ନୂଆଦିଲ୍ଲୀ,୩୦।୯: ପାକିସ୍ତାନୀ କ୍ରିକେଟର ଆଜମ ଖାନଙ୍କ ମୃତ୍ୟୁ ଖବର ଦେଖି ନିଜେ ହିଁ ହସିଲେ ଆଜମ । ସୋସିଆଲ ମିଡିଆରେ ତାଙ୍କର ଏକ ଭିଡିଓ ଭାଇରାଲ୍ ହେଉଛି, ଯେଉଁଥିରେ ସେ ନିଜ ମୃତ୍ୟୁ ଖବର ଦେଖୁଥିବା ନଜର ଆସୁଛନ୍ତି । ଆଜମ ଖାନ ନିଜେ ଏହି ଭିଡିଓକୁ ଇନ୍ଷ୍ଟାଗ୍ରାମରେ ସେୟାର କରିଛନ୍ତି ।
ଭାଇରାଲ୍ ଭିଡିଓରେ ଏକ ନ୍ୟୁଜ ଚ୍ୟାନେଲର ଲୋଗୋ ଦେଖାଯାଉଛି। ଏଥିରେ ଜଣେ ଆଙ୍କର ଆଜମ ଖାନଙ୍କ ମୃତ୍ୟୁ ହୋଇଥିବା ନେଇ ଖବର ପଢ଼ୁଥିବା ଦାବି କରାଯାଇଛି । ଏହି ଖବର ଦେଖୁଥିବା ଆଜମ ମଜାକିଆ ଢଙ୍ଗରେ ପ୍ରତିକ୍ରିୟା ଦେଇଥିଲେ । ତାଙ୍କ ସହ ବସିଥିବା ଲୋକମାନେ ମଧ୍ୟ ହସୁଥିବା ଭିଡିଓରେ ଦେଖାଯାଉଛି।ଭିଡିଓରେ ନିଜ ମୃତ୍ୟୁ ଖବରକୁ ନେଇ ଆଜମ ଖାନ ମଜାକ କରି କହୁଥିବା ଶୁଣିବାକୁ ମିଳୁଛି ‘ଭଲ ଖେଳାଳି ଥିଲା ବିଚରା, କାଲି ପାକିସ୍ତାନ ପାଇଁ ଖେଳିବାର ଥିଲା, ଆଜି ମରିଗଲା।’ ଏହାପରେ ସେ ନିଜେ ହସିବା ସହ ତାଙ୍କ ସହ ଥିବା ଲୋକମାନେ ମଧ୍ୟ ହସୁଛନ୍ତି।
ତେବେ ଏଭଳି ଖବର କିପରି ପ୍ରସାରିତ ହେଲା, ତାହା ସ୍ପଷ୍ଟ ହୋଇନାହିଁ । ଏହା ଅନ୍ୟ କୌଣସି ଆଜମ ଖାନଙ୍କ ସମ୍ପର୍କିତ ଖବର ଥିଲା କିମ୍ବା ଭୁଲ୍ରେ କ୍ରିକେଟର ଆଜମ ଖାନଙ୍କ ଫଟୋ ବ୍ୟବହାର ହୋଇଥିଲା ସେନେଇ ମଧ୍ୟ ସ୍ପଷ୍ଟ ସୂଚନା ନାହିଁ। ୨୮ ବର୍ଷୀୟ ଆଜମ ଖାନ ପାକିସ୍ତାନର ପୂର୍ବତନ କ୍ରିକେଟର ମୋଇନ ଖାନଙ୍କ ପୁଅ । ସେ ପାକିସ୍ତାନ ପାଇଁ ୧୪ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳି ୮୮ ରନ୍ କରିଛନ୍ତି । ଦୀର୍ଘ ସମୟ ଧରି ସେ ପାକିସ୍ତାନ ଦଳରୁ ବାହାରେ ଅଛନ୍ତି ଏବଂ ୨୦୨୪ ଜୁନ୍ରେ ଶେଷ ଥର ପାଇଁ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ।
