲରେ ଭୂତପ୍ରେତର ପ୍ରକୋପ ଥିବା ନେଇ ଗୁଜବ ସୃଷ୍ଟି କରୁଛନ୍ତି।
ଡିସେମ୍ବର ୧୮ ରେ, ଛାତ୍ରୀଛାତ୍ର୍ରମାନେ ହଠାତ ଚେତାଶୂନ୍ୟ ହୋଇ ପଡ଼ିଥିଲେ। ଶୀଘ୍ର ଶିକ୍ଷକମାନେ ପିତାମାତାଙ୍କୁ ଡାକି ସେମାନଙ୍କୁ ଘରକୁ ପଠାଇଥିଲେ। ପିତାମାତାମାନେ ମଧ୍ୟ ସେମାନଙ୍କର ପିଲାମାନଙ୍କୁ ଡାକ୍ତରଙ୍କ ଦ୍ୱାରା ଚିକିତ୍ସା କରିଥିଲେ। କିନ୍ତୁ ସେମାନେ ଆରୋଗ୍ୟ ହୋଇପାରି ନ ଥିଲେ। ସେମାନେ ବର୍ତ୍ତମାନ ତନ୍ତ୍ର-ମନ୍ତ୍ରର ସାହାରା ନେଇଛନ୍ତି।
ଏହି ପ୍ରସଙ୍ଗରେ ଜିଲା ଚିକିତ୍ସା ଅଧିକାରୀ କହିଛନ୍ତି ଯେ ଖାଦ୍ୟ ଓ ପାନୀୟ ଯୋଗୁଁ ପିଲାମାନେ ଅସୁସ୍ଥ ହୋଇନାହାଁନ୍ତି, କିନ୍ତୁ ଗାଁରେ ସୃଷ୍ଟି ହୋଇଥିବା ସମସ୍ତ ଗୁଜବ ଯୋଗୁଁ ପିଲାମାନେ ଭୟଭୀତ ହୋଇପଡିଛନ୍ତି। ପରାମର୍ଶ ଦେଇ ସମସ୍ତଙ୍କୁ ମନାଇବା ପାଇଁ ପ୍ରୟାସ କରାଯାଉଛି ଏବଂ ପିଲାମାନଙ୍କୁ ବିଦ୍ୟାଳୟକୁ ପଠାଇବା ପାଇଁ ଏକ ଅନୁରୋଧ କରାଯାଉଛି।
