ଯାଜପୁର ଅଫିସ/ରଗଡ଼ି (ଡି.ଏନ୍.ଏ.),୧୯।୩: ଯାଜପୁର ଜିଲା ବ୍ୟାସନଗର ତହସିଲରେ ମାଟି, ମୋରମ ଚୋରା ଚାଲାଣ ବନ୍ଦ ହେବାର ନାଁ ଧରୁନାହିଁ । ମୋରମ ମାଫିଆମାନେ କେତେଜଣ ରାଜନେତା ଓ ଅସାଧୁ ଅଫିସରଙ୍କୁ ହାତବାରିସି କରି କେଉଁଠି ଦିନ ଦ୍ୱିପ୍ରହରରେ ତ ଅନ୍ୟ କେଉଁଠି ରାତିଅଧିଆ ମାଟି, ମୋରମ ଚାଲାଣ କରୁଛନ୍ତି। ବ୍ୟାସନଗର ତହସିଲ ଅଧୀନ କନ୍ତୋର, ପୂର୍ବକୋଟ, ମଞ୍ଜୁରୀ ମୌଜା ଜମିରୁ ବିପୁଳ ପରିମାଣର ରାଜସ୍ବ ଲୁଟ ହେଉଛି। ଏହାପରେ ମଧ୍ୟ ପ୍ରଶାସନ ପକ୍ଷରୁ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ଏହାର ସୁଯୋଗରେ ମାଫିଆମାନେ ଅଧିକ ସକ୍ରିୟ ହେଉଥିବା ଅଭିଯୋଗ ହୋଇଛି।
ସଂପ୍ରତି ବ୍ୟାସନଗର ତହସିଲ ପଛିକୋଟ ରାଜସ୍ବ ନିରୀକ୍ଷକଙ୍କ ଅଧୀନ ଖମିଗାଁ ମୌଜାରୁ ପୋଖରୀ ଖନନ ନାମରେ ବେଆଇନ ମୋରମ ଚାଲାଣ ହେଉଛି। ମଞ୍ଜୁରୀ ଗ୍ରାମର ଦୁର୍ଯ୍ୟୋଧନ ମଳିକଙ୍କ ପୁଅ ସୁବାସ ମଳିକଙ୍କ ନାମରେ ନିଜର ୨ଟି ଜମି ଖାତା ନଂ. ୨୬୭/୧୯୫, ୨୬୭/୧୯୪, ପ୍ଲଟ ନଂ. ୬୩ ଓ ୬୫ରେ ପୋଖରୀ ଖନନ ନିମନ୍ତେ ବ୍ୟାସନଗର ତହସିଲଦାର ପତ୍ରସଂଖ୍ୟା ୩୭୦/୧୫ା୧ା୨୦୨୧ରେ ଅନୁମତି ପ୍ରଦାନ କରିଥିଲେ। ଉକ୍ତ ପତ୍ରରେ ମାଟିରୁ ତଳକୁ ୫ ଫୁଟ ଖୋଳିବାକୁ ଉଲ୍ଲେଖ ଥିଲା। ହେଲେ ମାଫିଆମାନେ ପ୍ରାୟ ୧୬ ଫୁଟରୁ ଊର୍ଦ୍ଧ୍ୱ ଖନନ କରି ସାରିଲେଣି । ଖନନ ହେଉଥିବା ମାଟି ଓ ମୋରମକୁ ଶିବମ୍ କଣ୍ଡେଭ ପ୍ରାଇଭେଟ ଲିମିଟେଡ୍ ନାମକ ଠିକାସଂସ୍ଥା ନେଇ ଭଦ୍ରକ ମାଳଆନନ୍ଦପୁରଠାରୁ ସିଂହପୁର ପର୍ଯ୍ୟନ୍ତ ରାସ୍ତାର ଉନ୍ନତୀକରଣ ପାଇଁ ବ୍ୟବହାର କରାଯିବ ବୋଲି ଅନୁମତି ପତ୍ରରେ ନିର୍ଦ୍ଦେଶ ରହିଛି। ତେବେ ଏହାକୁ ଉଲ୍ଲଂଘନ କରି ରାତିଅଧିଆ ମାଟି, ମୋରମ ଟ୍ରିପ୍ ପିଛା ୩ରୁ ୪ ହଜାର ଟଙ୍କାରେ ଆଖପାଖ ଅଞ୍ଚଳରେ ବିକ୍ରି କରାଯାଉଥିବା ଦେଖିବାକୁ ମିଳିଛି ।
ସେହିପରି ୨ଟି ପ୍ଲଟ ୮୪ ଡିସିମିଲ ଖନନ ପାଇଁ ନିର୍ଦ୍ଦେଶ ଥିବାବେଳେ ସମ୍ପୃକ୍ତ ମାଫିଆମାନେ ୪ଟି ପ୍ଲଟରୁ ଦେଢ଼ ଏକରରୁ ଊର୍ଦ୍ଧ୍ୱ ଖନନ କରି ସାରିଲେଣି। ଏହି କାମରେ ସମ୍ପୃକ୍ତ ଥିବା ସ୍ଥାନୀୟ କେତେଜଣ ଦଲାଲ ରାତ୍ରିରେ ନିଜ ଜମିକୁ ଛାଡି କିଛି ଦୂରରେ ଥିବା କାଜୁ ଜଙ୍ଗଲରୁ ବେଆଇନ ଭାବେ ମୋରମ ଖନନ କରି ସ୍ଥାନୀୟ ଅଞ୍ଚଳରେ ବିକ୍ରି କରୁଥିବାର ଅଭିଯୋଗ ହେଉଛି। ଗତ ୨ ମାସରୁ ଊର୍ଦ୍ଧ୍ୱ ସମୟ ହେଲା ଚାଲିଥିବା ଏହି ବେଆଇନ ଖନନକୁ ନେଇ ପଛିକୋଟ ରାଜସ୍ବ ନିରୀକ୍ଷକ, ବ୍ୟାସନଗର ତହସିଲଦାର ଓ ପୋଲିସ ପ୍ରଶାସନକୁ ସ୍ଥାନୀୟ ଲୋକେ ବାରମ୍ବାର ଅଭିଯୋଗ କରିଛନ୍ତି। ହେଲେ ସମ୍ପୃକ୍ତ ଅଧିକାରୀମାନେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଗ୍ରାମବାସୀଙ୍କ ପକ୍ଷରୁ ଅଭିଯୋଗ ହୋଇଛି।
