ଜୟପୁର,୧୭।୭: ରାଜସ୍ଥାନରେ ଚାଲିଥିବା ରାଜନୈତିକ ଡ୍ରାମା ମଧ୍ୟରେ ଅଶୋକ ଗେହଲୋଟ ସରକାରଙ୍କୁ ଭାଙ୍ଗିବାକୁ ନେଇ ଏବେ ଏକ ଅଡ଼ିଓ ଟେପ୍ ଭାଇରାଲ ହେବାରେ ଲାଗିଛି। ଯାହାକୁ ନେଇ ଅଶୋକ ଗେହଲୋଟ ଓ ସଚିନ ପାଇଲଟଙ୍କ ମଧ୍ୟରେ କଳି ଚରମ ସୀମାରେ ପହଞ୍ଚିଛି। ଏହି ମାମଲାରେ ରାଜସ୍ଥାନ ପୋଲିସର ସ୍ପେଶାଲ ଅପରେଶନ୍ ଗ୍ରୁପ (ଏସ୍ଓଜି) ଶୁକ୍ରବାର ଜୟପୁରର ହୋଟେଲ ବ୍ୟବସାୟୀ ସଞ୍ଜୟ ଜୈନଙ୍କୁ ଗିରଫ କରିଛି। ଘୋଡା ବ୍ୟାପାରରେ ସଞ୍ଜୟଙ୍କ ସହାୟତାରେ ଜଣେ କଂଗ୍ରେସ ବିଧାୟକଙ୍କ ସହ ଯୋଗାଯୋଗ କରାଯାଇଥିଲା ବୋଲି ଅଭିଯୋଗ ହୋଇଛି। ସଞ୍ଜୟଙ୍କୁ ଗିରଫ କରାଯିବା ପରେ ଭାଜପାର ବରିଷ୍ଠ ନେତା ମାଣିକ ଚାନ୍ଦ ସୁରନା ଏନେଇ ସ୍ପଷ୍ଟୀକରଣ ରଖିଛନ୍ତି। ସୁରନାଙ୍କ ପକ୍ଷରୁ ସୁରେନ୍ଦ୍ର ସିଂ ଶେଖାଓ୍ବତ କହିଛନ୍ତି, ସଞ୍ଜୟଙ୍କ ସହ ପୂର୍ବତନ ଅର୍ଥମନ୍ତ୍ରୀଙ୍କ କୌଣସି ସମ୍ପର୍କ ନାହିଁ। ସଞ୍ଜୟଙ୍କ ସହ ତାଙ୍କ ସମ୍ପର୍କକୁ ନେଇ ହେଉଥିବା ଚର୍ଚ୍ଚା ଏକ ଗୁଜବ ବୋଲି ସେ ସ୍ପଷ୍ଟ କରିଛନ୍ତି। ସୂଚନାଯୋଗ୍ୟ, ଗୁରୁବାର କଂଗ୍ରେସ ଏକ ଅଡ଼ିଓ ଟେପ୍ ପ୍ରକାଶ କରିବା ପରେ କଂଗ୍ରେସ ନେତା ମହେଶ ଶର୍ମା, ସଞ୍ଜୟ ଜୈନ ଓ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତଙ୍କ ବିରୋଧରେ ଏତଲା ରୁଜୁ କରାଯାଇଛି।
