ଅଭିନେତା ଅନିଲ କପୁରଙ୍କ ସାନ ଝିଅ ପ୍ରଯୋଜିକା ରିଆ କପୁରଙ୍କ ଝୁମ୍କା ଚୋରି ହୋଇଯାଇଛି। ମେଟ ଗାଲା ଇଭେଣ୍ଟ ପାଇଁ ସେ ଭଡ଼ା ନେଇଥିବା ହୀରା ଏବଂ ସୁନା କାନଫୁଲ ଚୋରି ହୋଇଯାଇଛି। ପୋଲିସ ବର୍ତ୍ତମାନ ଘଟଣାର ତଦନ୍ତ କରୁଛି ଏବଂ ମୁମ୍ବାଇର ସହର ପୋଲିସ ଷ୍ଟେଶନରେ ଜଣେ ଅଜ୍ଞାତ ବ୍ୟକ୍ତିଙ୍କ ବିରୋଧରେ ଏକ ଏଫଆଇଆର ରୁଜୁ କରାଯାଇଛି।
ରିଆ ମେଟ ଗାଲା ଇଭେଣ୍ଟ ପାଇଁ ନ୍ୟୁୟର୍କ ଯାତ୍ରା କରିଥିଲେ। କିନ୍ତୁ ପହଞ୍ଚିବା ପରେ ତାଙ୍କୁ ଏକ ବଡ଼ ଝଟକା ଲାଗିଥିଲା। ନ୍ୟୁୟର୍କରେ ଏକ ଫ୍ୟାଶନ ଶୋ’କୁ ଯାଉଥିବା ସମୟରେ ହୀରା ଖଚିତ କାନଫୁଲଗୁଡ଼ିକ ଚୋରି ହୋଇଥିଲା। ଏହାର ମୂଲ୍ୟ ୧.୩୫ କୋଟି ଥିଲା। ରିଆଙ୍କ ମେକଅପ ଆର୍ଟିଷ୍ଟ ସାଭଲିନ ସିଂହଙ୍କ ହ୍ୟାଣ୍ଡବ୍ୟାଗରୁ ଅଳଙ୍କାର ଗାଏବ ହୋଇଯାଇଥିଲା। ବ୍ୟାଗରେ ଦୁଇଟି କାନଫୁଲ ଥିଲା।
ରିଆ ଫ୍ୟାଶନ ଶୋ ପାଇଁ ମୁମ୍ବାଇସ୍ଥିତ ମେହତା ଏବଂ ଗୋଏଙ୍କା ଜୁଏଲର୍ସରୁ ଅଳଙ୍କାର ଭଡ଼ା ନେଇଥିଲେ। ତାଙ୍କୁ ଏପ୍ରିଲ ୨୯, ୨୦୨୬ରେ ହେବାକୁ ଥିବା ମେଟ ଗାଲାକୁ ନିମନ୍ତ୍ରଣ କରାଯାଇଥିଲା ଏବଂ ସେ ତାଙ୍କ ଦଳ ସହିତ ସେଠାକୁ ଯାତ୍ରା କରିଥିଲେ। ହୋଟେଲରେ ଅଳଙ୍କାର ବାକ୍ସ ଖୋଲିବା ସମୟରେ ଉଭୟ ଖାଲି ପଡ଼ିଥିବା ଜଣାପଡିଥିଲା। ମେହତା ଜୁଏଲର୍ସରୁ ଭଡ଼ା ନିଆଯାଇଥିବା ଏମରାଲ୍ଡ ଏବଂ ହୀରା କାନଫୁଲର ମୂଲ୍ୟ ୬୬ ଲକ୍ଷ ଥିଲା। ଗୋଏଙ୍କା ଜୁଏଲର୍ସରୁ ଅଳଙ୍କାରର ମୂଲ୍ୟ ୬୯ ଲକ୍ଷ ଥିଲା। ମୁମ୍ବାଇ ଫେରିବା ପରେ ଏହି ମାମଲା ସମ୍ପର୍କରେ ଏକ ପୋଲିସ ଅଭିଯୋଗ ଦାୟର କରାଯାଇଥିଲା ଏବଂ ବର୍ତ୍ତମାନ ତଦନ୍ତ ଚାଲିଛି। ରିଆ ଜଣେ ପ୍ରଯୋଜିକା ଏବଂ ଫ୍ୟାଶନିଷ୍ଟ ଭାବରେ ନିଜର ପରିଚୟ ସୃଷ୍ଟି କରିଛନ୍ତି।
Dharitri – Odisha’s No.1 Odia Daily
