ନୂଆଦିଲ୍ଲୀ, ୧୮।୮: ଭାରତୀୟ ସୀମିତ ଓଭର କ୍ରିକେଟ୍ ଦଳର ଦୁର୍ଦ୍ଦର୍ଷ ଓପନର୍ ରୋହିତ୍ ଶର୍ମାଙ୍କ ନାମ ଦେଶର ସର୍ବୋଚ୍ଚ କ୍ରୀଡ଼ା ସମ୍ମାନ ‘ରାଜୀବ ଗାନ୍ଧୀ ଖେଳରତ୍ନ’ ପୁରସ୍କାର ପାଇଁ ସୁପାରିସ କରାଯାଇଛି। ରୋହିତ୍ଙ୍କ ବ୍ୟତୀତ ଏସିଆନ ଗେମ୍ସ ସ୍ବର୍ଣ୍ଣ ବିଜୟିନୀ ରେସ୍ଲର ଭିନେଶ ଫୋଗତ୍, ଟେବୁଲ ଟେନିସ ଚାମ୍ପିୟନ ମନିକା ବାତ୍ରା ଓ ପାରା ଅଲିମ୍ପିକ ସ୍ବର୍ଣ୍ଣ ପଦକ ବିଜେତା ମାରିୟାପ୍ପାନ ଥଙ୍ଗାଭେଲୁଙ୍କ ନାମ ମଧ୍ୟ ଖେଳରତ୍ନ ପୁରସ୍କାର ପାଇଁ କେନ୍ଦ୍ର ସରକାରଙ୍କୁ ସୁପାରିସ କରାଯାଇଛି। ଜାତୀୟ କ୍ରୀଡ଼ା ପୁରସ୍କାର ଚୟନ କମିଟିର ବୈଠକ ମଙ୍ଗଳବାର ବସିଥିଲା। ପୂର୍ବତନ କ୍ରିକେଟର୍ ବୀରେନ୍ଦ୍ର ସେହ୍ବାଗ୍, ହକି ଖେଳାଳି ସର୍ଦ୍ଦାର ସିଂ ପ୍ରମୁଖ ଏହି ଚୟନ କମିଟିର ସଦସ୍ୟ ରହିଛନ୍ତି। ବୈଠକ ପରେ ଏହି ୪ ଜଣ ଖେଳାଳିଙ୍କ ନାମ କ୍ରୀଡ଼ା ସମ୍ମାନ ପାଇଁ କେନ୍ଦ୍ରକୁ ସୁପାରିସ କରାଯାଇଛି।
ପରଠାରୁ ପ୍ରଥମ ଥର ଲାଗି ୪ ଜଣ ଖେଳାଳିଙ୍କ ନାମ ଏହି ସମ୍ମାନଜନକ ପୁରସ୍କାର ଲାଗି ସୁପାରିସ କରାଯାଇଛି। ୨୦୧୬ରେ ରିଓ ଅଲିମ୍ପିକ ରୌପ୍ୟ ପଦକ ବିଜୟିନୀ ପି.ଭି. ସିନ୍ଧୁ, ଜିମ୍ନାଷ୍ଟ ଦୀପା କର୍ମାକର, ରେସଲର ସାକ୍ଷୀ ମଲିକ ଓ ଶୁଟର୍ ଜିତୁ ରାଇଙ୍କୁ ମିଳିଥ ଭାବେ ଏହି ପୁରସ୍କାର ମିଳିଥିଲା। ଅପରପକ୍ଷରେ ୪ର୍ଥ ଭାରତୀୟ କ୍ରିକେଟର୍ ଭାବେ ରୋହିତ୍ ଖେଳରତ୍ନ ପୁରସ୍କାର ପାଇବାର ସମ୍ଭାବନା ସୃଷ୍ଟି ହୋଇଛି। ଏଥିପୂର୍ବରୁ ବ୍ୟାଟିଂ ଲିଜେଣ୍ଡ ସଚିନ ତେନ୍ଦୁଲକର, ମହେନ୍ଦ୍ର ସିଂ ଧୋନୀ ଓ ବିରାଟ କୋହଲି ଏହି ସମ୍ମାନଜନକ ପୁରସ୍କାର ଲାଭ କରିସାରିଛନ୍ତି।
