ଇସଲାମାବାଦ,୨୮।୮: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନେଇ ବଡ଼ ଅଭିଯୋଗ ଆସିଛି । ଇମ୍ରାନ ଖାନଙ୍କ ଦୁଇ ପୁଅ କାସିମ ଖାନ ଓ ସୁଲେମାନ ଖାନ ପାକିସ୍ତାନ ସରକାର ବିରୋଧରେ ଗମ୍ଭୀର ଅଭିଯୋଗ ଆଣିଛନ୍ତି । ସେମାନଙ୍କ ଦାବି ହେଉଛି, ସରକାର ଜେଲ୍ରେ ଥିବା ତାଙ୍କ ବାପାଙ୍କୁ ହତ୍ୟା କରିବାକୁ ଚେଷ୍ଟା କରୁଛନ୍ତି ।
ଏକ ରିପୋର୍ଟ ଅନୁସାରେ, ଇମ୍ରାନ ଖାନଙ୍କ ଦୁଇ ପୁଅ ତାଙ୍କ ବାପାଙ୍କ ସୁରକ୍ଷା ଏବଂ ଜେଲ୍ରେ ତାଙ୍କ ସହ ହେଉଥିବା ବ୍ୟବହାରକୁ ନେଇ ଚିନ୍ତା ପ୍ରକାଶ କରିଛନ୍ତି । ସେମାନଙ୍କ ଅଭିଯୋଗ ଅନୁସାରେ, ଇମ୍ରାନଙ୍କ ପ୍ରତି ପାକିସ୍ତାନ ସରକାରଙ୍କ ଆଭିମୁଖ୍ୟ ତାଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛି । ୭୩ ବର୍ଷୀୟ ଇମ୍ରାନ ଖାନ ପ୍ରାୟ ୩ ବର୍ଷ ଧରି ଜେଲ୍ରେ ଅଛନ୍ତି । ୨୦୨୨ ଅଗଷ୍ଟରେ ପ୍ରଧାନମନ୍ତ୍ରୀ ପଦରୁ ହଟିବା ପରେ ତାଙ୍କ ବିରୋଧରେ ଏକାଧିକ ମାମଲା ରୁଜୁ ହୋଇଥିଲା। ଏହା ପରଠାରୁ ବିଭିନ୍ନ ମାମଲାରେ ସେ ଜେଲ୍ରେ ରହିଆସୁଛନ୍ତି ।
ଇମ୍ରାନ ଖାନଙ୍କ ପୁଅ କାସିମ ଓ ସୁଲେମାନ ତାଙ୍କ ପୂର୍ବତନ ପତ୍ନୀ ଜେମିମା ଗୋଲ୍ଡସ୍ମିଥଙ୍କ ସନ୍ତାନ । ଦୁହେଁ ଦୀର୍ଘ ସମୟ ଧରି ବାପାଙ୍କ ଜେଲ୍ ସ୍ଥିତି ଏବଂ ସୁରକ୍ଷାକୁ ନେଇ ଚିନ୍ତା ପ୍ରକାଶ କରିଆସୁଛନ୍ତି।ପ୍ରଧାନମନ୍ତ୍ରୀ ପଦରୁ ହଟିବା ପରେ ଇମ୍ରାନ ଖାନଙ୍କ ବିରୋଧରେ ଅନେକ ମାମଲା ହୋଇଥିଲା। ତାଙ୍କ ଦଳ ପାକିସ୍ତାନ ତେହରିକ୍-ଏ-ଇନ୍ସାଫ୍ (PTI) ଏବଂ ସମର୍ଥକମାନେ ଏହି ଆଇନଗତ କାର୍ଯ୍ୟାନୁଷ୍ଠାନକୁ ରାଜନୈତିକ ପ୍ରତିଶୋଧ ବୋଲି ଦାବି କରିଆସୁଛନ୍ତି । ଅନ୍ୟପଟେ ପାକିସ୍ତାନ ସରକାର ଏହି ମାମଲାଗୁଡ଼ିକୁ ଆଇନଗତ ପ୍ରକ୍ରିୟାର ଅଂଶ ବୋଲି କହିଆସିଛି ।
ଇମ୍ରାନଙ୍କ ପୁଅମାନଙ୍କ ଏହି ନୂଆ ଅଭିଯୋଗ ପରେ ଜେଲ୍ରେ ତାଙ୍କ ବାପାଙ୍କ ସୁରକ୍ଷା ଏବଂ ସ୍ୱାସ୍ଥ୍ୟକୁ ନେଇ ପୁଣିଥରେ ପ୍ରଶ୍ନ ଉଠିଛି । ଏହି ଦାବି ଆନ୍ତର୍ଜାତୀୟ ସ୍ତରରେ ମଧ୍ୟ ପାକିସ୍ତାନ ସରକାରଙ୍କ ଉପରେ ଚାପ ବଢ଼ାଇପାରେ। ଇମ୍ରାନ ଖାନ ପାକିସ୍ତାନ କ୍ରିକେଟ୍ର ସବୁଠାରୁ ଚର୍ଚ୍ଚିତ ଚେହେରାଙ୍କ ମଧ୍ୟରୁ ଜଣେ । ତାଙ୍କ ଅଧିନାୟକତ୍ୱରେ ପାକିସ୍ତାନ ୧୯୯୨ରେ କ୍ରିକେଟ୍ ବିଶ୍ୱକପ୍ ଜିତିଥିଲା। ପରେ ସେ ରାଜନୀତିରେ ପ୍ରବେଶ କରି ପାକିସ୍ତାନର ପ୍ରଧାନମନ୍ତ୍ରୀ ହୋଇଥିଲେ। ବର୍ତ୍ତମାନ ତାଙ୍କ ଦୀର୍ଘ ଜେଲ୍ ଜୀବନ ଏବଂ ସୁରକ୍ଷାକୁ ନେଇ ତାଙ୍କ ପରିବାରର ଏହି ଅଭିଯୋଗ ପୁଣି ଚର୍ଚ୍ଚାରେ ଆସିଛି ।
