ପାରାଦୀପ,୬ା୧(ସ୍ବ.ପ୍ର.): ପାରାଦୀପ ମଧୁବନ ପୌର କଲ୍ୟାଣମଣ୍ଡପଠାରେ ବୁଧବାର ଏସାର୍ ମିନ୍ମେଟ୍ ଲିମିଟେଡ କମ୍ପାନୀର ବାର୍ଷିକ ୧୪ ମିଲିୟନ ମେଟ୍ରିକ ଟନ୍ ଉତ୍ପାଦନ କ୍ଷମତାବିଶିଷ୍ଟ ପେଲେଟ ପ୍ଲାଣ୍ଟ ପାଇଁ ଜନଶୁଣାଣି କରାଯାଇଥିଲା। ଏଥିରେ ଅଧ୍ୟକ୍ଷତା କରିଥିଲେ ଅତିରିକ୍ତ ଜିଲାପାଳ କାହ୍ନୁଚରଣ ଧୀର ଓ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଦିଲୀପ କୁମାର ଦାସ। ଏଥିରେ ପାରାଦୀପ ପୌରାଞ୍ଚଳ ଓ ପାଶର୍ବବର୍ତ୍ତୀ ପଞ୍ଚାୟତ ଲୋକେ ମତ ରଖିଥିଲେ। ସେଥିରୁ ପ୍ରାୟ ୯୦ ପ୍ରତିଶତ ଲୋକ କାରଖାନା ସ୍ଥାପନ ବିରୋଧରେ ମତ ଦେଇଥିଲେ। ବିଶେଷକରି ପ୍ରସ୍ତାବିତ କମ୍ପାନୀ ସଂଲଗ୍ନ ବସ୍ତି ବାଉରିଆପାଳନ୍ଦା ଓ ବାଲିଝରା ଲୋକେ ତୀବ୍ର ବିରୋଧ କରିଥିଲେ। ବାଉରିଆପାଳନ୍ଦା ବସ୍ତିର ଜ୍ୟୋତିଷ ଦାସ କହିଥିଲେ, ଉକ୍ତ ବସ୍ତିର ଚତୁଃପାଶର୍ବରେ ୪ଟି ଟର୍ମିନାଲ ଓ ଦୁଇଟି କାରଖାନା ଅଛି। ଉକ୍ତ କାରଖାନା ଯୋଗୁ ତାଙ୍କ ବସ୍ତିର ଲୋକ ନିଆଁ, ଧୂଆଁ, ଧୂଳି, ପ୍ରଦୂଷଣ ପ୍ରଭାବ ଭୋଗୁଛନ୍ତି। ସବୁଠାରୁ ଭୟଙ୍କର ସ୍ଥିତି ହେଲା ଅସରାଏ ବର୍ଷା ହେଲେ ପାଣି ନିଷ୍କାସନ ହେବାକୁ ୧୫ ଦିନ ଲାଗୁଛି। ଏପରିସ୍ଥିତିରେ ପୁଣି କାରଖାନା କରିବା ଆହୁରି ଯନ୍ତ୍ରଣା ଦେବ। ଏମିତି ଧୀରେ ଧୀରେ ଲୋକଙ୍କୁ ମାରିବା ଅପେକ୍ଷା ଥରେ ସମସ୍ତଙ୍କୁ ମାରିଦିଅ ବୋଲି ପ୍ରଶାସନକୁ ନିବେଦନ କରିଥିଲେ। ସେହିପରି ବାଲିଝରା ବସ୍ତି କମିଟି ସମ୍ପାଦକ ସୁଶାନ୍ତ ସେନାପତି କହିଥିଲେ, ଚତୁଃପାଶର୍ବରେ ନଦୀପଥକୁ ଅବରୋଧ କରି କାରଖାନା କରିବା ଦ୍ୱାରା ଲୋକମାନେ ମାସାଧିକ ସମୟ ବର୍ଷା ପାଣିରେ ବୁଡି ରହୁଛନ୍ତି। ଏମିତି ସମସ୍ତେ ନିଯୁକ୍ତି, ପ୍ରଦୂଷଣ, ମେଡିକାଲ ଆଦି ଉପରେ ମତ ଦେଇଥିଲେ। ପ୍ରାୟ ୫୦ରୁ ଅଧିକ ଲୋକ ମତ ଦେଇଥିଲେ। ଜନଶୁଣାଣି ମଝିରେ ପାରାଦୀପ ନାଗରିକ ମଞ୍ଚ ସଙ୍ଗଠନ ସଭାପତି ଅୟସକାନ୍ତ ରାୟ ଓ ଅନ୍ୟମାନେ ପ୍ରକଳ୍ପ ବିରୋଧରେ ନାରାବାଜି କରିଥିଲେ। ପୋଲିସ ହସ୍ତକ୍ଷେପ ପରେ ଉତ୍ତେଜନା ହ୍ରାସ ପାଇଥିଲା।
ସୂଚନାଯୋଗ୍ୟ, ଏସାର୍ କମ୍ପାନୀକୁ ଏଏମ୍ଏନ୍ଏସ୍(ଆର୍ସେଲର ମିତ୍ତଲ ନିପ୍ପନ ଷ୍ଟିଲ୍) ୨୦୧୯ରେ ଅଧିଗ୍ରହଣ କରିଛି। ଏସାର୍ କମ୍ପାନୀ ପୁଣି ଏକ ନୂଆ କାରଖାନା କରିବା ପାଇଁ ପାରାଦୀପ ବନ୍ଦର ନିକଟରୁ ୪୦.୪୯ ହେକ୍ଟର ଜମି ୬୦ ବର୍ଷିଆ ଲିଜ୍ରେ ନେଇଛି। ସ୍ମାର୍ଟ ଇଣ୍ଡଷ୍ଟ୍ରିଆଲ ପୋର୍ଟ ସିଟି (ଏସ୍ଆଇପିସି) ନିୟମରେ ଏହି ଜମି ଯୋଗାଇ ଦିଆଯାଇଛି। ଏଥିରେ କେହି ବିସ୍ଥାପିତ ହେବେ ନାହିଁ ବୋଲି ଅତିରିକ୍ତ ଜିଲାପାଳ ଧୀର ସୂଚନା ଦେଇଥିଲେ। ଏଥିରେ ଏସାର୍ କମ୍ପାନୀ ୩୫୮୩ କୋଟି ଟଙ୍କା ନିବେଶ କରିବ ବୋଲି ଦର୍ଶାଯାଇଛି। ପ୍ରକଳ୍ପ ନିର୍ମାଣ ସମୟରେ ୭୫୦ ଏବଂ କାରଖାନା କାର୍ଯ୍ୟକ୍ଷମ ହେଲେ ୬୦୦ ଲୋକଙ୍କୁ ନିଯୁକ୍ତି ମିଳିବ ବୋଲି କମ୍ପାନୀର ନିର୍ଦ୍ଦେଶକ ପ୍ରକାଶ ଚନ୍ଦ୍ର ମହାପାତ୍ର ସୂଚନା ଦେଇଥିଲେ।
