ଇସଲାମବାଦ୍,୩ା୭: ଶୁକ୍ରବାର ସକାଳେ ପାକିସ୍ତାନର ଦକ୍ଷିଣ-ପଶ୍ଚିମ ଭାଗରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ଏଥିରେ ଅତି କମରେ ୪୦ ଜଣଙ୍କର ମୃତ୍ୟୁ ଘଟିଥିବା ବେଳେ ୮ ଜଣ ଆହତ ହୋଇଛନ୍ତି । ବସଟି ଦ୍ରୁତ ଗତିରେ ଆସି ଭାରସାମ୍ୟ ହରାଇ ଘାଇକୁ ଖସି ପଡିଥିଲା । ନିକଟ ଅତୀତରେ ପାକିସ୍ତାନରେ ଏହା ସବୁଠାରୁ ବଡ ସଡକ ଦୁର୍ଘଟଣା ବୋଲି ବିବେଚନା କରାଯାଏ।
ବେଲୁଚିସ୍ତାନ ସରକାରଙ୍କ ମୁଖପାତ୍ର ଶାହିଦ ରିନ୍ଦଙ୍କ ଅନୁଯାୟୀ, ଦୁର୍ଘଟଣାଟି ବେଲୁଚିସ୍ତାନ ଏବଂ ଖାଇବର ପଖତୁନଖ୍ୱା ପ୍ରଦେଶର ସୀମା ନିକଟରେ ଅବସ୍ଥିତ ଏକ ଦୁର୍ଗମ ଅଞ୍ଚଳ ଡାନା ସାର୍ ଅଞ୍ଚଳରେ ଘଟିଛି। ବସ୍ ଟି ଦ୍ରୁତ ଗତିରେ ଯାଉଥିଲା ଏବଂ ଡ୍ରାଇଭର ନିୟନ୍ତ୍ରଣ ହରାଇବା ପରେ ସିଧାସଳଖ ଏକ ପଥୁରିଆ ଘାଟିରେ ଖସି ପଡ଼ିଥିଲା। ମୁଖପାତ୍ର କହିଛନ୍ତି ଯେ ଦୁର୍ଘଟଣାଗ୍ରସ୍ତ ବସ୍ ଟି କେବଳ ନିଜ ଯାତ୍ରୀଙ୍କୁ ନେଇ ଯାଉନଥିଲା ବରଂ ଖରାପ ହୋଇଯାଇଥିବା ଅନ୍ୟ ଏକ ବସର ଯାତ୍ରୀମାନଙ୍କୁ ମଧ୍ୟ ନେଇଯାଉଥିଲା । ଫଳସ୍ୱରୂପ ବସଟି ତାର କ୍ଷମତାଠାରୁ ବହୁତ ଅଧିକ ଯାତ୍ରୀଙ୍କ ସହିତ ଭର୍ତ୍ତି ହୋଇଯାଇଥିଲା। ପ୍ରଶାସନ ବର୍ତ୍ତମାନ ମୃତକଙ୍କୁ ଚିହ୍ନଟ କରିବା ପାଇଁ କାର୍ଯ୍ୟ କରୁଛି।
ପାକିସ୍ତାନର ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ ଦୁର୍ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି ଏବଂ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି । ସେ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରିଛନ୍ତି ଏବଂ ସେମାନଙ୍କୁ ସର୍ବୋତ୍ତମ ଚିକିତ୍ସା ସୁବିଧା ଯୋଗାଇବା ନିଶ୍ଚିତ କରିବାକୁ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ।
