ଲାଞ୍ଜିଗଡ,୬ା୭(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ସହର ଲାଞ୍ଜିଗଡ ଥାନା ପଛପଟ ତଥା ରାଜସ୍ବ ନିରୀକ୍ଷକ କାର୍ଯ୍ୟାଳୟ ନିକଟସ୍ଥ ରାସ୍ତା ମରଣଜନ୍ତା ପାଲଟିଛି । ପୋଖରୀ ନିକଟସ୍ଥ ମୁନିଗୁଡାକୁ ସଂଯୋଗ କରୁଥିବା ରାସ୍ତା ଉପରେ କୃତ୍ରିମ ପୋଖରୀ ସୃଷ୍ଟି ହୋଇଛି ।
ଏହି ରାସ୍ତାଟି ଦୀର୍ଘ ୫ ବର୍ଷ ପୂର୍ବେ ନିର୍ମାଣ ହୋଇଥିଲା ଏବଂ ବର୍ତ୍ତମାନ ତାହା ଖାଲ ଖମାରେ ଭର୍ତ୍ତି ହୋଇଯାଇଥିବା ବେଳେ ଖାଲଗୁଡିକରେ ପାଣି ଭର୍ତ୍ତି ହୋଇରହୁଛି । ଏହି ରାସ୍ତାଦେଇ ଛାତ୍ରୀଛାତ୍ର ସ୍କୁଲ କଲେଜ ଯାଉଥିବା ବେଳେ ଲଘୁଚାପ ଜନିତ ଲଗାଣ ବର୍ଷାଯୋଗୁଁ ପାଣି ଜମି ରହୁଛି । ଫଳରେ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଭାରୀଯାନ ଗୁଡିକ ଯାଇ ରାସ୍ତାର ଅବସ୍ଥା ଏଭଳି ପରିସ୍ଥିତି ହେଉଥିବା ସ୍ଥାନୀୟ ଲୋକେ କହିଛନ୍ତି । ରଥଯାତ୍ରା ସମୟରେ ମୁଖ୍ୟ ରାସ୍ତା ଉପରେ ୯ ଦିନ ରଥ ରହି ରାସ୍ତା ବନ୍ଦ ରହୁଥିବା ବେଳେ ୯ ଦିନ ପର୍ଯ୍ୟନ୍ତ ସମସ୍ତ ଯାନ ବାହାନ ସମେତ ସ୍କୁଲ ବସ ମଧ୍ୟ ଏହି ରାସ୍ତାଦେଇ ଯିବା ଆସିବା କରିଥାନ୍ତି ।
ଅନେକ ଥର ରଥଯାତ୍ରା ସମୟରେ ବର୍ଷା ଯୋଗୁଁ ଏହି ରାସ୍ତାରେ ଅନ୍ୟ ଗାଡିଗୁଡିକୁ ରାସ୍ତା ଦେଉଥିବା ବେଳେ ସ୍କୁଲ ବସ ଓ ଭାରୀଯାନ ରାସ୍ତାରେ ଫସିଯିବା ନଜିର ଆସିଛି । ଲାଞ୍ଜିଗଡ ପଞ୍ଚାୟତ ତରଫରୁ ଏହି କାମ କରିବା କଥା କିନ୍ତୁ ପଞ୍ଚାୟତର ଅଧିକାରୀମାନଙ୍କର କାହାରି ନଜର ପଡୁନଥିବା ଅଭିଯୋଗ ହୋଇଛି ।
ଆସନ୍ତା ୧୬ ତାରିଖରେ ରଥଯାତ୍ରା ଥିବାବେଳେ ବର୍ତ୍ତମାନ ସୁଦ୍ଧା ଏହି ରାସ୍ତାର ମରାମତି ବ୍ୟବସ୍ଥା ପାଇଁ କାହାରି ନଜର ପଡୁନାହିଁ । ତେଣୁ ତୁରନ୍ତ ଏଥିପ୍ରତି ଦୃଷ୍ଟିଦେଇ ପ୍ରଶାସନ ତରଫରୁ ଶୀଘ୍ର ମରାମତି କରାଯିବା ପାଇଁ ଅଞ୍ଚଳବାସୀ ଦାବି କରିଛନ୍ତି । ଏନେଇ ଲାଞ୍ଜିଗଡ ଗ୍ରାମ ପଞ୍ଚାୟତ ସରପଞ୍ଚ ସରସ୍ବତୀ ମୁଣ୍ଡାଙ୍କୁ ପଚାରିବାରୁ ଏହି ରାସ୍ତାର କାମ ପାଇଁ ପଞ୍ଚାୟତରେ ପାଣ୍ଠି ନାହିଁ ଏବଂ ଯାହାବି ଅଛି ପଞ୍ଚାୟତ କାର୍ଯ୍ୟାଳୟ ଗୃହ ତିଆରି ହେଉଛି । ଏହି ରାସ୍ତା ବିଷୟରେ ଲାଞ୍ଜିଗଡ ବିଡ଼ିଓଙ୍କୁ ମଧ୍ୟ ଜଣାଇଛି । ଏହି ରାସ୍ତାର ମରାମତି କାମ କେତେଦିନ ଭିତରେ ହେବ ଦେଖିବାକୁ ବାକିରହିଲା।
