ଖଣ୍ଡପଡ଼ା,୯ା୨(ସ୍ବ.ପ୍ର.): ଖଣ୍ଡପଡ଼ା ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିବା ଖଳିସାହି ଠାରୁ ସମ୍ବରବିନ୍ଧା ଭାୟା ସିଂଘାପଡ଼ା ତଥା ସିଂଘାପଡ଼ା-ସମ୍ବରବିନ୍ଧା ରାସ୍ତାର ଦୁରାବସ୍ଥାକୁ ନେଇ ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିଛନ୍ତି । ଉକ୍ତ ରାସ୍ତାର ଉନ୍ନତିକରଣ ନିମନ୍ତେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ଦେଢ କୋଟି ଟଙ୍କା ଅନୁଦାନ ମଞ୍ଜୁର ହୋଇଥିଲା । ପ୍ରାୟ ୩ ମାସ ତଳୁ ଠିକାଦାର ରାସ୍ତାର ଉନ୍ନତିକରଣ କାମ ଆରମ୍ଭ କରିଥିଲେ । ରାସ୍ତା ଉପରୁ ପିଚୁ ତଡାଯାଇ ମେଟାଲ ଓ କ୍ରସର ଡଷ୍ଟ ବିଛାଯାଇଛି । ତେବେ ପରବର୍ତ୍ତୀ କାମ କରା ନ ଯାଇ ଦୀର୍ଘ ୩ ମାସ ହେଲା କାମ ବନ୍ଦ ରହିଛି । ଉକ୍ତ ରାସ୍ତା ଉପରେ ବିଭିନ୍ନ ଯାନବାହନ ଚଳାଚଳ କରିବା ଯୋଗୁ ପଡିଥିବା ମେଟାଲ ଓ ଡଷ୍ଟ ଆଉ ସମତଳ ଅବସ୍ଥାରେ ନାହିଁ । ଡଷ୍ଟ ଉଡ଼ି ଗମନାଗମନରେ ସମସ୍ୟା ସୃଷ୍ଟି କରୁଛି । ଏଥିପାଇଁ ସ୍ଥାନୀୟ ଜନସାଧାରଣ ଅତିଷ୍ଟ ହୋଇପଡୁଛନ୍ତି । ରାସ୍ତା ପାର୍ଶ୍ୱରେ ସ୍ଥାୟୀ ବାସଗୃହ ନିର୍ମାଣ କରି ରହୁଥିବା ଲୋକମାନେ ଅସୁବିଧାର ସମ୍ମୁଖୀନ ହେଉଛନ୍ତି ।
ସ୍ଥାନୀୟ ଅଞ୍ଚଳର ସୁବାସ ଚନ୍ଦ୍ର ପାଣିଗ୍ରାହୀ, ଆନନ୍ଦ ଚନ୍ଦ୍ର ସାହୁ, କାଳନ୍ଦୀ ଚରଣ ପଣ୍ଡା, ଗୋବର୍ଦ୍ଧନ ସ୍ବାଇଁଙ୍କ ସମେତ ଅନେକ ବ୍ୟକ୍ତି ନିଜ ପ୍ରତିକ୍ରିୟାରେ କହିଛନ୍ତି, ପୂର୍ବରୁ ରାସ୍ତା ଖରାପ ରହିଥିଲେ ମଧ୍ୟ ଲୋକେ ସାଇକେଲ, କିମ୍ବା ବିଭିନ୍ନ ଯାନବାହନରେ ସତର୍କତାର ସହିତ ଯାତାୟତ କରିପାରୁଥିଲେ । ପରେ ଉକ୍ତ ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ସାମିଲ କରାଯାଇଥିବା ଜାଣି ଅଞ୍ଚଳବାସୀ ଖୁସି ହୋଇଥିଲେ । ମାତ୍ର ନିଯୁକ୍ତ ଠିକାଦାରଙ୍କ ଏଭଳି କାର୍ଯ୍ୟ ଶୈଳୀ ଅଞ୍ଚଳବାସୀଙ୍କ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି । ଏ ସମ୍ପର୍କରେ ଖଣ୍ଡପଡ଼ା ଗ୍ରାମ୍ୟ ଉନ୍ନୟନ ବିଭାଗ କର୍ତ୍ତୃପକ୍ଷଙ୍କ ସହ ୫-ଟି ସଚିବଙ୍କ ଦୃଷ୍ଟି ଆକର୍ଷଣ କରାଯିବ ପରେ ବି କୌଣସି ସୁଫଳ ମିଳୁ ନ ଥିବା ସେମାନେ ଅଭିଯୋଗ କରିଛନ୍ତି । ନୟାଗଡ଼ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀ ଜୟନ୍ତୀ ପଣ୍ଡାଙ୍କ ସହ ଯୋଗାଯୋଗ କରିବାରେ ଠିକାଦାର ରାସ୍ତାକୁ ତାଡି ଅଧାପନ୍ତରିଆ ଭାବେ କାମ ବନ୍ଦ କରି ଦେଇଛନ୍ତି । ତାଙ୍କୁ କାମ ସମ୍ପନ୍ନ କରିବାକୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁନି। ଇତିମଧ୍ୟରେ କାର୍ଯ୍ୟ ସମ୍ପାଦନ କରିବାର ସମୟ ସୀମା ଶେଷ ହୋଇଗଲାଣି। ମାର୍ଚ୍ଚ ଶେଷ ସୁଦ୍ଧା କାମ ଶେଷ ହେବ ବୋଲି ସହକାରୀ ଯନ୍ତ୍ରୀ ଇଂ.ପଣ୍ଡା ପ୍ରକାଶ କରିଛନ୍ତି । ସୂଚନାଯୋଗ୍ୟ, ଉକ୍ତ ରାସ୍ତା କାମ ୨୦୨୨ ଜାନୁୟାରୀ ୩ ରୁ ଆରମ୍ଭ ହୋଇ ୨୦୨୨ ଅକ୍ଟୋବର୨ରେ ଶେଷ ହେବ ବୋଲି ସମୟ ଧାର୍ଯ୍ୟ କରାଯାଇଥିଲା।
