ଢେଙ୍କାନାଳ ଅଫିସ, ୯।୭: ମୁନ୍ଦାଏ ପାଣି ପାଇଁ ଏଠି ନିତି ସଂଘର୍ଷ। ପାଣି ଚିନ୍ତାରୁ ଆରମ୍ଭ ହୁଏ ସକାଳ। ବର୍ଷା ଦିନେ ବି ମିଳେନି ସମସ୍ୟାରୁ ମୁକ୍ତି। ପାନୀୟଜଳ ପାଇଁ ଯୋଜନା ଶୀତଳଭଣ୍ଡାରରେ ରହିଯାଇଥିବାବେଳେ ସ୍ବାସ୍ଥ୍ୟ ଉପଯୋଗୀ ବିଶୁଦ୍ଧ ପାଣି ପାଇଁ କଲବଲ ହେଉଛନ୍ତି ଢେଙ୍କାନାଳ ସହରବାସୀ।
ଢେଙ୍କାନାଳ ପୌରସଂସ୍ଥାକୁ ପୂରିଲାଣି ୭୦ବର୍ଷ। ଜନସଂଖ୍ୟା ୭୫ହଜାର ଟପିଲାଣି। ଦିନକୁ ଦିନ ସହରର କଳେବର ବଢୁଥିବାବେଳେ ନିଅଣ୍ଟିଆ ପାଣି ଯୋଗାଣ ସମସ୍ୟାକୁ ଦ୍ୱିଗୁଣିତ କରୁଛି। ପୌରାଞ୍ଚଳ ପାଇଁ ଦିନକୁ ୧୨ ଏମ୍ଏଲ୍ଡି (ମିଲିୟନ ଲିଟର ପର୍ ଡେ’) ପାଣି ଆବଶ୍ୟକ ଥିବା ବେଳେ ଯୋଗାଣ ହେଉଛି ୯ ଏମ୍ଏଲ୍ଡି। ବ୍ରାହ୍ମଣୀ ନଦୀରୁ ୬ ଏବଂ ୮ନଂ. ୱାର୍ଡ ମହିଷାପାଟସ୍ଥିତ ପ୍ରଡକ୍ସନ ୱେଲ୍ରୁ ୩ ଏମ୍ଏଲ୍ଡି ପାଣି ଯୋଗାଣ ହେଉଥିବାବେଳେ ଦୈନିକ ୩ ଏମ୍ଏଲ୍ଡି ପାଣି ନିଅଣ୍ଟ ପଡୁଛି। ଅଦ୍ୟାବଧି ପୌରାଞ୍ଚଳର ୨୩ ୱାର୍ଡ ଭିତରୁ ୫ଟି ଓ୍ବାର୍ଡବାସୀ ପାଇପ୍ ପାଣି ପାଇବାରୁ ବଞ୍ଚତ୍ତ ରହିଛନ୍ତି। କାଞ୍ଚନବଜାର ଦଣ୍ଡାସାହି, ଆନନ୍ଦନଗର, ବନମାଳୀ ପ୍ରସାଦ, ଟାଉନପ୍ଲାନିଂ, ବାଞ୍ଝକୁସୁମ, ଗଜମରା, କୁଟୁଣିଆ ଅଞ୍ଚଳରେ ପାନୀୟଜଳ ଉତ୍କଟ ସମସ୍ୟା ଧାରଣ କରିଛି। ଜନସ୍ବାସ୍ଥ୍ୟ ବିଭାଗ ପକ୍ଷରୁ ଜୋନ୍ ଅନୁଯାୟୀ ପୌରାଞ୍ଚଳକୁ ବିଭିନ୍ନ ସମୟରେ ଦିନକୁ ୧ଘଣ୍ଟା ପାଣି ଯୋଗାଣ ହେଉଛି, ଯାହା ଜନସଂଖ୍ୟା ଅନୁପାତରେ ଯଥେଷ୍ଟ ନୁହେଁ। ୩୩୦ ନଳକୂଅ, ୨୨୧ ଷ୍ଟାଣ୍ଡପୋଷ୍ଟ ମଧ୍ୟରୁ ଅଧିକାଂଶ ଅଚଳ ହୋଇପଡିଛି। ଡ୍ରେନ୍ ମଧ୍ୟରେ ଯାଇଥିବା ପାଇପ୍ ଫାଟି ସେଥିରେ ଦୂଷିତ ପାଣି ପଶୁଛି। ବାରମ୍ବାର ଦାବି ସତ୍ତ୍ୱେ ଏହାକୁ ମରାମତି କରାଯାଉନାହିଁ। ସେହିପରି ବିଦ୍ୟୁତ୍ ବିଭ୍ରାଟ ସମୟରେ ଜଳ ଯୋଗାଣ ହୋଇପାରୁନାହିଁ। ଏହାର ସମାଧାନ ଲାଗି ସ୍ବତନ୍ତ୍ର ଭାବେ ବିଦ୍ୟୁତ୍ ଯୋଗାଣ କରିବାକୁ ଜନସ୍ବାସ୍ଥ୍ୟ ବିଭାଗ ପକ୍ଷରୁ ସେସୁ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲେ ମଧ୍ୟ ପଦକ୍ଷେପ ନିଆଯାଉନାହିଁ। ବ୍ରାହ୍ମଣୀ ନଦୀରେ ଅନ୍ୟ ଏକ ଓ୍ବାଟର ଟ୍ରିଟମେଣ୍ଟ ପ୍ଲାଣ୍ଟ କରାଗଲେ ସମସ୍ୟା ଅନେକାଂଶରେ ସମାଧାନ ହୋଇପାରନ୍ତା ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି।
ଏ ସଂକ୍ରାନ୍ତରେ ଜନସ୍ବାସ୍ଥ୍ୟ ବିଭାଗର ଅତିରିକ୍ତ ସହକାରୀ ନିର୍ବାହୀ ଯନ୍ତ୍ରୀ ଅଲେଖ ବିହାରୀ ପରିଡ଼ା କୁହନ୍ତି, ମହାନଦୀରୁ ପାଣି ଯୋଗାଣ ପ୍ରସ୍ତାବ ନେଇ ଏବେ ସୁଦ୍ଧା କୌଣସି ନିର୍ଦ୍ଦେଶନାମା ଆସିନାହିଁ। କରୋନା ସଂକ୍ରମଣ କାରଣରୁ ୫ ଓ୍ବାର୍ଡରେ ପାଇପ୍ ବିଛାଯିବା କାମ ବାଧାପ୍ରାପ୍ତ ହୋଇଥିଲା। ନିକଟରେ ଏହା ପୁଣି ଆରମ୍ଭ ହୋଇଛି। ବିଦ୍ୟୁତ୍ ବିଭ୍ରାଟ ସମୟରେ ବ୍ରାହ୍ମଣୀ ନଦୀରୁ ପାଣି ଉଠାଇବାକୁ ସ୍ବତନ୍ତ୍ର ବ୍ୟବସ୍ଥା କରିବାକୁ ସେସୁ କର୍ତ୍ତୃପକ୍ଷଙ୍କୁ ଜଣାଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନ ଥିବା ସେ ସୂଚନା ଦେଇଛନ୍ତି।
