ବୌଦ୍ଧ, ୨୬ା୧୧(ସ୍ବ.ପ୍ର.): ଲାଞ୍ଚ ନେଇ ଗିରଫ ହେଲେ ପୋଲିସ ଏଏସ୍ଆଇ। ବୌଦ୍ଧ ଜିଲା ବୌଦ୍ଧ ଥାନା ଅଧୀନ ଜହ୍ନାପଙ୍କ ଫାଣ୍ଡି ଏଏସ୍ଆଇ ମଦନ ମୋହନ ପ୍ରଧାନ ଶୁକ୍ରବାର ଜଣେ ବ୍ୟବସାୟୀଙ୍କଠାରୁ ୧୫ ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି।
ସୂଚନା ଅନୁସାରେ, ବୌଦ୍ଧ ସହର ନୂଆଁସାହି ଛକଠାରେ ସ୍ବପ୍ନେଶ୍ୱର ଖୁଣ୍ଟିଆଙ୍କ ବୈଜନ୍ତୀ ଏଗ୍ରୋମେଶିନାରି ନାମକ ଏକ ଦୋକାନ ରହିଛି। ଏହି ଦୋକାନରେ ବୌଦ୍ଧ ଥାନା ଅନ୍ତର୍ଗତ ରାୟପୁର ଗ୍ରାମର ମନୋଜ ପ୍ରଧାନ ସେଲ୍ସ ଓ କଲେକ୍ସନ ଦାୟିତ୍ୱ ବୁଝୁଥିଲେ। ଗତ ତିନି ମାସ ତଳେ ମନୋଜ କଲେକ୍ସନରୁ ତିନି ଲକ୍ଷ ଟଙ୍କା ନେଇଯାଇଥିଲେ। ଏନେଇ ଦୋକାନ ମାଲିକ ବୌଦ୍ଧ ଥାନାରେ ଗତ ଅଗଷ୍ଟରେ ମନୋଜ ନାମରେ ଏକ ଏତଲା ଦେଇଥିଲେ। ହେଲେ ବୌଦ୍ଧ ଥାନା ଏତଲାକୁ ଗ୍ରହଣ କରି ନ ଥିଲା। ଏହା ଆମର କାମ ନୁହେଁ, ଏହା କୋର୍ଟର କାମ ବୋଲି କହି ଫେରାଇ ଦେଇଥିଲା। ଶେଷରେ ବାଧ୍ୟହୋଇ ଖୁଣ୍ଟିଆ ଅଗଷ୍ଟ ୨୯ରେ ବୌଦ୍ଧ ଏସ୍ଡିଜେଏମ୍ କୋର୍ଟର ଆଶ୍ରୟ ନେଇଥିଲେ। କୋର୍ଟ ନିର୍ଦ୍ଦେଶରେ ବୌଦ୍ଧ ଥାନାରେ ଅକ୍ଟୋବର ୧୬ରେ ଏକ ମାମଲା ରୁଜୁକଲା ପୋଲିସ। ଏହି ମାମଲାର ତଦନ୍ତ ଦାୟିତ୍ୱ ଜହ୍ନାପଙ୍କ ଫାଣ୍ଡି ଏଏସ୍ଆଇ ମଦନ ମୋହନ ପ୍ରଧାନଙ୍କୁ ଦିଆଯାଇଥିଲା। ଫାଣ୍ଡି ଅଧିକାରୀ ପ୍ରଧାନ ଦୋକାନ ମାଲିକଙ୍କୁ ଡାକି ୧୫ ହଜାର ଟଙ୍କା ଦେବାକୁ କହିଥିଲେ; ନ ଦେଲେ ମାମଲାକୁ ରଫାଦଫା କରିଦେବାକୁ କହୁଥିଲେ। ଗତ ୨୪ ତାରିଖରେ ଏଏସ୍ଆଇ ପ୍ରଧାନ ଖୁଣ୍ଟିଆଙ୍କୁ ଜହ୍ନାପଙ୍କ ଫାଣ୍ଡିକୁ ଡାକିଥିଲେ। ଶୁକ୍ରବାର ୧୫ ହଜାର ଟଙ୍କା ଦେବାକୁ ଦୋକାନ ମାଲିକ କହିଥିଲେ। ଖୁଣ୍ଟିଆ ଏନେଇ ବ୍ରହ୍ମପୁର ଭିଜିଲାନ୍ସ ଏସ୍ପିଙ୍କୁ ଯୋଗାଯୋଗ କରିଥିଲେ। ପୂର୍ବ ଯୋଜନା ମୁତାବକ, ଶୁକ୍ରବାର ଅପରାହ୍ନ ପ୍ରାୟ ୩ଟା ୧୫ରେ ଜହ୍ନାପଙ୍କ ଫାଣ୍ଡିରେ ଦୋକାନ ମାଲିକଙ୍କ ଠାରୁ ଏଏସ୍ଆଇ ପ୍ରଧାନ ୧୫ ହଜାର ଟଙ୍କା ନେଇ ତାଙ୍କ ଟେବୁଲ ଡ୍ର’ରେ ରଖୁଥିବା ସମୟରେ ଭିଜିଲାନ୍ସ ଟିମ୍ ହାତରେ ଧରାପଡ଼ିଥିଲେ। ଭିଜିଲାନ୍ସ ପକ୍ଷରୁ ଏକ ମାମଲା (ନଂ.୨୭ା୨୨) ରୁଜୁ କରାଯାଇ ଏଏସ୍ଆଇ ପ୍ରଧାନଙ୍କୁ ଗିରଫ କରି ବୌଦ୍ଧ ଭିଜିଲାନ୍ସ କାର୍ଯ୍ୟାଳୟକୁ ନିଆଯାଇଛି। ଶନିବାର ତାଙ୍କୁ ଫୁଲବାଣୀ ଭିଜିଲାନ୍ସ କୋର୍ଟକୁ ଚାଲାଣ କରାଯିବ। ଏଏସ୍ଆଇ ପ୍ରଧାନଙ୍କ ଘର କନ୍ଧମାଳ ଜିଲା ଉଦୟଗିରିର ବାଲୁପଟା ଗ୍ରାମ ହୋଇଥିବାବେଳେ ବର୍ତ୍ତମାନ ସେ ବୌଦ୍ଧ ସହର ଟିକଟସ୍ଥ ମାଲସିଙ୍ଗାଠାରେ ରହୁଛନ୍ତି। ତାଙ୍କ ଘରେ ମଧ୍ୟ ଛାନ୍ଭିନ୍ ଚାଲୁ ରହିଥିବା ଭିଜିଲାନ୍ସ ଡିଏସ୍ପି ଅରୁଣ କୁମାର ନାୟକ ପ୍ରକାଶ କରିଛନ୍ତି। ଚଢ଼ାଉରେ ଡିଏସ୍ପି ନାୟକଙ୍କ ସମେତ ବୌଦ୍ଧ ଭିଜିଲାନ୍ସ ଇନ୍ସପେକ୍ଟର ଜଗବନ୍ଧୁ ଅଙ୍ଗାରିଆ, ବ୍ରହ୍ମପୁର ଭିଜିଲାନ୍ସ ଇନ୍ସପେକ୍ଟର ପ୍ରଫୁଲ୍ଲ ପ୍ରଧାନ, ପ୍ରତାପ ଶତପଥୀ, ଦିଲୀପ ଦାଶ, ଲୋକନାଥ ସାହୁ, ସନ୍ତୋଷ ସାହୁ ପ୍ରମୁଖ ସାମିଲ ଥିଲେ।
