ପାରଳାଖେମୁଣ୍ଡି,୨୫ା୮ (ଡି.ଏନ୍.ଏ): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ସହରରେ କଞ୍ଚା ମାଟିରେ ତିଆରି ମୂର୍ତ୍ତୀ ବ୍ୟବସାୟ କ୍ରମଶଃ କମୁଥିବାବେଳେ ପ୍ଲାଷ୍ଟର ପ୍ୟାରିସ ମୂର୍ତ୍ତି ଚାହିଦା ବୃଦ୍ଧି ପାଉଥିବା ଦେଖିବାକୁ ମିଳୁଛି । ପୂଜାପାର୍ବଣ ଋତୁ ଆସିଲେ କାରିଗରମାନେ ମାଟି ସଂଗ୍ରହ କରି ମୂର୍ତ୍ତି ପ୍ରସ୍ତୁତ କରୁଥିବା ବେଳେ ବଜାରରେ ପହଞ୍ଚତ୍ୟାଉଛି ଆକର୍ଷଣୀୟ ପ୍ଲାଷ୍ଟର ପ୍ୟାରିସ ମୂର୍ତ୍ତି। ତେଣୁ ମାଟି କାରିଗରମାନେ ଚିନ୍ତିତ ହୋଇପଡିଛନ୍ତି। ସେମାନଙ୍କର କୌଳିକ ବୃତ୍ତିକୁ ନେଇ ଚିନ୍ତାରେ ପଡ଼ୁଛନ୍ତି। ଆଉମାତ୍ର କେଇ ଦିନ ପରେ ଗଣେଶ ପୂଜା ରହିଛି । କାରିଗର ଭଲ କିସମର ମାଟି ସଂଗ୍ରହକରି ସେଥିରେ ପାଳ, ଛଣ ବିଡାରେ ମାଟି ଓ କନା ଉପରେ ଲେପଦେଇ ବିଭିନ୍ନ ରଙ୍ଗର ପୂର୍ଣ୍ଣାଙ୍ଗ ମୂର୍ତ୍ତି କରିବା ପାଇଁ ପ୍ରାୟ ୩ରୁ୪ ଦିନ ଲାଗିଯାଉଛି। ଗୋଟିଏ ମାଟି ମୂର୍ତ୍ତି ପିଛା ୩ଶହରୁ ୫ଶହ ଟଙ୍କା ପାରିଶ୍ରମିକ ମିଳୁଥିବାବେଳେ ପ୍ଲାଷ୍ଟର ପ୍ୟାରିସ ମୂର୍ତ୍ତି ବ୍ୟବସାୟୀମାନେ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି। ସହରର କଟିକାସାହି ଓ ଚିତ୍ରକାର ସାହିରେ ପ୍ରାୟ ୨୦ରୁ ଊର୍ଦ୍ଧ୍ୱ ପରିବାର ସେମାନଙ୍କ ପୂର୍ବ ପୁରୁଷର ପାରମ୍ପରିକ କୌଳିକ ବୃତ୍ତିକୁ ଆପଣାଇ ଏହି ବ୍ୟବସାୟ କରୁଛନ୍ତି । ଯେତିକି ଖର୍ଚ୍ଚ ହେଉଛି ତାର ପାରିଶ୍ରମିକ ଠିକ ଭାବେ ମିଳିପାରୁ ନାହିଁ । ହେଲେ ନିଜର କୌଳିକ ବୃତ୍ତିକୁ ନଛାଡି ଦିନ ରାତି ଏକକରି କାର୍ଯ୍ୟ କରୁଛନ୍ତି । ଏହି ମାଟି ମୂର୍ତ୍ତି କରୁଥିବା କାରିଗରଙ୍କୁ ସରକାରଙ୍କ ପକ୍ଷରୁ ଅଧିକ ପ୍ରୋତ୍ସାହନ ନମିଳିଲେ ଏହି ମାଟି ତିଆରି ମୂର୍ତ୍ତି ସମ୍ପୂର୍ଣ୍ଣ ଲୋପ ପାଇଯିବ ବୋଲି ମାଟି କାରିଗରମାନେ କହିଛନ୍ତି।
