ନୂଆଦିଲ୍ଲୀ, ୧୦।୯ : ଭାରତୀୟ ଜନତା ପାର୍ଟି କଂଗ୍ରେସର ଭାରତ ଯୋଡ ଯାତ୍ରା ନେଇ ରାହୁଲ ଗାନ୍ଧୀଙ୍କୁ ଘେରିବା ଆରମ୍ଭ କରିଛି। ଏହି ଗସ୍ତ ସମ୍ପର୍କରେ ଭାଜପା ନେତାଙ୍କ ବିବୃତ୍ତି ସାମ୍ନାକୁ ଆସିବାରେ ଲାଗିଛି। ଏହି ମର୍ମରେ ଭାଜପା ନେତା ଶାହାଜାଦ ପୁନାୱାଲା ଭାରତ ଯୋଡ ଯାତ୍ରା ଉପରେ ପ୍ରଶ୍ନ ଉଠାଇଛନ୍ତି। ସେ ଏହାକୁ ରାହୁଲଙ୍କ ଘୃଣା ଯୋଡ ଅଭିଯାନ ବୋଲି କହିଛନ୍ତି।
ରାହୁଲ ଗାନ୍ଧୀ ଏବଂ କଂଗ୍ରେସ ଉପରେ କଟାକ୍ଷ କରି ପୁନାଓ୍ବାଲା କହିଛନ୍ତି ଯେ ଆଜି କଂଗ୍ରେସ ଜର୍ଜ ପୋନ୍ନେୟାଙ୍କୁ ଭାରତ ଯୋଡ ଯାତ୍ରାର ପୋଷ୍ଟର ବୟ କରିଛି। ପୋନ୍ନେୟା ହିନ୍ଦୁମାନଙ୍କୁ ଧମକ ଦେବା ସହ ଏବଂ ଭାରତ ମାତା ବିରୁଦ୍ଧରେ ଅପମାନଜନକ ଶବ୍ଦ କହିଥାନ୍ତି। ହିନ୍ଦୁ ବିରୋଧୀ ହେବାର କଂଗ୍ରେସ ଦଳର ଦୀର୍ଘ ଇତିହାସ ରହିଛି। ଏଭଳି କରି ରାହୁଲ ଘୃଣା ଯୋଡ ଅଭିଯାନରେ ନିୟୋଜିତ ଅଛନ୍ତି।
ସୂଚନାଯୋଗ୍ୟ, ପୋନ୍ନେୟା ଜଣେ ପାଦ୍ରୀ। ବହୁ ବିବାଦୀୟ ବକ୍ତବ୍ୟ ନେଇ ସେ ଲାଇମ ଲାଇଟରେ ଅଛନ୍ତି। ଗତ ବର୍ଷ ଜୁଲାଇରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଥିବାରୁ ତାଙ୍କୁ ଗିରଫ କରାଯାଇଥିଲା। ଭାରତ ଯୋଡ ଯାତ୍ରା ସମୟରେ ରାହୁଲ ଗାନ୍ଧୀଙ୍କ ସହ ପୋନ୍ନେୟା ଙ୍କ ଏକ ଭିଡିଓ ଭାଇରାଲ ହୋଇଛି। ଏଥିରେ ସେ ଯୀଶୁଙ୍କୁ ପ୍ରକୃତ ଈଶ୍ବରଙ୍କୁ କହୁଛନ୍ତି ।
ଏହା ସହିତ ଭାଜପା ନେତା ସମ୍ବିତ ପାତ୍ର ମଧ୍ୟ କଂଗ୍ରେସକୁ ଟାର୍ଗେଟ କରିଛନ୍ତି। ସେ କହିଛନ୍ତି ଏହା ପ୍ରଥମ ଘଟଣା ନୁହେଁ। ଏପରି କିଛି ଘଟଣା ଘଟିଛି ଯେତେବେଳେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ହିନ୍ଦୁ ଧର୍ମ ବିରୁଦ୍ଧରେ ଅପମାନଜନକ ମନ୍ତବ୍ୟ ଦେଇଛନ୍ତି। ଭଗବାନ ରାମଙ୍କ ପ୍ରମାଣ ମାଗିବା ଏବଂ ମାତା ଶକ୍ତି ପ୍ରସଙ୍ଗ ଏଥିରେ ରହିଛି। ରାହୁଲ ନାଟକ କରିବା ପାଇଁ ନିର୍ବାଚନ ସମୟରେ ମନ୍ଦିରକୁ ଯାଆନ୍ତି। ଯେତେବେଳେ ନିର୍ବାଚନ ସମାପ୍ତ ହୁଏ, ସେତେବେଳେ ରାହୁଲ ଗାନ୍ଧୀଙ୍କ ପ୍ରକୃତ ଚେହେରା ସମସ୍ତଙ୍କ ସାମ୍ନାରେ ଆସେ ।
