ନୂଆଦିଲ୍ଲୀ,୧୫ ।୧: କରୋନାର ନୂଆ ଭାରିଏଣ୍ଟ ଓମିକ୍ରନ୍ ସଂକ୍ରମଣ ମଧ୍ୟରେ ଚଳିତ ବର୍ଷ ପାଳନ କରାଯିବ ସାଧାରଣତନ୍ତ୍ର ଦିବସ । ଏଥର ମାତ୍ର ୨୪ ହଜାର ଲୋକ ଏଥିରେ ସାମିଲ ହେବେ ବୋଲି ଜଣାପଡିଛି । ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏହି ସୂଚନା ମିଳିଥିବା କହିଛି ନ୍ୟୁଜ ଏଜେନ୍ସି ପିଟିଆଇ । ଗତବର୍ଷ କରୋନା ମହାମାରୀ ମଧ୍ୟରେ ୨୫ ହଜାର ଲୋକଙ୍କୁ ସାଧାରତନ୍ତ୍ର ଦିବସ ପରେଡରେ ଯୋଗ ଦେବାକୁ ଅନୁମତି ମିଳିଥିବା ବେଳେ ଚଳିତ ବର୍ଷ ଏହାକୁ କମାଇ ଦିଆଯାଇଛି ।
ସୂଚନାଯୋଗ୍ୟ, ସାଧାରଣତନ୍ତ୍ର ଦିବସରେ ବିଦେଶୀ ଅତିଥିଙ୍କୁ ନିମନ୍ତ୍ରଣ ଦେବାର ପରମ୍ପରା ରହିଛି । ହେଲେ ଚଳିତ ବର୍ଷ କରୋନା ମହାମାରୀ ଯୋଗୁ କେହି ବିଦେଶୀ ଅତିଥି ଏଥିରେ ଯୋଗ ଦେବେ ନାହିଁ । ଗତବର୍ଷ ବି ସାଧାରଣତନ୍ତ୍ର ଦିବସ ପରେଡରେ କେହି ବିଦେଶୀ ଅତିଥି ଯୋଗ ଦେଇ ନ ଥିଲେ । ମିଳିଥିବା ସୂଚନାରୁ ଜଣାପଡିଛି ଚଳିତବର୍ଷ ଉଜବେକିସ୍ତାନ, ତୁର୍କମେନିସ୍ତାନ, କାଜାକିସ୍ତାନ, କିର୍ଗିଜ ଗଣରାଜ୍ୟ ଓ ତାଜିକିସ୍ତାନର ନେତାଙ୍କୁ ଆମନ୍ତ୍ରଣ କରିବାର ଯୋଜନା ଥିଲା । ପ୍ରତିରକ୍ଷା ମନ୍ତ୍ରଣାଳୟ କହିଛି ଚଳିତବର୍ଷ ପରେଡରେ ୨୪ ହଜାର ଲୋକ ସାମିଲ ହେବେ । ଏମାନଙ୍କ ମଧ୍ୟରୁ ୧୯ ହଜାରଙ୍କ ନିକଟକୁ ନିମନ୍ତ୍ରଣ ପଠାଯାଇଛି । ଅବଶିଷ୍ଟ ୫ ହଜାର ସାଧାରଣ ଜନତା ସାମିଲ ହେବେ । ଯେଉଁମାନେ ଟିକେଟ କିଣି ଏଥିରେ ସାମିଲ ହେବେ ।
