ଭୁବନେଶ୍ୱର,୧୪ା୩: ଦେଶରେ ବ୍ୟାଙ୍କ ଠକେଇ ବଢୁଥିବା ଯୋଗୁ ଭାରତ ସରକାର ନିଜର ଡିଜିଟାଲ କରେନ୍ସି ଆଣିବା ପାଇଁ ଯୋଜନା ପ୍ରସ୍ତୁତ କରୁଛନ୍ତି। ରିଜର୍ଭ ବ୍ୟାଙ୍କ ଅ୍ଫ ଇଣ୍ଡିଆ (ଆର୍ବିଆଇ) ମଧ୍ୟ ଡିଜିଟାଲ କରେନ୍ସିର ବ୍ୟବହାର ଓ ଏହାର ପ୍ରସ୍ତୁତି ଉପରେ କାମ ଆରମ୍ଭ କରିଦେଇଛି। ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ କହିଛନ୍ତି, ଆର୍ବିଆଇ ନିଜେ ଡିଜିଟାଲ କରେନ୍ସି ଉପରେ କାମ କରୁଛି। ଏହା ସମ୍ପୂର୍ଣ୍ଣ ଭାବେ କ୍ରିପ୍ଚୋ କରେନ୍ସିରୁ ଭିନ୍ନ ହେବ। ଏହାଦ୍ୱାରା ବ୍ୟାଙ୍କ ଠକେଇ ଉପରେ ରୋକ୍ ଲାଗିବ। ଏହା ସହ ଋଣ ଦେବା ପ୍ରକ୍ରିୟାରେ ମଧ୍ୟ ସ୍ବଚ୍ଛତା ଆସିବ ବୋଲି ସେ ମତବ୍ୟକ୍ତ କରିଛନ୍ତି। ଆର୍ବିଆଇ ଦ୍ୱାରା ଅଗଷ୍ଟରେ ଜାରି ବାର୍ଷିକ ରିପୋର୍ଟ ଅନୁସାରେ ୨୦୧୯-୨୦ରେ ଭାରତରେ ବ୍ୟାଙ୍କିଙ୍ଗ୍ ଠକେଇ ମାମଲା ୧୫୯ ଗୁଣା ବୃଦ୍ଧି ପାଇଛି; ଯାହା ଗୋଟିଏ ବର୍ଷ ତୁଳନାରେ ୨.୫ ଗୁଣ ଅଧିକ। ବ୍ଲକ ଚେନ୍ ଓ ସାଇବର ସିକ୍ୟୁରିଟି, ଟେକ୍ ମହିନ୍ଦ୍ରାର ରାଜେଶ ଧୁଡୁ କହିଛନ୍ତି ଯେ, ଅନ୍ଲାଇନ୍ ବ୍ୟାଙ୍କିଙ୍ଗ୍, ୟୁପିଆଇ, ଆର୍ଟିଜିଏସ୍ ଭଳି ସୁବିଧା ସତ୍ତ୍ୱେ ଲୋକଙ୍କ ବ୍ୟବହାରରେ ପରିବର୍ତ୍ତନ ହୋଇନାହିଁ । ସିଷ୍ଟମରେ ଟ୍ରାଞ୍ଜାକ୍ସନକୁ ମନିଟର କରିବା ଭଳି ବ୍ୟବସ୍ଥା ନାହିଁ। ଫଳରେ ଇଲେକ୍ଟ୍ରୋନିକ୍ ବ୍ୟବସ୍ଥାରେ ହେଉଥିବା ପେମେଣ୍ଟ ପେପର କରେନ୍ସିର ଡିଜିଟାଲ ଭର୍ସନ। ବର୍ତ୍ତମାନ ସମୟରେ ଯେକୌଣସି ବ୍ୟକ୍ତି ଇଲେକ୍ଟ୍ରୋନିକ୍ସ ପ୍ରକ୍ରିୟାରେ ଟଙ୍କା ନେଣଦେଣ କରିପାରିବ। ଏହାକୁ କ୍ୟାଶ୍ରେ ମଧ୍ୟ ପରିବର୍ତ୍ତନ କରିହେବ।
