ବରଗଡ଼,୭।୭(ପ୍ରେମାନନ୍ଦ ଖମାରୀ): ବରଗଡ଼ ସହର ଉପକଣ୍ଠରେ ପ୍ରବାହିତ ଜୀରାନଦୀ ପାର୍ଶ୍ୱରେ ରିଂ ରୋଡ୍ ନିର୍ମାଣ ଚାଲିଛି। ବର୍ଷା ଓ ବନ୍ୟା ସମୟରେ ସହରକୁ ଜଳ ପ୍ଳାବନରୁ ରକ୍ଷା, ଯାତାୟାତ ସୁବିଧା, ନଦୀତଟ ସୌନ୍ଦର୍ଯ୍ୟକରଣ, ସହର ବିକାଶ ଆଦି ଲକ୍ଷ୍ୟ ନେଇ ବିଜେଡ଼ି ଶାସନରୁ ଏହି ପ୍ରକଳ୍ପର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ସେତେବେଳେ ରାଜ୍ୟ ସରକାରଙ୍କ ଜଳସମ୍ପଦ ବିଭାଗ ପତ୍ରସଂଖ୍ୟା ୨୩୭୧୮ ତା ୧୬।୯।୨୦୨୧ରିଖରେ ଏହି ପ୍ରକଳ୍ପକୁ ପ୍ରଶାସନିକ ଅନୁମୋଦନ ଦେଇଥିଲା। ୨୦୨୩ ମସିହାରେ ଏହାର ଟେଣ୍ଡର ହୋଇଥିଲା। ଏହାପରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। କିନ୍ତୁ ଇତି ମଧ୍ୟରେ ରାଜ୍ୟରେ ନୂଆଁ ଭାଜପା ସରକାର ଶାସନର ୨ବର୍ଷ ବିତି ଯାଇଛି। ହେଲେ ପୁରୁଣା ଜୀରାବ୍ରିଜ ନିକଟ ସାଇ ମନ୍ଦିରରୁ ରୁହୁଣିଆଁ ପର୍ଯ୍ୟନ୍ତ ହେଉଥିବା ଏହି ପ୍ରକଳ୍ପ ସମ୍ପୂର୍ଣ୍ଣ ହେବା ତ ଦୂରର କଥା, ନିର୍ମାଣାଧୀନ ରିଂ ରୋଡ୍ର ମାଟିକାମ ବିଭିନ୍ନ ସ୍ଥାନରେ ଥରକୁ ଥର ବର୍ଷାପାଣିରେ ଧୋଇ ଯାଉଛି। ଗତ କିଛିଦିନ ଧରି ହୋଇଥିବା ବର୍ଷାରେ ନିର୍ମାଣାଧୀନ ରିଂ ରୋଡ୍ ଏଭଳି ଅବସ୍ଥାକୁ ଆସି ଯାଇଛି। ଅନ୍ୟପଟେ ଆଗକୁ ଆହୁରି ବର୍ଷା ଓ ନଦୀରେ ବନ୍ୟାର ସମ୍ଭାବନା ରହିଛି। ସେଭଳି ହେଲେ ବାକିଅଂଶ ମଧ୍ୟ ଧୋଇଯିବା ତଥା ରିଂ ରୋଡ୍ର ସ୍ଥାୟିତ୍ୱ ନେଇ ଆଶଙ୍କା ରହିଛି। ଏଭଳି ସ୍ଥିତିରେ ସହରବାସୀଙ୍କ ପାଇଁ ଦୀର୍ଘବର୍ଷର ପ୍ରତୀକ୍ଷା ହୋଇଥିବା ରିଂ ରୋଡ୍ କେବେ ସମ୍ପୂର୍ଣ୍ଣ ହେବ ଏବଂ କେତେ ଦୀର୍ଘସ୍ଥାୟୀ ହେବ, ତାକୁ ନେଇ ଏବେଠାରୁ ସାଧାରଣରେ ନାନା କଳ୍ପନାଜଳ୍ପନା ଆରମ୍ଭ ହୋଇଯାଇଛି।
‘ବିକାଶ ବିକାଶଧାରାରେ ରହୁ’
ଜୀରାନଦୀ ପାର୍ଶ୍ୱରେ ରିଂ ରୋଡ୍ ନିର୍ମାଣ ଏକ ବିକାଶମୂଳକ ପ୍ରକଳ୍ପ। ବିକାଶ ବିକାଶଧାରାରେ ରହିବା ଏବଂ ଆଗାମୀ ୫୦ବର୍ଷକୁ ଦେଖି ଠିକ୍ ନିର୍ମାଣ ହେବା ଦରକାର। କିନ୍ତୁ ରିଂ ରୋଡ୍ ନିର୍ମାଣ ପୂର୍ବରୁ ନଦୀତଟ ତଥା ନଦୀକୂଳର କିଭଳି ସୀମା ନିର୍ଦ୍ଧାରଣ କରାଯାଇଛି, ତାକୁ ନେଇ ପ୍ରଶ୍ନ ଉଙ୍କି ମାରୁଛି। ନଦୀତଟ ତଥା ନଦୀକୂଳରେ ରିଂ ରୋଡ୍ ନିର୍ମାଣ ହେବା ବଦଳରେ ନଦୀ ମଧ୍ୟରେ ତାହା ନିର୍ମାଣ କରାଯାଉଥିବା ପରିଲକ୍ଷିତ ହେଉଛି। ଏଥିରୁ ରିଂ ରୋଡ୍ର ସ୍ଥାୟିତ୍ୱ ନେଇ ଏବେଠାରୁ ସନ୍ଦେହ ଉପୁଜିଲାଣି।
-ପ୍ରେମାନନ୍ଦ ଭୋଇ, ନାଗରିକ, ବରଗଡ଼
‘ନଦୀତଟ ବଦଳରେ ନଦୀଗର୍ଭରେ’
ରିଂ ରୋଡ୍ ନିର୍ମାଣ ହେଲେ ନିଶ୍ଚିତଭାବେ ଲୋକଙ୍କ ସୁବିଧା ହେବ। ତାହା କେବେ ସମ୍ପୂର୍ଣ୍ଣ ହେବ, ତାକୁ ସମସ୍ତେ ଚାହିଁ ବସିଛନ୍ତି। କିନ୍ତୁ ପଦ୍ମ ଘୁଞ୍ଚିଘୁଞ୍ଚି ଯାଉଛି। ବର୍ଷା ହେଲେ ମାଟିକାମ ଧୋଇ ଯାଉଛି ଏବଂ ପୁଣିଥରେ ସେହି କାମ କରାଯାଉଛି। ନଦୀତଟ ବଦଳରେ ନଦୀଗର୍ଭରେ ରିଂ ରୋଡ୍ ନିର୍ମାଣ କରାଯାଉଛି। ଫଳରେ ସେଭଳି ସମସ୍ୟା ଚାଲିଛି। ଷ୍ଟ୍ରଙ୍ଗ କଂକ୍ରିଟ୍ରେ ସାଇଡ୍ ୱାଲ ଦିଆ ନ ଗଲେ ଆଗକୁ ମଧ୍ୟ ସେଭଳି ହୋଇ ଚାଲିଥିବ। ଆଗାମୀ ୩ ଦଶନ୍ଧିକୁ ଲକ୍ଷ୍ୟ ରଖି ନିର୍ମାଣ କାମ କରାଯିବା ଦରକାର।
-କିରଣ କୁମାର ମିଶ୍ର, ଆଡ଼ଭୋକେଟ୍, ବରଗଡ଼
‘ବିଳମ୍ବ ହେଲେ ସରକାରୀ ଅର୍ଥ ଅପଚୟ’
ରିଂ ରୋଡ୍ ନିର୍ମାଣ ହେଲେ ବହୁଲୋକେ ଉପକୃତ ହେବେ। ଯାତାୟାତ, ବ୍ୟବସାୟିକ ଆଦି କ୍ଷେତ୍ରରେ ଲୋକଙ୍କ ସୁବିଧା ହେବ। ରାସ୍ତାଘାଟରେ ଭିଡ଼ ତଥା ଟ୍ରାଫିକ ସମସ୍ୟା ମଧ୍ୟ ହ୍ରାସ ପାଇବ। କିନ୍ତୁ ଦୀର୍ଘବର୍ଷରୁ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲେ ସୁଦ୍ଧା ଏପର୍ଯ୍ୟନ୍ତ ତାହା ସରି ନାହିଁ। ଅପରପକ୍ଷେ ବର୍ଷାରେ ରିଂ ରୋଡ୍ର ମାଟିକାମ ଧୋଇ ଯାଉଛି। ନିର୍ମାଣ କାମକୁ ଯେତେ ବିଳମ୍ବ କିମ୍ବା ଶୀଥିଳ କରାଯିବ, ପ୍ରତବର୍ଷ ପରିସ୍ଥିତି ଉପୁଜିବ। ଅଯଥାରେ ସରକାରୀ ଅର୍ଥ ଅପଚୟ ହେବ।
-ରାମନାରାୟଣ ଭୋଇ, ନାଗରିକ, ଧାଙ୍ଗେର
Dharitri – Odisha’s No.1 Odia Daily
