ଭୁବନେଶ୍ୱର,୯।୭(ବ୍ୟୁରୋ): ଗତ ୨୪ ଘଣ୍ଟା ମଧ୍ୟରେ ରାଜଧାନୀ ଭୁବନେଶ୍ୱର ସର୍ବାଧିକ ୨୨୮ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ମାତ୍ର ୯ ଦିନ ଭିତରେ ସହରରୁ ୧୪ଶହ ୨୨ଜଣ ସଂକ୍ରମିତ ବାହାରି ସାରିଲେଣି। ଚିହ୍ନଟ ହେଉଥିବା ସମସ୍ତ ସଂକ୍ରମିତ ସ୍ଥାନୀୟ ଲୋକ ହୋଇଥିବାରୁ ଚିନ୍ତା ବଢ଼ିଛି। ଅପରପକ୍ଷେ ପ୍ରଥମ ଓ ଦ୍ୱିତୀୟ ଲହରରେ ଭୁବନେଶ୍ୱରର ହଟ୍ସ୍ପଟ୍ ପାଲଟିଥିବା ପଟିଆ, ନୟାପଲ୍ଲୀ ଏବଂ ଖଣ୍ଡଗିରିରୁ ଏଥର ମଧ୍ୟ ଏକାଧିକ ସଂକ୍ରମିତ ଚିହ୍ନଟ ହେଉଛନ୍ତି। ୯ଦିନ ମଧ୍ୟରେ ପଟିଆରୁ ସର୍ବାଧିକ ୧୯୩ଜଣ, ନୟାପଲ୍ଲୀରୁ ୧୧୦ଜଣ ଏବଂ ଖଣ୍ଡଗିରିରୁ ୯୧ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ଗତ ୨୪ ଘଣ୍ଟାରେ ଚିହ୍ନଟ ହୋଇଥିବା ୨୨୮ ଆକ୍ରାନ୍ତଙ୍କ ମଧ୍ୟରୁ ପଟିଆରୁ ସର୍ବାଧିକ ୩୫ଜଣ ଚିହ୍ନଟ ହୋଇଥିବାବେଳେ, ପାତ୍ରପଡାରୁ ୧୫ଜଣ, ଖଣ୍ଡଗିରି, ନୟାପଲ୍ଲୀରୁ ୧୧ଜଣ ଲେଖାଏ, ସତ୍ୟନଗର, ପୁରୁଣା ଭୁବନେଶ୍ୱରରୁ ୯ଜଣ ଲେଖାଏ, ଜୟଦେବ ବିହାର, ନଖରାରୁ ୮ଜଣ ଲେଖାଏ, ବଡଗଡ, ବରମୁଣ୍ଡା, ଚନ୍ଦ୍ରଶେଖରପୁରରୁ ୭ଜଣ ଲେଖାଏ, ଆଚାର୍ଯ୍ୟବିହାର, ସହୀଦ ନଗର, ସୁନ୍ଦରପଦା ଏବଂ ୟୁନିଟ-୮ରୁ ୬ଜଣ ଲେଖାଏ ଏବଂ ଅନ୍ୟାନ୍ୟ ଅଞ୍ଚଳରୁ ଏକାଧିକ ସଂକ୍ରମିତ ଚିହ୍ନଟ ହୋଇଛନ୍ତି। ଏହାକୁ ମିଶାଇ ସହରରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୧ଲକ୍ଷ ୫୮ହଜାର ୬୭୩ରେ ପହଞ୍ଚତ୍ଛି। ତେବେ ସ୍ଥିତି ଅତ୍ୟଧିକ ବିଗିଡିବା ପରେ ଗତଥର ବିଏମ୍ସି ପକ୍ଷରୁ ବିଭିନ୍ନ ଅଞ୍ଚଳକୁ ମାଇକ୍ରୋ କଣ୍ଟେନ୍ମେଣ୍ଟ ଜୋନ୍ କରାଯାଇଥିଲା। ଏଥର ମଧ୍ୟ ସମ୍ପୃକ୍ତ ଅଞ୍ଚଳଗୁଡିକରୁ ସଂଖ୍ୟାଧିକ ଆକ୍ରାନ୍ତ ଚିହ୍ନଟ ହେଉଥିବାରୁ ଏହି ଅଞ୍ଚଳଗୁଡିକ ପାଇଁ ଆରମ୍ଭରୁ ବିଏମ୍ସିକୁ ପଦକ୍ଷେପ ନେବାକୁ ପ୍ରସ୍ତୁତ ହେଉଛି। ସଂକ୍ରମଣରେ ବ୍ରେକ୍ ଲଗାଇବାକୁ ଏଭଳି କଟକଣା ଲଗାଯାଇପାରେ ବୋଲି ଆଶଙ୍କା କରାଯାଉଛି।
