ନୂଆଦିଲ୍ଲୀ, ୩ା୭- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ରଣଜୀ ଟ୍ରଫି ସମେତ ଏହାର ସମସ୍ତ ଘରୋଇ ଟୁର୍ନାମେଣ୍ଟ ଆୟୋଜନ କରିବ। ୨୦୨୧-୨୨ ସିଜନରେ ମୋଟ ୨୧୨୭ ମ୍ୟାଚ ଖେଳାଯିବ। ରଣଜୀ ଟ୍ରଫି ନଭେମ୍ବର ୧୬ରୁ ଆରମ୍ଭ ହେବ। କୋଭିଡ୍ ମହାମାରୀ ଯୋଗୁ ବିସିସିଆଇ ଗତବର୍ଷ କୌଣସି ବୟସ ବର୍ଗରେ ଟୁର୍ନାମେଣ୍ଟ ଆୟୋଜନ କରି ନ ଥିଲା। ରଣଜୀ ଟ୍ରଫିକୁ ବାଧ୍ୟତାମୂଳକ ବାତିଲ କରିଥିଲା। କିନ୍ତୁ ଚଳିତବର୍ଷ ସମସ୍ତ ଘରୋଇ ଟୁର୍ନାମେଣ୍ଟ ହେବ। ସୟଦ ମୁସ୍ତାକ ଅଲୀ ଟି୨୦ ଅକ୍ଟୋବର ୨୦ରୁ ଏବଂ ଜାତୀୟ ଦିନିକିଆ ଚାମ୍ପିୟନଶିପ୍ ବିଜୟ ହଜାରେ ଟ୍ରଫି ୨୦୨୨ ଫେବୃୟାରୀ ୨୩ରୁ ଖେଳାଯିବ।
ମହିଳା ସିନିୟର ଦିନିକିଆ ଲିଗ୍ ସହ ୨୦୨୧ ସେପ୍ଟେମ୍ବର ୨୧ରୁ ସିଜନ ଆରମ୍ଭ ହେବ। ଏହାପଛକୁ ମହିଳା ସିନିୟର ଦିନିକିଆ ଚ୍ୟାଲେଞ୍ଜର ଟ୍ରଫି ୨୦୨୧ ଅକ୍ଟୋବର ୨୭ରୁ ଖେଳାଯିବ ବୋଲି ବିସିସିଆଇ ସମ୍ପାଦକ ଜୟ ଶାହା ଗଣମାଧ୍ୟମକୁ ଏକ ପ୍ରେସ୍ ଇସ୍ତାହାର ଜରିଆରେ ଜଣାଇଛନ୍ତି। ସୟଦ ମୁସ୍ତାକ ଅଲୀ ଟ୍ରଫିର ଫାଇନାଲ ୨୦୨୧ ନଭେମ୍ବର ୧୨ରେ ଅନୁଷ୍ଠିତ ହେବ। ମର୍ଯ୍ୟାଦାପୂର୍ଣ୍ଣ ରଣଜୀ ଟ୍ରଫି ପାଇଁ ୩ ସପ୍ତାହ ସମୟ ରଖାଯାଇଛି। ଏହା ୨୦୨୧ ନଭେମ୍ବର ୧୬ରୁ ୨୦୨୨ ଫେବୃୟାରୀ ୧୯ ପର୍ଯ୍ୟନ୍ତ ଚାଲିବ। ବିଜୟ ହଜାରେ ଟ୍ରଫି ଫାଇନାଲ ୨୦୨୨ ମାର୍ଚ୍ଚ ୨୬ରେ ହେବ। ଖେଳାଳି ଏବଂ ଟୁର୍ନାମେଣ୍ଟ ସହ ସମ୍ପୃକ୍ତ ଲୋକମାନଙ୍କ ସ୍ବାସ୍ଥ୍ୟ ସୁରକ୍ଷାକୁ ଅଗ୍ରାଧିକାର ପ୍ରଦାନ ସହିତ ଘରୋଇ ସିଜନ ଆୟୋଜନ ହେବ ବୋଲି ପ୍ରେସ୍ ଇସ୍ତାହାରରେ କୁହାଯାଇଛି।
