ବରଗଡ଼,୨୪।୬(ପ୍ରେମାନନ୍ଦ ଖମାରୀ):ମୁଖ୍ୟମନ୍ତ୍ରୀ ସଡ଼କ ଯୋଜନାରେ ବିଭିନ୍ନ ରାସ୍ତାର ଉନ୍ନତିକରଣ ପାଇଁ ରାଜ୍ୟ ସରକାର କୋଟିକୋଟି ଟଙ୍କା ଅନୁଦାନ ଦେଉଛନ୍ତି। ଏହି ଯୋଜନାରେ ରାସ୍ତାଘାଟ ମଧ୍ୟ ନିର୍ମିତ ହେଉଛି। ମାତ୍ର ନିୟମିତ ବହୁସଂଖ୍ୟକ ବାଲି, ମାଟି ବୋଝେଇ ଗାଡ଼ି ଗୁଡ଼ିକ ରାସ୍ତାରେ ଚଳାଚଳ କରୁଥିବାରୁ ମୁଖ୍ୟମନ୍ତ୍ରୀ ସଡ଼କ ଯୋଜନାରେ ନିର୍ମିତ ରାସ୍ତା ମଧ୍ୟ କ୍ଷତିଗ୍ରସ୍ତ ହେବାରେ ଲାଗିଛି। ବରଗଡ଼ ବ୍ଲକ ଅନ୍ତର୍ଗତ ଲାଉନସରା ଗ୍ରାମରେ ଚାଲିଥିବା ରାସ୍ତା ଉନ୍ନତିକରଣରେ ବର୍ତ୍ତମାନ ଏଭଳି ସମସ୍ୟା ଉପୁଜିଛି।
ମୁଖ୍ୟମନ୍ତ୍ରୀ ସଡ଼କ ଯୋଜନାରେ ଉକ୍ତ ରାସ୍ତାର ଉନ୍ନତିକରଣ ଚାଲିଛି। ରାସ୍ତା ଉନ୍ନତିକରଣ କାର୍ଯ୍ୟ ସରି ନାହିଁ। ଅନ୍ୟପଟେ ଏହି ରାସ୍ତା ଦେଇ ସ୍ଥାନୀୟ ଜୀରାନଦୀରୁ ପ୍ରତିଦିନ ବହୁସଂଖ୍ୟାରେ ବାଲି ବୋଝେଇ ହାଇୱା ଗାଡ଼ି ଗୁଡ଼ିକ ଚଳାଚଳ କରୁଛି। ଫଳରେ ମୁଖ୍ୟମନ୍ତ୍ରୀ ସଡ଼କ ଯୋଜନାରେ ନିର୍ମାଣାଧୀନ ଏହି ରାସ୍ତାର ଉନ୍ନତିକରଣ କାର୍ଯ୍ୟ ନ ସରୁଣୁ ରାସ୍ତାଟି ପୂର୍ବାପେକ୍ଷା ଆହୁରି ଶୋଚନୀୟ ହୋଇ ପଡୁଛି। ଏହାକୁ ନେଇ ଅଞ୍ଚଳରେ ଅସନ୍ତୋଷ ତେଜିବାରେ ଲାଗିଛି। ଅନ୍ୟପଟେ ଏହି ଗାଡ଼ି ଗୁଡ଼ିକ ପ୍ରତି ପୋଲିସ କିମ୍ବା ମାଇନ୍ସ ବିଭାଗ କୌଣସି ପଦକ୍ଷେପ ନ ନେବା ସମସ୍ତଙ୍କୁ ଚକିତ କରି ପକାଇଛି।
ଏଠାରେ ଉଲ୍ଲେଖନୀୟ, ଲାଉନସରା ଗ୍ରାମର ଜନସଂଖ୍ୟା ୩ହଜାର ଟପିବ। ଗ୍ରାମଟି କୃଷି ବହୁଳ ଅଟେ। ବରଗଡ଼ ବ୍ଲକର ଶେଷସୀମା ତଥା ଜୀରାନଦୀ ମୁହାଣରେ ଏହି ଗ୍ରାମ ରହିଛି। ତେବେ ଉକ୍ତ ଗ୍ରାମ ଦେଇ ରାସ୍ତାଟି ତୁମଗାଁ, ତୁରୁଙ୍ଗା, କୁମ୍ଭାରୀ ଆଦି ଗ୍ରାମକୁ ସଂଯୋଗ କରୁଛି। ଏହି ରାସ୍ତାଟି ମୁଖ୍ୟମନ୍ତ୍ରୀ ସଡ଼କ ଯୋଜନାରେ ଅନ୍ତର୍ଭୁକ୍ତ ହୋଇ ଉନ୍ନତିକରଣ କାର୍ଯ୍ୟ ଚାଲିଥିବା ଯୋଗୁ ଅଞ୍ଚଳବାସୀ ଖୁସି ହୋଇଛନ୍ତି। ମାତ୍ର ବାଲି ବୋଝେଇ ହାଇୱା ଗାଡ଼ି ଆରମ୍ଭରୁ ରାସ୍ତାକୁ କ୍ଷତିଗ୍ରସ୍ତ କରି ଦେଉଥିବାରୁ ଅସନ୍ତୋଷ ତେଜିବାରେ ଲାଗିଛି।
Dharitri – Odisha’s No.1 Odia Daily
