ଥୁଆମୂଳ ରାମପୁର, ୨୧ା୫ (ଦୁର୍ଗା କୀର୍ତ୍ତି): ଥୁଆମୂଳ ରାମପୁର ବ୍ଲକରେ ଭାରତ ସରକାରଙ୍କ ଜନଜାତି ମନ୍ତ୍ରଣାଳୟ ପକ୍ଷରୁ ‘ଜନ ଭାଗୀଦାରି: ସବ୍ସେ ଦୂର, ସବ୍ସେ ପହେଲେ’ କାର୍ଯ୍ୟକ୍ରମ ଶୁଭାରମ୍ଭ ହୋଇଛି। ୨୫ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଅଭିଯାନର ମୂଳ ଉଦ୍ଦେଶ୍ୟ ହେଉଛି ବ୍ଲକର ସମସ୍ତ ଜନଜାତି ଓ ପିଭିଟିଜି ଅଞ୍ଚଳରେ ସଚେତନତା ସୃଷ୍ଟି କରିବା। ବିଶେଷ କରି ଅପହଞ୍ଚ ଇଲାକାରେ ଯୋଗ୍ୟ ହିତାଧିକାରୀଙ୍କ ନିକଟରେ ସରକାରଙ୍କ ବିଭିନ୍ନ କଲ୍ୟାଣମୂଳକ ଯୋଜନା ପହଞ୍ଚାଇବା ପାଇଁ ଏହି ଅଭିଯାନରେ ଗୁରୁତ୍ୱ ଦିଆଯାଉଛି। ଏଥିରେ ବ୍ଲକର ୨୪ ପଞ୍ଚାୟତର ୧୨୬ ଖଣ୍ଡ ଗ୍ରାମକୁ ଅନ୍ତର୍ଭୁକ୍ତ କରାଯାଇଛି। ଏହି ଗ୍ରାମଗୁଡ଼ିକରେ ସ୍ବାସ୍ଥ୍ୟ ଶିବିର, ଆଧାର କାର୍ଡ ଅପଡେଟ ଏବଂ ଜନଶୁଣାଣି ଭଳି କାର୍ଯ୍ୟକ୍ରମ ଜାରି ରହିଛି। ଏହି ପରିପ୍ରେକ୍ଷୀରେ ସଦର ପଞ୍ଚାୟତ କାର୍ଯ୍ୟାଳୟଠାରେ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଏଥିରେ ପିଇଓ ଟଙ୍କଧର ସାହୁ, ସରପଞ୍ଚ ବିଜୟା ମାଝୀ, ସମସ୍ତ ୱାର୍ଡମେମ୍ବର, ଗାଁ ସାଥୀ ଓ ସ୍ଥାନୀୟ ଜନସାଧାରଣ ଉପସ୍ଥିତ ଥିଲେ। ଡେଙ୍ଗଫାର୍ସି, ତାଙ୍ଗରି, ସେମେଲପଦର୍, ଖମାର୍ପଦର୍, କନର୍ଫସ, ଧାମନଗୁଡ଼ା, ଫଟକିମଲହୁଲ, ମେଲଘରା, ବଡ଼ ଛତ୍ରଙ୍ଗ, ଡୁମେରପଦର୍, ଗୋପାଳପୁର, ଗୋପୀନାଥପୁର, ତଲଝାପି, ବଳଙ୍ଗି, ଢୋଲଫାସ ଆଦି ଗ୍ରାମଗୁଡ଼ିକରେ ସଫଳତାର ସହ କାର୍ଯ୍ୟକ୍ରମ ସମ୍ପନ୍ନ ହୋଇସାରିଥିବା ବେଳେ ଆଗାମୀ ଦିନରେ ବ୍ଲକର ଅବଶିଷ୍ଟ ପଞ୍ଚାୟତ ଓ ଗ୍ରାମଗୁଡ଼ିକରେ ଏହି ଅଭିଯାନ ଜାରି ରହିବ ବୋଲି ପ୍ରଶାସନ ପକ୍ଷରୁ ସୂଚନା ମିଳିଛି।
