କାରାକାସ,୬।୮(ଏପି): ଦକ୍ଷିଣ ଆମେରିକୀୟ ଫୁଟବଲ ପାଓ୍ବାର ହାଉସ୍ ଭେନେଜଏଲାର ଫୁଟବଲ ଫେଡେରେଶନ ଅଧ୍ୟକ୍ଷ ଜେସସ୍ ବେରାର୍ଡିନେଲିଙ୍କ ବୁଧବାର ପରଲୋକ ହୋଇଛି। ସେ ହଠାତ୍ ଅଚେତ୍ ହୋଇପଡିଥିଲେ ଓ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏହାର ଠିକ୍ ଦୁଇ ସପ୍ତାହପରେ ସେ ମୃତ୍ୟୁବରଣ କରିଛନ୍ତି। ଅବସ୍ୟ ତାଙ୍କର ଏକାଧିକ ସ୍ବାସ୍ଥ୍ୟଗତ ସମସ୍ୟା ରହିଥିଲା ବୋଲି ଭେନେଜୁଏଲା ଫୁଟବଲ ଫେଡେରେଶନ ତରଫରୁ କୁହାଯାଇଛି। ମୃତ୍ୟୁ ବେଳକୁ ତାଙ୍କୁ ୬୧ ବର୍ଷ ହୋଇଥିଲା।
ତାଙ୍କ ବରୋଧରେ ସର୍ବସାଧାରଣ ଲୋକଙ୍କ ଅର୍ଥ ତୋଷାରପାତ କରିବାର ଅଭିଯୋଗ ମଧ୍ୟ ଆସିଥିଲା। ଗତ ଜୁଲାଇ ୨୨ ତାରିଖରେ ତାଙ୍କ କାରାକାସ ହସ୍ପିଟାଲରେ ଭର୍ତ୍ତି କରାଯାଇଥିଲା। ନିଃଶ୍ୱାସ ନେବାରେ ତାଙ୍କର ସମସ୍ୟା ଥିଲା। ଫଳରେ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା। ତେବେ ମୃତ୍ୟୁର କାରଣ ସମ୍ପର୍କରେ ଫେଡେରେଶନ କିଛି ସୂଚନା ଦେଇନାହିଁ। କୋଭିଡ୍-୧୯ ମହାମାରୀର ପ୍ରକୋପ ସାରା ବିଶ୍ୱରେ ଜାରି ରହିଥିବା ବେଳେ ବେରାର୍ଡିନେଲ ଦକ୍ଷିଣ ଆମେରିକାର ଦ୍ୱିତୀୟ ହାଇପ୍ରୋଫାଇଲ୍ ଫୁଟବଲ ପ୍ରସାଶକ ଭାବେ ମୃତ୍ୟୁବରଣ କରିଛନ୍ତି। ପୂର୍ବରୁ ବଲିଭିଆ ଫୁଟବଲ ଫେଡେରେଶନ ମୁଖଞ ସିଜର ସାଲିନାସ୍ ଗତ ଜୁଲାଇ ୧୯ ତାରିଖରେ କରୋନ ଭାଇରସ ସଂକ୍ରମଣ କାରଣରୁ ମୃତ୍ୟୁବରଣ କରିଥିଲେ।
୨୦୧୫ରୁ ଅଧ୍ୟକ୍ଷ ପଦରେ ଥିବା ଲାଉରିଆନୋ ଗୋଞ୍ଜାଲେଜ୍ ଇସ୍ତଫା ଦେବାପରେ ବେରାର୍ଡିନେଲ ଦାୟିତ୍ୱ ଗ୍ରହଣ କରିଥିଲେ। ଭେନେଜୁଏଲା ଫୁଟବଲ ଫେଡେରେଶନର ଡେପୁଟି ଥିବା ବେଳେ ସେ ଅର୍ଥ ତୋଷାରପାତ କରିଥିବାର ଅଭିଯୋଗ ଆସିଥିଲା। ତେବେ ଏହି ମାମଲାରେ ଫେଡେରେଶନ ବେରାର୍ଡିନେଲଙ୍କୁ ସମର୍ଥନ କରିଛି ଓ ଆସିଥିବା ସବୁ ଅଭିଯୋଗ ଭିତ୍ତିହୀନ ବୋଲି କହିଛି।
