ଅମରପାଲି,୨୩ା୮(ପୀତାମ୍ବର ସାହୁ): ସୁବର୍ଣ୍ଣପୁର ଜିଲାର ବୀରମହାରାଜପୁର ଓ ଉଲୁଣ୍ଡା ଅଞ୍ଚଳରେ ବିନା ପୋଲିସ ଭେରିଫିକେଶନ ଏବଂ ସଠିକ୍ ପରିଚୟ ଯାଞ୍ଚ ନ କରି ଘରଭଡ଼ା ଦିଆଯାଉଥିବାରୁ ଆପରାଧିକ କାର୍ଯ୍ୟକଳାପ ଓ ଚୋରି ବୃଦ୍ଧି ପାଉଛି। କେବଳ ଭଡ଼ା ଟଙ୍କା ପାଇଁ ଘରମାଲିକମାନେ ତଥ୍ୟ ରଖିବାରେ ଅବହେଳା କରୁଥିବାରୁ ତଦନ୍ତରେ ସମସ୍ୟା ଉପୁଜୁଛି।
ବୀରମହାରାଜପୁର, ଉଲୁଣ୍ଡା, ସୁବଳୟା, ସିଣ୍ଢୋଲ ପ୍ରଭୃତି ଅଞ୍ଚଳରେ ବାହାର ଜିଲା ଓ ରାଜ୍ୟରୁ ଆସୁଥିବା ଭଡ଼ାଟିଆଙ୍କ ସୂଚନା ପୋଲିସ ନିକଟରେ ଦାଖଲ କରାଯାଉନାହିଁ। ସପ୍ତାହେ ପୂର୍ବରୁ ଜଣେ ବ୍ୟବସାୟୀଙ୍କ ଘରୁ ଚୋରି ପରେ ଭଡ଼ାଟିଆଙ୍କ ପରିଚୟ ଯାଞ୍ଚକୁ ନେଇ ଚର୍ଚ୍ଚା ଜୋର ଧରିଛି।
ବୀରମହାରାଜପୁର ଥାନା ଅଧିକାରୀ ଯଯାତି କେଶରୀ ସାହୁ ଘରମାଲିକମାନେ ଭଡ଼ାଟିଆଙ୍କ ସମ୍ପୂର୍ଣ୍ଣ ତଥ୍ୟ ରଖନ୍ତୁ ଏବଂ ସନ୍ଦେହଜନକ କାର୍ଯ୍ୟକଳାପ ଦେଖିଲେ ପୋଲିସକୁ ଜଣାନ୍ତୁ ବୋଲି କହିଛନ୍ତି।
ଭଡ଼ାଟିଆଙ୍କୁ ସନ୍ଦେହ କରିବା ନୁହେଁ, ବରଂ ସୁରକ୍ଷା ଓ ତଦନ୍ତ ସୁବିଧା ପାଇଁ ଆଧାର, ସ୍ଥାୟୀ ଠିକଣା ଓ ଯୋଗାଯୋଗ ନମ୍ବର ସଂରକ୍ଷଣ କରିବା ପ୍ରତ୍ୟେକ ଘରମାଲିକଙ୍କ ପ୍ରଥମ କର୍ତ୍ତବ୍ୟ।
ଅପରାଧ ନିୟନ୍ତ୍ରଣ ପାଇଁ ଘରମାଲିକ, ଭଡ଼ାଟିଆ ଏବଂ ପୋଲିସର ମିଳିତ ସହଯୋଗରେ ଏକ ସୁସଂଗଠିତ ତଥ୍ୟ ବ୍ୟବସ୍ଥା ଗଠନ କରିବା ନିହାତି ଜରୁରୀ।
