କଟକ ଅଫିସ,୧୧ା୧୨: ରେଭେନ୍ଶା ବିଶ୍ୱବିଦ୍ୟାଳୟ କ୍ରୀଡା ହବ୍ ହେବ। ଆସନ୍ତା ଫେବୃୟାରୀରେ ଏହି ବିଶ୍ୱବିଦ୍ୟାଳୟରେ ଆନ୍ତଃ ବିଶ୍ୱବିଦ୍ୟାଳୟ କ୍ରୀଡା ପ୍ରତିଯୋଗିତା ଅନୁଷ୍ଠିତ ହେବ। ପ୍ରାୟ ୧୦୦୦ ପ୍ରତିଯୋଗୀ ଏଥିରେ ଭାଗ ନେବେ। ପ୍ରଥମ ଥର ପାଇଁ ଭିନ୍ନକ୍ଷମ ଛାତ୍ରୀଛାତ୍ରଙ୍କ ନିମନ୍ତେ ସ୍ବତନ୍ତ୍ର କ୍ରୀଡା ରହିବ। ଅନ୍ୟ ଖେଳ ସହିତ ପ୍ରଥମ କ୍ୟାମ୍ପସରୁ ଦ୍ୱିତୀୟ କ୍ୟାମ୍ପସ ପର୍ଯ୍ୟନ୍ତ ଏକ ମିନି ମାରାଥନ ଅନୁଷ୍ଠିତ ହେବ। ରାଜ୍ୟ ବ୍ୟାଡମିଣ୍ଟନ ସଂଘ ଓ ରେଭେନ୍ଶା ବିଶ୍ୱବିଦ୍ୟାଳୟର ମିଳିତ ଉଦ୍ୟମରେ ଡିସେମ୍ବର ୧୦ରୁ ୧୭ ତାରିଖ ପର୍ଯ୍ୟନ୍ତ କୋଚିଂ ଏବଂ ଖେଳାଳି (ମହିଳା ଓ ପୁରୁଷ) ଚୟନ ପ୍ରକ୍ରିୟା ଚାଲିବ। ରାଜ୍ୟକୁ ପ୍ରତିନିଧିତ୍ୱ କରିବା ପାଇଁ ଖେଳାଳି ଚୟନ ପ୍ରକ୍ରିୟାରେ ବିଶ୍ୱବିଦ୍ୟାଳୟ ପକ୍ଷରୁ ସମସ୍ତ ସୁବିଧା ଓ ସହଯୋଗ ଯୋଗାଇ ଦିଆଯାଇଛି ବୋଲି କ୍ରୀଡା ଅଧିକାରୀ ଅଞ୍ଜନ କୁମାର ଖୁଣ୍ଟିଆ କହିଛନ୍ତି। ଏନେଇ ଶନିବାର ବିଶ୍ୱବିଦ୍ୟାଳୟ ପରିସରରେ ବିଶ୍ୱବିଦ୍ୟାଳୟ କ୍ରୀଡା ପରିଷଦ ପକ୍ଷରୁ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବିଶ୍ୱବିଦ୍ୟାଳୟ କ୍ରୀଡା ପରିଷଦ ଅଧ୍ୟକ୍ଷ ପ୍ରଫେସର ଧର୍ମବ୍ରତ ମହାପାତ୍ର କହିଥିଲେ, ବିଶ୍ୱବିଦ୍ୟାଳୟରେ ଥିବା ଭିତ୍ତିଭୂମି ପିଲାଙ୍କୁ ଖେଳିବା ପାଇଁ ଆକୃଷ୍ଟ କରୁଛି। ବିଭିନ୍ନ ଖେଳରେ ବହୁ ସଂଖ୍ୟାରେ ପିଲାଙ୍କ ଯୋଗଦାନ ଏହାର ଏକ ସକାରାତ୍ମକ ପ୍ରଭାବକୁ ପ୍ରମାଣିତ କରୁଛି। ରେଭେନ୍ଶା ବିଶ୍ୱବିଦ୍ୟାଳୟ ରାଜ୍ୟର ଏକ ଅଗ୍ରଣୀ ଶିକ୍ଷାନୁଷ୍ଠାନ। ସବୁ ଛାତ୍ରୀନିବାସ ଏବେ ଏକକ କ୍ଷେତ୍ର ମଧ୍ୟରେ ଅବସ୍ଥିତ। ଏହି କ୍ଷେତ୍ରରେ ହାରାହାରି ୨୦୦୦ ଛାତ୍ରୀ ରହୁଛନ୍ତି। ସେମାନଙ୍କ ପାଇଁ ସେହି କ୍ଷେତ୍ର ମଧ୍ୟରେ ବାସ୍କେଟ୍ ବଲ୍, ଭଲି ବଲ୍ ପଡିଆ, ମୁକ୍ତ ଜିମ୍ନାସିୟମ୍ ପାଇଁ ସ୍ଥାନ ନିରୂପଣ ହୋଇଛି। ଖୁବ୍ଶୀଘ୍ର କାମ ଆରମ୍ଭ ହେବ ଓ ଆଧୁନିକ ଉପକରଣ ଲାଗିବ ବୋଲି ଡ. ନେତାଜୀ ଅଭିନନ୍ଦନ କହିଛନ୍ତି। ଏହାଛଡା ବ୍ୟାୟାମ ପାଇଁ ଜୁମ୍ବଝ ଓ ଏରୋବିକ୍ ଟ୍ରେନିଂ ବ୍ୟବସ୍ଥା ହେବା ପାଇଁ ଯୋଜନା ଅଛି। କୁଳପତି ପ୍ରଫେସର ସଞ୍ଜୟ ନାୟକଙ୍କ ନେତୃତ୍ୱରେ ରେଭେନ୍ଶା କ୍ରୀଡା କ୍ଷେତ୍ରରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିବ ବୋଲି ଛାତ୍ରୀଛାତ୍ର ଓ ଅଭିଭାବକ ଦୃଢ଼ ବିଶ୍ୱାସ ରଖିଛନ୍ତି। ଏହି ବୈଠକରେ ଡ. ମନୋଜ କୁମାର ଦାସ ଓ ଡ. ସତ୍ୟବ୍ରତ ବେହେରା ଯୋଗଦେଇଥିଲେ।
ରେଭେନ୍ଶା ବିଶ୍ୱବିଦ୍ୟାଳୟରେ ହକିକୁ ଲୋକପ୍ରିୟ କରାଇବା ପାଇଁ ସ୍ବତନ୍ତ୍ର ଯୋଜନା ପ୍ରସ୍ତୁତ କରାଯାଇଛି। ଆସନ୍ତାବର୍ଷ ଓଡ଼ିଶାରେ ହକି ବିଶ୍ୱ କପ୍ ଅନୁଷ୍ଠିତ ହେବ। ଏଥିପାଇଁ ରେଭେନ୍ଶାରେ ହକି ବିଶ୍ୱ କପ୍ ସମ୍ବନ୍ଧୀୟ ଅନେକ କାର୍ଯ୍ୟକ୍ରମ ହାତକୁ ନିଆଯାଇଛି। ଛାତ୍ରୀଛାତ୍ରଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା କରାଯାଇଛି। ଆସନ୍ତା ଜାନୁୟାରୀରେ କୃତୀ ପ୍ରତିଯୋଗୀମାନଙ୍କୁ ବିଶ୍ୱବିଦ୍ୟାଳୟ ପକ୍ଷରୁ ସମ୍ବର୍ଦ୍ଧିତ କରାଯିବ। ସେହିପରି ଦ୍ୱିତୀୟ କ୍ୟାମ୍ପସରେ ଏକ ହକି ଷ୍ଟାଡିୟମ୍ ନିର୍ମାଣ ପାଇଁ ସରକାରଙ୍କୁ ପ୍ରସ୍ତାବ ଦିଆଯାଇଛି। ଶିକ୍ଷାମନ୍ତ୍ରୀ ଓ ହକି ଇଣ୍ଡିଆ ସଭାପତି ଦିଲୀପ ତିର୍କୀଙ୍କ ସହିତ ଏ ବିଷୟରେ ଖୁବ୍ଶୀଘ୍ର ଆଲୋଚନା କରାଯିବ ବୋଲି ବିଶ୍ୱବିଦ୍ୟାଳୟ କ୍ରୀଡା ପରିଷଦ ପକ୍ଷରୁ ଜଣାପଡିଛି। ଏଥିସହ ପୁରୁଷ ହକି ଦଳ ଆନ୍ତଃ ବିଶ୍ୱବିଦ୍ୟାଳୟ ପ୍ରତିଯୋଗିତାରେ ଭାଗ ନେଉଛନ୍ତି।
