ପାରାଦୀପ,୧୭ା୩(ସ୍ବ.ପ୍ର.): ପାରାଦୀପ ପୌରାଞ୍ଚଳର ସବୁଠାରୁ ବଡ଼ ବସ୍ତି ହେଲା ଷଣ୍ଢକୁଦ। ଏଠାରେ ୧୭, ୧୮ ଓ ୧୯ନଂ. ଏପରି ୩ଟି ୱାର୍ଡ କରାଯାଇଛି। ୫୮୪୫ ଭୋଟର ଥିବା ଏହି ୩ ୱାର୍ଡରେ ନିର୍ବାଚନ ପାଇଁ ପ୍ରଚାର ଜୋର୍ ଧରିଛି। ସମୁଦ୍ର ବେଳାଭୂମିରେ ଥିବା ଏହି ବସ୍ତିରେ ବିଭିନ୍ନ ବର୍ଗର ଲୋକ ବସବାସ କରୁଛନ୍ତି। ବିଶେଷକରି ତେଲୁଗୁ ସମ୍ପ୍ରଦାୟ ଲୋକଙ୍କ ଉପରେ ଦୁଇଟି ୱାର୍ଡର ବିଜୟ ପରାଜୟ ନିର୍ଭର କରୁଛି। ତେଲୁଗୁ ପରେ ଅନ୍ୟତମ ବଡ଼ ଭୋଟ୍ବ୍ୟାଙ୍କ ହେଲା ବଙ୍ଗଭାଷୀ ଏବଂ ଅବଶିଷ୍ଟ ଓଡ଼ିଆ। ଚଳିତ ନିର୍ବାଚନରେ ସଂରକ୍ଷଣ ଯୋଗୁ ଅନେକ ପ୍ରମୁଖ ଆଶାୟୀ ବାଦ୍ ପଡିଛନ୍ତି। ସେହି ସ୍ଥାନରେ ଆଶାୟୀଙ୍କୁ ଅଦଳ ବଦଳ କରିବା, ପୁରୁଖାଙ୍କୁ ଅଣଦେଖା କରିବା ଯୋଗୁ ବିଦ୍ରୋହୀ ଭୂମିକାରେ ସେମାନେ ରହିଛନ୍ତି, ଯାହାକୁ ନେଇ ତ୍ରିଶଙ୍କୁ ଅବସ୍ଥା ସୃଷ୍ଟି ହୋଇଛି।
୧୭ନଂ. ୱାର୍ଡ ଅନୁସୂଚିତ ଜାତି ମହିଳା ପାଇଁ ସଂରକ୍ଷଣ ହୋଇଛି। ଏଥର ଏହି ୱାର୍ଡରେ ଭାଜପା ପକ୍ଷରୁ ଚିରସ୍ମିତା ତରାଇ, ବିଜେଡି ପକ୍ଷରୁ ରୁନି ପରିଡା ଓ ସ୍ବାଧୀନ ଭାବେ(ଆମ ପାରାଦୀପ ଆମ ପ୍ରଗତି) ପକ୍ଷରୁ ଟି. ରାଜେଶ୍ୱରୀ ନିର୍ବାଚନ ଲଢୁଛନ୍ତି। ଉକ୍ତ ୱାର୍ଡର ଭୋଟର ସଂଖ୍ୟା ୧୮୭୨ ଥିବାବେଳେ ସେଥିରୁ ତେଲୁଗୁ ଭୋଟର ୮୫ ପ୍ରତିଶତ। ଅନ୍ୟମାନେ ଓଡ଼ିଆ ବଙ୍ଗଭାଷୀ। ସେହିପରି ୧୮ନଂ. ୱାର୍ଡର ଅବସ୍ଥା। ଅସଂରକ୍ଷିତ ଥିବା ଏହି ୱାର୍ଡରେ ୩ ଜଣ ତେଲୁଗୁ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସେମାନେ ହେଲେ ଭାଜପାରୁ ଅର୍ଜିଲ ଶିୱା, ବିଜେଡିରୁ କାମ୍ବଲ ରାମବାବୁ ଓ ଆମ ପାରାଦୀପ ଆମ ପ୍ରଗତିର ସ୍ବାଧୀନ ପ୍ରାର୍ଥୀ ଜଗନ୍ନାଥ ରାଓ କାମ୍ବଲା। ଉକ୍ତ ୱାର୍ଡରେ ୧୭୩୩ ଭୋଟରଙ୍କ ମଧ୍ୟରୁ ତେଲୁଗୁ ୬୦ ପ୍ରତିଶତ ଥିବା ବେଳେ ଅନ୍ୟମାନେ ଓଡ଼ିଆ ଓ ବଙ୍ଗଭାଷୀ। ଜଗନ୍ନାଥ ଉକ୍ତ ୱାର୍ଡରୁ ପୂର୍ବରୁ ୪ଥର କାଉନସିଲର ଭାବେ ଜିତିଛନ୍ତି। ଦୁଇଥର କଂଗ୍ରେସ ଟିକେଟରୁ ଏବଂ ଦୁଇଥର ବିଜେଡି ଟିକେଟରୁ। ଚଳିତଥର ସେ ପ୍ରମୁଖ ଆଶାୟୀ ଥିଲେ। ତାଙ୍କ ଜାଗାରେ ବିଜେଡି ପୂର୍ବଥର ୧୭ନଂ. ୱାର୍ଡ କାଉନସିଲର ଥିବା ରାମବାବୁଙ୍କୁ ଟିକେଟ ଦେଇଛି। ଅନ୍ୟତମ ଦାବିଦାର ହେଲେ ଭାଜପାର ଶିୱା। ସେ ମଧ୍ୟ ଗତଥର ନିର୍ବାଚନ ଲଢିଥିଲେ। କଡ଼ା ପ୍ରତିଦ୍ୱନ୍ଦ୍ୱିତା କରିଥିଲେ। ଏମିତି ଦେଖିବାକୁ ଗଲେ ୩ ଜଣ ପ୍ରାର୍ଥୀ ସମ୍ପର୍କରେ ଦାଦା ପୁତୁରା, ମାମୁ ଭଣଜା। ସମସ୍ତଙ୍କର ଦବ୍ଦବା ରହିଛି। କଡା ପ୍ରତିଦ୍ୱନ୍ଦ୍ୱିତା ମଧ୍ୟରେ ହାର୍ଜିତ ଗତଥର ଭଳି କମ୍ ବ୍ୟବଧାନ ରହିବ ବୋଲି ଜଣେ ଭୋଟର କହିଛନ୍ତି।
୧୯ନଂ. ୱାର୍ଡର ଅସଂରକ୍ଷିତ ଆସନରେ ସେହିଭଳି ଗୋଳମାଳିଆ ସ୍ଥିତି। ୨୨୪୦ ଭୋଟର ଥିବା ଏହି ୱାର୍ଡରେ ଏଥର ୩ ଜଣଯାକ ପ୍ରାର୍ଥୀ ନୂଆମୁହଁ। ବିଜେଡିରୁ ନବ କୁମାର ବେହେରା, ଭାଜପାରୁ ପ୍ରଫୁଲ୍ଲ କୁମାର ପରିଡା ଓ ସ୍ବାଧୀନ(ଏପିଏପି)ସୁଜିତ ପରିଡା। ସୁଜିତଙ୍କ ସ୍ତ୍ରୀ ଗତଥର କାଉନସିଲର ଥିଲେ। ତାଙ୍କ ବାପା ଅକ୍ଷୟ ପରିଡା ୨ ଥର କାଉନସିଲର ଥିଲେ। ଏଥର ବିଜେଡି ଟିକେଟରୁ ବଞ୍ଚତ୍ତ ହେବାରୁ ସେ ବିଦ୍ରୋହୀ ଭୂମିକାରେ ଅଛନ୍ତି। ପ୍ରଫୁଲ୍ଲ ଜଣେ ଆଗଧାଡ଼ିର ମୁରବି ଭାବେ ଜଣାଶୁଣା। ନବ ଶାସକ ବିଜେଡିର ଲୋକପ୍ରିୟ ଚେହେରା। ଉକ୍ତ ୱାର୍ଡର ସୀମା ୧୭, ୧୮ ୱାର୍ଡ ଭିତରେ ରହିଛି। ଏମିତି ସ୍ଥିତିରେ ଏବେ ତ୍ରିମୁଖୀ ଲଢ଼େଇ ହେଉଛି।
