ନୂଆଦିଲ୍ଲୀ, ୩୦।୧୨: ସମସ୍ତ ରାଜନୈତିକ ଦଳ କରୋନା ମାର୍ଗଦର୍ଶିକା ପାଳନ ସହିତ ଠିକ୍ ସମୟରେ ରାଜ୍ୟରେ ବିଧାନସଭା ନିର୍ବାଚନ ଚାହୁଁଛନ୍ତିି ବୋଲି ନିର୍ବାଚନ କମିଶନଙ୍କ ପକ୍ଷରୁ କୁହାଯାଇଛି। ଏସମ୍ପର୍କରେ ମୁଖ୍ୟ ନିର୍ବାଚନ କମିଶନର(ଇସି) ସୁଶୀଲ ଚନ୍ଦ୍ରା ଗୁରୁବାର ସୂଚନା ଦେଇଛନ୍ତି। ଆସନ୍ତା ବର୍ଷ ଉତ୍ତରପ୍ରଦେଶ, ମଣିପୁର, ପଞ୍ଜାବ, ଉତ୍ତରାଖଣ୍ଡ ଏବଂ ଗୋଆ ଆଦି ୫ଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ସମ୍ପର୍କରେ ସୂଚନା ଦେଇ ସେ ଏଭଳି କହିଛନ୍ତି।
ଚନ୍ଦ୍ରା ଏକ ଗଣମାଧ୍ୟମ ସମ୍ମିଳନୀରେ କହିଛନ୍ତି ଯେ, ସମ୍ପୃକ୍ତ ରାଜ୍ୟ ଗସ୍ତ ସମୟରେ ଆମେ ପ୍ରଶାସନ, ପୋଲିସ ଏବଂ ବିଭିନ୍ନ ରାଜନୈତିକ ଦଳର ନେତାଙ୍କୁ ଭେଟିଛୁ। ସେମାନେ ଠିକ୍ ସମୟରେ ନିର୍ବାଚନ ସମ୍ପର୍କରେ କହିଛନ୍ତି। ତେବେ ବର୍ତ୍ତମାନର ମହାମାରୀ ସଂକ୍ରମଣ ସ୍ଥିତିରେ ନିର୍ବାଚନ ରାଲିକୁ ନେଇ କେତେକ ରାଜନୈତିକ ଦଳ ଚିନ୍ତା ବ୍ୟକ୍ତ କରିଥିବା ସେ ପ୍ରକାଶ କରିଛନ୍ତି। ଅଧିକରୁ ଅଧିକ ଲୋକ କିପରି ନିର୍ବାଚନ ପ୍ରକ୍ରିୟାରେ ଅଂଶଗ୍ରହଣ କରିପାରିବେ ସେନେଇ ଆମେ ପ୍ରୟାସ କରୁଛୁ। ସେହିପରି ଦିବ୍ୟାଙ୍ଗମାନଙ୍କ କ୍ଷେତ୍ରରେ ଘରେ ଭୋଟିଂ ସୁବିଧା ପହଞ୍ଚାଇବା ଆମର ଲକ୍ଷ୍ୟ ବୋଲି ସେ କହିଛନ୍ତି।
ତେବେ ନିର୍ବାଚନ ତାରିଖ ଘୋଷଣା ୨୦୨୨ ଜାନୁୟାରୀ ୫ ପରେ କରାଯିବା ନେଇ ସେ ସୂଚନା ଦେଇଛନ୍ତି। ଜାନୁୟାରୀ ୫ରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ କରାଯିବ। ସମ୍ପ୍ରତି ୧୫ କୋଟି ଭୋଟରରୁ ଅଧିକ ଭୋଟର ପଞ୍ଜିକୃତ ହୋଇଛନ୍ତି। ସେହିପରି ମତଦାନ ସମୟ ସୀମା ଘଣ୍ଟାଏ ବୃଦ୍ଧି କରାଯିବ। ପୂର୍ବାହ୍ନ ୮ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ମତଦାନ ଜାରି ରହିବ ବୋଲି ସେ କହିଛନ୍ତି। ମତଦାନ କେନ୍ଦ୍ରରେ କରୋନା ସଂକ୍ରମଣ ସୁରକ୍ଷା ବ୍ୟବସ୍ଥା କରାଯିବ। ସେହିପରି ୩ ବର୍ଷ ଧରି କାର୍ଯ୍ୟ କରୁଥିବା କର୍ମଚାରୀଙ୍କ ବଦଳି କରାଯିବ।
ପୂର୍ବରୁ ୧୫୦୦ ଭୋଟରଙ୍କ ପାଇଁ ଗୋଟିଏ ବୁଥ୍ କରାଯାଇଥିବାବେଳେ ଏବେ ୧୨୫୦ ଭୋଟରଙ୍କ ପାଇଁ ଗୋଟିଏ ବୁଥ୍ କରାଯିବ। ଫଳରେ ବୁଥ୍ ସଂଖ୍ୟା ୧୧ ହଜାର ବୃଦ୍ଧି ପାଇବ। ୮୦୦ ମତଦାନ କେନ୍ଦ୍ରରେ କେବଳ ମହିଳା କର୍ମଚାରୀ ରହିବେ । ନିର୍ବାଚନରେ ସମସ୍ୟା ଉପୁଜିଲେ ଲୋକେ ସି-ଭିଜଲି ଆପ୍ ଦ୍ୱାରା ଏହାର ଅଭିଯୋଗ କରି ପାରିବେ ବୋଲି ଇସି କହିଛନ୍ତି।
