ଥୁଆମୂଳ ରାମପୁର,୨୩ା୮(ଦୁର୍ଗା କୀର୍ତ୍ତି): ଲଘୁଚାପ ପ୍ରଭାବରେ ଦକ୍ଷିଣ ଓଡ଼ିଶାର ବିଭିନ୍ନ ଜିଲାରେ ପ୍ରବଳ ବର୍ଷା ଜାରି ରହିଥିବା ବେଳେ କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ରେକର୍ଡ ପରିମାଣର ୩୪୫ ମିମି ବର୍ଷା ହୋଇଛି । ଶୁକ୍ରବାର ରାତିରୁ ଅବିଶ୍ରାନ୍ତ ଭାବେ ଲାଗିରହିଥିବା ଏହି ଲଗାଣ ବର୍ଷା ଯୋଗୁଁ ସ୍ଥାନୀୟ ଲୋକଙ୍କ ଜନଜୀବନ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି । ଇନ୍ଦ୍ରାବତୀ ନଦୀର ଜଳସ୍ତର ହଠାତ୍ ବୃଦ୍ଧି ପାଇବା ଯୋଗୁଁ ବିଭିନ୍ନ ସ୍ଥାନରେ ବନ୍ୟା ପରିସ୍ଥିତି ସୃଷ୍ଟି ହେବା ସହ ଜିଲ୍ଲାର ବ୍ୟାପକ କ୍ଷତି ସାଧିତ ହୋଇଛି। ବିଶେଷ କରି କୁମ୍ଭାରଖାନି-ଡୁମେରପଦର ଏବଂ ସାନ ଦେରଳା-ବଡ଼ଦେରଲା ନିକଟସ୍ଥ ଇନ୍ଦ୍ରାବତୀ ନଦୀ ପୋଲ ଉପରେ ରବିବାର ଭୋରରୁ ପ୍ରାୟ ୫ ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହୋଇଥିଲା। ଏହାଯୋଗୁଁ ଥୁଆମୂଳ ରାମପୁର ଓ କାଶୀପୁର ବ୍ଲକ ମଧ୍ୟରେ ସଂଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଥିଲା।
ଗୋପୀନାଥପୁର-ଭବାନୀପାଟଣା ବସ୍ ଓ ମୁଖ୍ୟମନ୍ତ୍ରୀ ବସ୍ ସମେତ ୬୦ରୁ ଉର୍ଦ୍ଧ୍ୱ ଯାନବାହନ ଦୀର୍ଘ ୭ ଘଣ୍ଟା କାଳ ରାସ୍ତାର ଦୁଇ ପାର୍ଶ୍ୱରେ ଫସି ରହିଥିଲେ। ଏହି ବନ୍ୟାଜଳ ଯୋଗୁଁ ଏକ ଜରୁରୀକାଳୀନ ଆମ୍ବୁଲାନ୍ସ ମଧ୍ୟ ଫସି ରହିଥିବା ବେଳେ ଗୁରୁତର ସ୍ଥିତିରେ ଥିବା ଜଣେ ଗର୍ଭବତୀ ମହିଳାଙ୍କୁ ନେବା ପାଇଁ ଅନ୍ୟ ବିପଦପୂର୍ଣ୍ଣ ଓ ଦୀର୍ଘ ରାସ୍ତା ଦେଇ ଥୁଆମୂଳ ରାମପୁର ମେଡିକାଲକୁ ନେବାକୁ ପଡ଼ିଥିଲା। ଖବର ପାଇ ଥୁଆମୂଳ ରାମପୁର ପୋଲିସ ଓ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିରାପତ୍ତା ବ୍ୟବସ୍ଥା କଡ଼ାକଡ଼ି କରିଥିଲେ। ପାଣି ନ କମିବା ପର୍ଯ୍ୟନ୍ତ ବିପଜ୍ଜନକ ଭାବେ ଯାତାୟତ ନକରିବାକୁ ପଥଚାରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ପରବର୍ତ୍ତୀ ସମୟରେ ଜଳସ୍ତର ହ୍ରାସ ପାଇବା ପରେ ଯାତାୟତ ଧୀରେ ଧୀରେ ସ୍ୱାଭାବିକ ହୋଇଥିଲା।
ଏହି ବର୍ଷା ଯୋଗୁଁ ଢୋଲପାସରୁ ମହୁଲପାଟଣା, ଢୋଲପାସ ଗାଡ଼ବେଡା ନଦୀ, ନିକେଶଜୋର ଏବଂ କର୍ଣ୍ଣିବେଲ ନାଗାବଳୀ ନଦୀ ମଧ୍ୟ ଫୁଲିବାରେ ଲାଗିଛି । ବହୁ ସ୍ଥାନରେ ଘର ଭୁଶୁଡ଼ିବା ସହ ଶହ ଶହ ଏକର ଚାଷ ଜମି ଜଳମଗ୍ନ ହୋଇ ବ୍ୟାପକ କ୍ଷତିଗ୍ରସ୍ତ ହୋଇଥିବା ନେଇ ଆଶଙ୍କା ପ୍ରକାଶ ପାଇଛି । କାଶୀପୁର, ଥୁଆମୂଳ ରାମପୁର, ଗୋପୀନାଥପୁର, ଲାଞ୍ଜିଗଡ଼, ଭାଟିଫାସ ଓ ଭବାନୀପାଟଣାକୁ ସଂଯୋଗ କରୁଥିବା ମୁଖ୍ୟ ରାସ୍ତା ବାଧାପ୍ରାପ୍ତ ହୋଇଥିବାରୁ ସ୍ଥାନୀୟ ବାସିନ୍ଦା ଏବଂ ନବରଙ୍ଗପୁର ଆଦି ଅଞ୍ଚଳରୁ ଫେରୁଥିବା ଯାତ୍ରୀମାନେ ପ୍ରବଳ ଅସୁବିଧାର ସମ୍ମୁଖୀନ ହୋଇଛନ୍ତି ।
