ନୂଆଦିଲ୍ଲୀ,୨୮।୬: ପୂର୍ବତନ ପ୍ରଧାନମନ୍ତ୍ରୀ ପିଭି ନରସିଂହ ରାଓଙ୍କ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ପନେ ପକାଇଛନ୍ତି। ଦେଶରେ ଆର୍ଥିକ ସୁଧାର କଥା ଆସିଲେ ପ୍ରଥମେ ଆସେ ନରସିଂହ ରାଓଙ୍କ ନାମ। ଦେଶର ଆର୍ଥିକ ସ୍ଥିତି ସୁଧାରି ଥିଲେ ବି ଏମିତି ସମୟ ଆସିଥିଲା ଯେତେବେଳେ ତାଙ୍କ ଦଳ କଂଗ୍ରେସ ତାଙ୍କ ନିକଟରୁ ମୁହଁ ଫେରାଇ ନେଇଥିଲା। ନରସିଂହ ରାଓ ବହୁ ବିବାଦରେ ମଧ୍ୟ ଛନ୍ଦି ହୋଇ ପଡିଥିଲେ। ତେବେ ତାଙ୍କ ଜୀବନରେ ଜଣେ ମହିଳାଙ୍କ ସହ ଥିବା ତାଙ୍କର ପ୍ରେମ ସମ୍ପର୍କ ସବୁଠାରୁ ଅଧିକ ଚର୍ଚ୍ଚାକୁ ଆସିଥିଲା। ଯାହାକୁ ନେଇ ତାଙ୍କ ପରିବାର ମଧ୍ୟ ଅସନ୍ତୁଷ୍ଟ ଥିଲେ। କୁହାଯାଏ ନରସିଂହ ରାଓଙ୍କ ଏହି ଆଫେୟାର୍ସକୁ ନେଇ ତାଙ୍କ ପୁଅ ଦିଲ୍ଲୀ ଯାଇ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଆଗରେ ଅଭିଯୋଗ କରୁଥିଲେ। ଇନ୍ଦିରା ଗାନ୍ଧୀ ବାରମ୍ବାର ଏହା ଶୁଣିବା ପରେ ନରସିଂହ ରାଓଙ୍କ ଉପରେ କୁଆଡେ ବିଗଡି ଯାଇଥିଲେ। କହିଥିଲେ ନରସିଂହ ରାଓ କେବଳ ଲକ୍ଷ୍ମୀକାନ୍ତା ଅମ୍ମାଙ୍କ ସହ ସମ୍ପର୍କ ରଖିବା ବ୍ୟତୀତ ଆଉ କିଛି କରି ନାହାନ୍ତି। ଏବେ ତାଙ୍କ ପୁଅଙ୍କୁ ଦେଖିଲେ ମୋତେ ଦୟା ଲାଗୁଛି। କଂଗ୍ରେସର ବରିଷ୍ଠ ନେତା ତଥା ଆନ୍ଧ୍ର ପ୍ରଦେଶର ତତ୍କାଳୀନ ମୁଖ୍ୟମନ୍ତ୍ରୀ ବେଙ୍ଗଲ ରାଓ ତାଙ୍କ ଅଟୋବାୟୋଗ୍ରାଫି ‘ମାଇ ଲାଇଫ୍ ଷ୍ଟୋରୀ’ରେ ମଧ୍ୟ ନରସିଂହ ରାଓଙ୍କ ଆଫେୟାର୍ସ ସମ୍ପର୍କରେ ଲେଖିଛନ୍ତି। ତାଙ୍କ ପୁଅ ଇନ୍ଦିରାଙ୍କ ନିକଟରେ ଏହି ଅଭିଯୋଗ କରୁଥିବା ଉଲ୍ଲେଖ କରାଯାଇଛି। ନରସିଂହଙ୍କ ବଡପୁଅ ସବୁବେଳେ ଏହି ଅଭିଯୋଗ ଆଣୁଥିଲେ। ଆଉ ବିରୋଧୀଙ୍କୁ ଏହା ଯେପରି ଖୋରାକ ଯୋଗାଉଥିଲା। ତେବେ ଲକ୍ଷ୍ମୀକାନ୍ତା ଆମ୍ମାଙ୍କ ସହ ସମ୍ପର୍କ ଯୋଗୁ ମାତ୍ର ୩ ବର୍ଷ ମଧ୍ୟରେ ନରସିଂହ ରାଓ ତାଙ୍କ ମୁଖ୍ୟମନ୍ତ୍ରୀ ଆସନ ହରାଇ ବସିଥିଲେ ବୋଲି କୁହାଯାଏ। କେବଳ ଲକ୍ଷ୍ମୀକାନ୍ତା ନୁହଁନ୍ତି ଆଉ କେତେଜଣ ମହିଳାଙ୍କ ସହ ମଧ୍ୟ ନରସିଂହ ରାଓଙ୍କ ସମ୍ପର୍କ ଥିବା କୁହାଯାଏ। ହେଲେ ୬୦ ଦଶକରେ ଲକ୍ଷ୍ମୀକାନ୍ତାଙ୍କ ସହ ତାଙ୍କ ପ୍ରେମ ସମ୍ପର୍କ ଚର୍ଚ୍ଚାକୁ ଆସିଥିବା ବେଳେ ୭୦ ଦଶକରେ ନରସିଂହ ରାଓଙ୍କ ପତ୍ନୀଙ୍କ ବିୟୋଗ ପରେ ଲକ୍ଷ୍ମୀକାନ୍ତାଙ୍କ ସହ ତାଙ୍କର ସମ୍ପର୍କ ଦୃଢ ହୋଇଥିଲା ବୋଲି କୁହାଯାଏ। ଲକ୍ଷ୍ମୀକାନ୍ତା ଜଣେ ରାଜନେତା ଥିବା ବେଳେ କିଛିଦିନ ପରେ ସେ ରାଜନୀତିରୁ ବିଦାୟ ନେଇ ଆଧ୍ୟାତ୍ମିକ ଦିଗରେ ଚାଲିଯିବାରୁ ନରସିଂହ ରାଓ ପରେ ନିଜ ଆତ୍ମକଥା ’ଇନସାଇଡର’ ଲେଖିଥିଲେ।
