ନୂଆଦିଲ୍ଲୀ,୧୨।୧୦: ୨୦୨୬ ମସିହାର ଅର୍ଥନୀତି କ୍ଷେତ୍ରରେ ନୋବେଲ ପୁରସ୍କାର ଆମେରିକୀୟ ଅର୍ଥନୀତିଜ୍ଞ ରବର୍ଟ ଇ. ହଲ (Robert E. Hall) ଏବଂ ମାଇକେଲ ୱୁଡଫୋର୍ଡ (Michael Woodford)ଙ୍କୁ ପ୍ରଦାନ କରାଯାଇଛି। ଅର୍ଥନୀତିକୁ ସ୍ଥିର ରଖୁଥିବା ନୀତିଗୁଡ଼ିକ ସମ୍ପର୍କରେ ବୁଝିବା ଦିଗରେ ଗୁରୁତ୍ୱପୂର୍ଣ୍ଣ ଅବଦାନ ପାଇଁ ସେମାନଙ୍କୁ ଏହି ସମ୍ମାନ ପ୍ରଦାନ କରାଯାଇଛି।
ହଲ କାଲିଫର୍ଣ୍ଣିଆର ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟ ସହିତ ଜଡ଼ିତ ଥିବାବେଳେ ୱୁଡଫୋର୍ଡ ନ୍ୟୁୟର୍କର କଲମ୍ବିଆ ବିଶ୍ୱବିଦ୍ୟାଳୟ ସହିତ ଜଡ଼ିତ ଅଛନ୍ତି। ଅର୍ଥନୈତିକ ବିଜ୍ଞାନ ପୁରସ୍କାର କମିଟିର ଅଧ୍ୟକ୍ଷ ଏକ ପ୍ରେସ ବିଜ୍ଞପ୍ତିରେ କହିଛନ୍ତି ଯେ, ଏହି ଅର୍ଥନୀତିଜ୍ଞମାନଙ୍କ କାର୍ଯ୍ୟ ବିଶ୍ୱବ୍ୟାପୀ କେନ୍ଦ୍ରୀୟ ବ୍ୟାଙ୍କ ଏବଂ ସରକାରଙ୍କ ଦ୍ୱାରା ବ୍ୟବହୃତ ମଡେଲ୍ଗୁଡ଼ିକ ପାଇଁ ଏକ ସ୍ଥିର ତତ୍ତ୍ୱଗତ ଭିତ୍ତିଭୂମି ପ୍ରଦାନ କରିଛି।
ଏହା ମଧ୍ୟ ଉଲ୍ଲେଖ କରାଯାଇଛି ଯେ, ଶକ୍ତି ସଙ୍କଟ କିମ୍ବା ପାରିବାରିକ ଉପଭୋଗ ଢାଞ୍ଚାରେ ହଠାତ୍ ପରିବର୍ତ୍ତନ ଭଳି ଅର୍ଥନୈତିକ ଝଟକା (economic shocks)ର ମୁକାବିଲା କିପରି କରାଯିବ, ତାହା ବୁଝିବାରେ ସେମାନଙ୍କ କାର୍ଯ୍ୟ ସାହାଯ୍ୟ କରେ।
ଏହି ପୁରସ୍କାରକୁ ‘ଆଲଫ୍ରେଡ ନୋବେଲଙ୍କ ସ୍ମୃତିରେ ଅର୍ଥନୈତିକ ବିଜ୍ଞାନ କ୍ଷେତ୍ରରେ ବ୍ୟାଙ୍କ ଅଫ ସ୍ବିଡେନ ପୁରସ୍କାର’ ଭାବରେ ମଧ୍ୟ ଜଣାଯାଏ। ଗତ ବର୍ଷ ବ୍ୟବସାୟିକ ଉଦ୍ଭାବନ କ୍ଷେତ୍ରରେ ବିଶେଷଜ୍ଞ ଥିବା ତିନିଜଣ ଗବେଷକଙ୍କୁ ଏହି ପୁରସ୍କାର ପ୍ରଦାନ କରାଯାଇଥିଲା।
Dharitri – Odisha’s No.1 Odia Daily
