ଜୟପୁର,୨୬ା୫: ପ୍ରିୟାଂଶ ଆର୍ଯ୍ୟ ଓ ଜୋଶ ଇଙ୍ଗଲିସଙ୍କ ବିସ୍ଫୋରକ ଅର୍ଦ୍ଧଶତକ ବଳରେ ପଞ୍ଜାବ କିଙ୍ଗ୍ସ (ପିବିକେଏସ୍) ୭ ଉଇକେଟରେ ମୁମ୍ବାଇ ଇଣ୍ଡିଆନ୍ସ (ଏମ୍ଆଇ)କୁ ଏକତରଫା ଭାବେ ପରାସ୍ତ କରିଛି। ଏହି ବିଜୟ ସହ ପଞ୍ଜାବ ପଏଣ୍ଟ ଟେବୁଲ ଶୀର୍ଷକୁ ଉନ୍ନୀତ ହୋଇଛି। ଅନ୍ୟପକ୍ଷରେ ମୁମ୍ବାଇ ୧୬ ପଏଣ୍ଟ ସହ ପଏଣ୍ଟ ଟେବୁଲର ଚତୁର୍ଥ ସ୍ଥାନରେ ରହି ଲିଗ୍ ପର୍ଯ୍ୟାୟ ଅଭିଯାନ ଶେଷ କରିଛି।
ପାଇ ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ନିର୍ଦ୍ଧାରିତ ୨୦ ଓଭରରେ ୭ ଉଇକେଟ ହରାଇ ୧୮୪ ରନ କରିଥିଲା। ଦଳ ପକ୍ଷରୁ ସୂର୍ଯ୍ୟକୁମାର ଯାଦବ ୩୯ ବଲରେ ୫୭ (୬ ଚୌକା ଓ ୨ ଛକା), ରିୟାନ ରିକଲଟନ ୨୭ (୫ ଚୌକା), ଅଧିନାୟକ ହାର୍ଦ୍ଦିକ ପାଣ୍ଡ୍ୟା ୨୬ (୨ ଲେଖାଏ ଚୌକା ଓ ଛକା), ରୋହିତ ଶର୍ମା ୨୪ (୨ ଚୌକା ଓ ୧ ଛକା) ରନ କରିଥିଲେ। ପଞ୍ଜାବ ପକ୍ଷରୁ ମାର୍କୋ ଜାନସେନ, ଅର୍ଶଦୀପ ସିଂ ଓ ବିଜୟକୁମାର ବ୍ୟଶକ ଦୁଇଟି ଲେଖାଏ ଉଇକେଟ ନେଇଥିଲେ। ଜବାବରେ ପଞ୍ଜାବ ଆରମ୍ଭରୁ ପ୍ରଭସିମରନ ସିଂ (୧୩)ଙ୍କ ଉଇକେଟ ହରାଇଥିଲା। ଅନ୍ୟତମ ଓପନର ପ୍ରିୟାଂଶ ଓ ଇଙ୍ଗଲିସ ଦ୍ୱିତୀୟ ଉଇକେଟରେ ୧୦୯ ରନ ଯୋଡ଼ି ଦଳର ବିଜୟ ନିଶ୍ଚିତ କରିଥିଲେ। ପ୍ରିୟାଂଶ ୩୫ ବଲରେ ୬୨ (୯ ଚୌକା ଓ ୨ ଛକା) ଏବଂ ଇଙ୍ଗଲିସ ୪୨ ବଲରେ ୭୩ (୯ ଚୌକା ଓ ୩ ଛକା) ରନ କରି ପାଭିଲିଅନ ଫେରିଥିଲେ। ଏହା ଇଙ୍ଗଲିଶଙ୍କ ଆଇପିଏଲ୍ କ୍ୟାରିୟରର ପ୍ରଥମ ଅର୍ଦ୍ଧଶତକ ଥିଲା। ମିଚେଲ ସାଣ୍ଟନର ଉଭୟ ବ୍ୟାଟରଙ୍କୁ ଆଉଟ୍ କରିଥିଲେ। ଶେଷ ଆଡ଼କୁ ଅଧିନାୟକ ଶ୍ରେୟସ ଆୟର ୧୬ ବଲରେ ୨୬ (୧ ଚୌକା ଓ ୨ ଛକା) ରନ କରି ଦଳକୁ ଜିତାଇଥିଲେ।
