ନୂଆଦିଲ୍ଲୀ,୨ ।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ସ୍ୱଦେଶୀ ବିମାନ ବାହକ ଯୁଦ୍ଧଜାହାଜ ଆଇଏନଏସ ବିକ୍ରାନ୍ତକୁ ନୌସେନାକୁ ସମର୍ପଣ କରିବେ । ଶୁକ୍ରବାର ସକାଳ ୯ଟା ୩୦ମିନିଟରେ କୋଚିରେ କୋଚିନ ଶିପୟାଡ ଲିମିଟେଡ ଏହି ଯୁଦ୍ଧ ଜାହାଜକୁ ନୌସେନାରେ ସାମିଲ କରିବ । ଆଇଏନଏସ ବିକ୍ରାନ୍ତର ବିଶେଷତ୍ୱ ହେଉଛି ଏହା ହେଉଛି ଏକ ସ୍ୱଦେଶୀ ଯୁଦ୍ଧ ଜାହାଜ । ଏହାର ନିର୍ମାଣ କାର୍ଯ୍ୟ ୨୦୦୯ରେ ଆରମ୍ଭ କରାଯାଇଥିଲା । ଦୀର୍ଘ ୧୩ ବର୍ଷ ପରେ ଏବେ ଏହା ନୌସେନାରେ ସାମିଲ ହେବାକୁ ଯାଉଛି । ଏହାସହ ପ୍ରଧାନମନ୍ତ୍ରୀ ନୌସେନାର ନୂଆ ଚିହ୍ନର ବି ଲୋକାର୍ପଣ କରିବେ । ନୌସେନାର ନୂଆ ଚିହ୍ନ ଔପନିବେଶିକ ଅତୀତଠାରୁ ଦୂରରେ ରହିବ ଓ ଭାରତୀୟ ମୈରିଟାଇମ ହେରିଟେଜର ପରିପୂର୍ଣ୍ଣ ହେବ ।
ସୂଚନାଯୋଗ୍ୟ, ଆଇଏନଏସ ବିକ୍ରାନ୍ତର ଓଜନ ୪୫୦୦୦ଟନ । ଅର୍ଥାତ୍ ଫ୍ରାନ୍ସରେ ଥିବା ଏଫିଲ ଟାୱାରର ଓଜନଠାରୁ ୪ ଗୁଣା ଅଧିକ ଲୁହା ଓ ଷ୍ଟିଲ ଏଥିରେ ଲାଗିଛି । ଏହାର ଲମ୍ବ ୨୬୨ ମିଟର ଓ ଚଉଡା ୬୨ ମିଟର । ଅର୍ଥାତ୍ ଏହା ଦୁଇଟି ଫୁଟବଲ ପଡିଆ ସହ ସମାନ ହେବ । ପ୍ରଥମ ସ୍ୱେଦେଶୀ ଯୁଦ୍ଧ ଜାହାଜରେ ୭୬ ପ୍ରତିଶତ ସ୍ୱେଦେଶୀ ଉପକରଣ ଲାଗିଛି । ଏଥିରେ ୪୫୦ କିଲୋମିଟର ପର୍ଯ୍ୟନ୍ତ ଲକ୍ଷ୍ୟ ଭେଦ କଲାଭଳି ବ୍ରହ୍ମୋସ ମିଶାଇଲ ବି ରହିବ । ଏଥିରେ ୨୪୦୦ କିଲୋମିଟର କେବଲ ଲାଗିଛି ଅର୍ଥାତ କୋଚିରୁ ଦିଲ୍ଲୀ ପର୍ଯ୍ୟନ୍ତ ଲମ୍ବି ପାରିବ ଏହି କେବଲ ।
ଆଇଏସି ବିକ୍ରାନ୍ତ(ଇଣ୍ଡିଜେନିଅସ ଏୟାରକ୍ରାପ୍ଟ କ୍ୟାରିୟର)ରେ ୩୦ଟି ବିମାନ ଏକାଥରେ ରହିପାରିବେ । ଏହା ବ୍ୟତୀତ ଏଥିରେ ମିଗ ୨୯କେ ଫାଇଟର ଜେଟ ବି ଉଡିବା ସହ ଏଣ୍ଟି-ଏୟାର, ଆଣ୍ଟି-ସରଫେସ ଓ ଲ୍ୟାଣ୍ଡ ଆଟାକରେ ସାମିଲ ହୋଇପାରିବ । ଏଥିରୁ କାମେଭ ୩୧ ହେଲିକପ୍ଟର ବି ଟେକଅପ ନେଇପାରିବ । ବିକ୍ରାନ୍ତ ନୌସେନାରେ ସାମିଲ ହେବା ପରେ ଏବେ ଭାରତ ସେହିସବୁ ଦେଶ ସହ ସମକକ୍ଷ ହୋଇପାରିବ ଯେଉଁମାନେ ସ୍ୱେଦେଶୀ ବିମାନ ବାହକ ଜାହାଜକୁ ନିର୍ମାଣ ଓ ଡିଜାଇନ କରିବାର କ୍ଷମତା ରଖିଛନ୍ତି ।
