ମୁମ୍ବାଇ: ବଲିଉଡ ତଥା ହଲିଉଡରେ ଖୁବ୍ ନାଁ କମେଇଥିବା ଅଭିନେତ୍ରୀ ପ୍ରିୟଙ୍କା ଚୋପ୍ରାଙ୍କ କଜିନ ସିଷ୍ଟର ପରିଣିତି ଚୋପ୍ରା ଏବେ ବଲିଉଡର ଜଣେ ଆଗଧାଡିର ନାୟିକା । ଏବେ ସେ ତାଙ୍କ ଅଭିନୀତ ମୁଭି ‘କୋଡ ନେମ : ତ୍ରିରଙ୍ଗାକୁ ନେଇ ଆସିଛନ୍ତି ଚର୍ଚ୍ଚାକୁ । ତେବେ ‘କୋଡ ନେମ: ତିରଙ୍ଗା’କୁ ଖୁବଶୀଘ୍ର ଓଟିଟି ଦର୍ଶକଙ୍କ ପାଇଁ ଷ୍ଟ୍ରିମ କରିବାକୁ ପ୍ରସ୍ତୁତି ଚାଲିଛି । ପରିଣିତି ଚୋପ୍ରାଙ୍କ ଅଭିନୀତ ଏହି ମୁଭିକୁ ଚଳିତ ବର୍ଷ ଅକ୍ଟୋବର ୧୪ରେ ସିନେମା ହଲରେ ରିଲିଜ୍ କରାଯାଇଥିଲା । ହେଲେ ଏହା ଦର୍ଶକଙ୍କୁ ଏତେଟା ପସନ୍ଦ ଆସି ନ ଥିଲା । ଚଳିତ ବର୍ଷର ସବୁଠାରୁ କମ ଆୟ କରିବା ଫିଲ୍ମ ଲିଷ୍ଟରେ ଏହା ସାମିଲ ହୋଇଛି ।
ପରିଣିତି ଚୋପ୍ରାଙ୍କ ଏହି ମୁଭି ବକ୍ସ ଅଫିସରେ ହଙ୍ଗାମା କରି ନ ପାରି ଏବେ ଓଟିଟିରେ ନିଜ ଭାଗ୍ୟ ପରୀକ୍ଷା କରିବାକୁ ଚଳିତ ମାସ ୧୬ ତାରିଖରେ ଓଟିଟି ପ୍ଲାଟଫର୍ମ ନେଟଫ୍ଲିକ୍ସରେ ଷ୍ଟ୍ରିମ କରାଯିବ । ଏବେ ଦେଖିବାର କଥା ବକ୍ସ ଅଫିସରେ ଫ୍ଲପ ହୋଇଥିବା ପରିଣିତିଙ୍କ ଏହି ମୁଭି ଓଟିଟି ପ୍ଲାଟଫର୍ମରେ କେମିତି ପ୍ରଦର୍ଶନ କରୁଛି ।
ସୂଚନାଯୋଗ୍ୟ, ଯେତେବେଳେ ଏହି ମୁଭିର ଟ୍ରେଲର ରିଲିଜ୍ ହୋଇଥିଲା ସେତେବେଳେ ଏହାକୁ ଆଲିଆ ଭଟ୍ଟଙ୍କ ମୁଭି ‘ରାଜି’ ସହ ତୁଳା କରାଯାଇଥିଲା । ଏହାର ମୁଖ୍ୟ କାରଣ ଥିଲା ଦୁଇଟି ଯାକ ମୁଭିରେ ଗୁପ୍ତଚରର ଭୂମିକାରେ ଫିମେଲ କଳାକାର ଥିଲେ । ହେଲେ ‘କୋଡ ନେମ: ତ୍ରିରଙ୍ଗା’ ରିଲିଜ୍ ହେବା ପରେ ଦୁଇଟି ଯାକ ମୁଭିରେ ଥିବା ପାର୍ଥକ୍ୟକୁ ଅନୁଭବ କରିବାକୁ ଦର୍ଶକଙ୍କୁ ବେଶୀ ସମୟ ଲାଗିଲା ନାହିଁ ।
