ନ୍ୟୁୟର୍କ,୨୪ ।୯: ମିଳିତ ଜାତିସଂଘ ସାଧାରଣ ସଭାରେ ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ଶରିଫ କଶ୍ମୀର ପ୍ରସଙ୍ଗ ଉଠାଇଛନ୍ତି । ସେ କହିଛନ୍ତି ଭାରତ ସମେତ ଆମେ ସମସ୍ତ ପଡୋଶୀ ଦେଶ ସହିତ ଶାନ୍ତି ଚାହୁଁଛୁ । ଶେହବାଜ ଶରିଫ କହିଛନ୍ତି, ମୁଁ ଭାବୁଛି ବର୍ତ୍ତମାନ ସମୟ ଆସିଛି ଭାରତ ବୁଝିବା ଉଚିତ ଯେ ଦୁଇ ଦେଶ ପରସ୍ପର ସହ ଯୋଡି ହୋଇଛନ୍ତି ।
ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ଶରିଫ ଶୁକ୍ରବାର ପୁଣିଥରେ କଶ୍ମୀର ରାଗକୁ ଓଗାଳିଛନ୍ତି । ମିଳିତ ଜାତିସଂଘ(ୟୁଏନ) ମହାସଭାରେ ଉଚ୍ଚ ସ୍ତରୀୟ ବୈଠକକୁ ସାମ୍ବୋଧିତ କରୁଥିବା ବେଳେ ଶରିଫ କହିଛନ୍ତି, ୫ ଅଗଷ୍ଟ ୨୦୧୯ରେ ଭାରତ ଏକତରଫା ଭାବେ ନିଜ ମନମୁତାବକ ନିଷ୍ପତ୍ତି ନେଇ ଅନୁଚ୍ଛେଦ ୩୭୦ ମାଧ୍ୟମରେ ଜମ୍ମୁ-କଶ୍ମୀରର ସ୍ୱତନ୍ତ୍ର ପରିଚୟ ଶେଷ କରିଦେଲା । ଏହ ଫଳରେ ଶାନ୍ତିର ଆଶା ଧୂଳିସାତ୍ ହୋଇଗଲା ଓ ସୀମାରେ ଉତ୍ତେଜନା ବୃଦ୍ଧି ପାଇଲା । ଏହାପରେ ଶରିଫ ଆହୁରି ମଧ୍ୟ କହିଛନ୍ତି ଭାରତ ସହ ଯୁଦ୍ଧ କୌଣସି ବିକଳ୍ପ ନୁହେଁ ।
କଶ୍ମୀର ରାଗ ଓଗାଳିବା ସମୟରେ ଶରିଫ କହିଛନ୍ତି, ପାକିସ୍ତାନ ତା’ର ପଡୋଶୀ ସହ ସ୍ଥିର ବାତାବାରଣ ଚାହୁଁଛି । ଆମେ ଆମର ସମସ୍ତ ପଡୋଶୀଙ୍କ ସହ ଶାନ୍ତି ଚାହୁଁ । କେବଳ ଶାନ୍ତିପୂର୍ଣ୍ଣ କଥାବାର୍ତ୍ତା ମାଧ୍ୟମରେ ସମସ୍ୟାର ସମାଧାନ ହୋଇପାରିବ । ତା’ହେଲେ ଭବିଷ୍ୟରେ ବିଶ୍ୱ ଆହୁରି ଶାନ୍ତି ପୂର୍ଣ୍ଣ ହେବ । ଭାରତକୁ ସକରାତ୍ମକ ସ୍ଥିତି ପାଇଁ ଉଚିତ ପଦକ୍ଷେପ ନେବା ଦରକାର । ଆମେ ପଡୋଶୀ, ନିଷ୍ପତ୍ତି ଆମକୁ ନେବାକୁ ହେବ, ଆମେ ଶାନ୍ତୁ ଚାହୁଁଛୁ ନା ଯୁଦ୍ଧ ଚାହୁଁଛୁ ।
