ଭୁବନେଶ୍ୱର, ୨୪।୯(ବ୍ୟୁରୋ): ଦୁର୍ଗାପୂଜା, ଭସାଣି ସମୟରେ ଉଚ୍ଚ ଶବ୍ଦ ଯୋଗୁ ଯେପରି ସ୍ମାର୍ଟସିଟିବାସୀଙ୍କ ସ୍ବାଭାବିକ ଜୀବନଯାତ୍ରା ପ୍ରଭାବିତ ନ ହେବ ଓ ସହରରେ ଟ୍ରାଫିକ୍ ଜାମ୍ ସ୍ଥିତି ନ ଉପୁଜିବ, ସେଥିପାଇଁ କମିଶନରେଟ ପୋଲିସ ଗୁରୁତ୍ୱ ଦେଇଛି। ଏନେଇ ଶୁକ୍ରବାର ଭୁବନେଶ୍ୱର ଡିସିପିଙ୍କ ପକ୍ଷରୁ ଗାଇଡ୍ଲାଇନ୍ ଜାରି କରାଯିବା ସହ ସାଉଣ୍ଡ୍, ଡିଜେ, ଲାଇଟ୍ ଓ ଭସାଣ ଶୋଭାଯାତ୍ରାରେ କିଛି କଟକଣା ମାନିବାକୁ ପୂଜା ଆୟୋଜକଙ୍କୁ ତାଗିଦ୍ କରାଯାଇଛି। ଉକ୍ତ ନିର୍ଦ୍ଦେଶନାମା ଅନୁଯାୟୀ, ପୂଜା ମଣ୍ଡପ ଓ ଭସାଣ ଶୋଭାଯାତ୍ରାରେ ବ୍ୟବହାର ହେବାକୁ ଥିବା ସାଉଣ୍ଡ ବକ୍ସଗୁଡ଼ିକର ଶବ୍ଦର ତୀବ୍ରତା ୬୫ ଡେସିବଲ୍ରୁ ଅଧିକ ରହିବ ନାହିଁ। ଭସାଣି ସମୟରେ ପ୍ରତ୍ୟେକ ପୂଜା ମଣ୍ଡପକୁ କେବଳ ଗୋଟିଏ ଲେଖାଏ ବ୍ୟାଣ୍ଡ୍ ଓ ମ୍ୟୁଜିକ୍ ପାର୍ଟି ବ୍ୟବହାର କରିବାକୁ ଅନୁମତି ଦିଆଯିବ। ମ୍ୟୁଜିକ ପାର୍ଟିଗୁଡ଼ିକ ୪ରୁ ୫ଟି ସାଉଣ୍ଡ ବକ୍ସ ବ୍ୟବହାର କରିବେ। ସାଉଣ୍ଡ୍ ଲିମିଟ୍ ସୀମା ନ ଥିବା ଅଡିଓ ସିଷ୍ଟମକୁ ଅନୁମତି ମିଳିବ ନାହିଁ। ଭୁବନେଶ୍ୱର/କଟକ ଡିସିପିଙ୍କ ଅଧୀନରେ ପଞ୍ଜୀକୃତ ହୋଇଥିବା ବ୍ୟାଣ୍ଡ୍/ଡିଜେ ଓ ମ୍ୟୁଜିକ୍ ପାର୍ଟିଗୁଡ଼ିକକୁ ହିଁ ଚଳିତବର୍ଷ ଦଶହରାରେ ଅନୁମତି ମିଳିବ। ଅନ୍ୟକାହାର ଲାଇସେନ୍ସକୁ ବ୍ୟବହାର କରି କେହି ଗୀତ ବଜାଇ ପାରିବେ ନାହିଁ। ସ୍କୁଲ୍, କଲେଜ, ହସ୍ପିଟାଲ ଓ କୋର୍ଟ ଆଦି ସାଇଲେନ୍ସ ଜୋନ୍ ଅଞ୍ଚଳର ୧୦୦ ମିଟର ପରିଧି ମଧ୍ୟରେ ଗୀତ ବାଜି ପାରିବ ନାହିଁ। ଭସାଣି ଶୋଭାଯାତ୍ରା ପାଇଁ ଦିଆଯାଇଥିବା ସମୟ ଓ ମାର୍ଗକୁ କଡ଼ାକଡ଼ି ଭାବେ ବ୍ୟାଣ୍ଡ/ଡିଜେ ଓ ମ୍ୟୁଜିକ୍ପାର୍ଟିମାନେ ମାନିବେ। କୌଣସି ପରିସ୍ଥିତିରେ ଜାତୀୟ ରାଜପଥରେ ଗୀତ ବଜାଇ ପାରିବେ ନାହିଁ କି ଭସାଣି ସମୟରେ ଫୋକସ୍/ଫ୍ଲାସ୍ ଲାଇଟ୍ ବ୍ୟବହାର କରିପାରିବେ ନାହିଁ। ଗୋଟିଏ ମଣ୍ଡପ ୬ରୁ ଅଧିକ ଟ୍ରଲି ବ୍ୟବହାର କରିପାରିବ ନାହିଁ। ତେବେ ଉପରୋକ୍ତ ନିୟମକୁ ଉଲ୍ଲଂଘନ କଲେ ମ୍ୟୁଜିକ୍ ସାମଗ୍ରୀକୁ ଜବତ କରାଯିବ ବୋଲି ସର୍ତ୍ତାବଳୀରେ ଉଲ୍ଲେଖ କରାଯାଇଛି।
