ନୂଆଦିଲ୍ଲୀ,୬।୨: ପାକିସ୍ତାନର ଦୋମୁହାଁ ଚରିତ୍ର ଏବେ ସାରା ବିଶ୍ୱ ଆଗରେ ପୁଣିଥରେ ପ୍ରକଟ ହୋଇଛି। ଗୋଟିଏ ପଟେ ପାକିସ୍ତାନ ଭାରତ ବିରୋଧରେ କ୍ରିକେଟକୁ ଅସ୍ତ୍ର କରି ଟି-୨୦ ବିଶ୍ୱକପ୍ ମ୍ୟାଚ୍ ବର୍ଜନ କରିବାକୁ ନିଷ୍ପତ୍ତି ନେଇଛି। ଅନ୍ୟପଟେ ନିଜର ଦେବାଳିଆ ଅର୍ଥନୀତିକୁ ବଞ୍ଚାଇବା ପାଇଁ ଭାରତୀୟ ବଂଶୋଦ୍ଭବ ବିଶ୍ୱ ବ୍ୟାଙ୍କ ମୁଖ୍ୟ ଅଜୟ ବଙ୍ଗାଙ୍କ ପାଇଁ ଲାଲ୍ କାର୍ପେଟ୍ ବିଛାଇଛି।
ଏହି ସପ୍ତାହରେ ବିଶ୍ୱ ବ୍ୟାଙ୍କ ମୁଖ୍ୟ ଅଜୟ ବଙ୍ଗା ଚାରି ଦିନିଆ ପାକିସ୍ତାନ ଗସ୍ତରେ ଆସିଥିବା ବେଳେ ତାଙ୍କୁ ଜଣେ ବଡ଼ ବିଶ୍ୱନେତାଙ୍କ ଭଳି ସ୍ୱାଗତ କରାଯାଇଥିଲା। ଘୋଡ଼ସୱାର ସୈନ୍ୟ ଏବଂ ବ୍ୟାଣ୍ଡ ପାର୍ଟିର ସଙ୍ଗୀତ ତାଳେ ତାଳେ ତାଙ୍କୁ ପାଛୋଟି ନିଆଯାଇଥିଲା। ଆଶ୍ଚର୍ଯ୍ୟର କଥା ହେଉଛି, ତାଙ୍କ ସ୍ୱାଗତ ପାଇଁ ବଲିଉଡ ଗୀତ “ମେରା ପିୟା ଘର ଆୟା” ବଜାଯାଇଥିଲା।
ଏହି ଅତିରିକ୍ତ ସମ୍ମାନ ପଛର ଅସଲ କାରଣ ହେଉଛି ପାକିସ୍ତାନର ଆର୍ଥିକ ସଙ୍କଟ। ପାକିସ୍ତାନ ଉପରେ ଏବେ ପ୍ରାୟ $୧୩୫ ବିଲିୟନ (ପ୍ରାୟ ୧୧ ଲକ୍ଷ କୋଟି ଟଙ୍କା) ର ବୈଦେଶିକ ଋଣ ରହିଛି, ଯାହାର ପ୍ରାୟ ପଞ୍ଚମାଂଶ କେବଳ ବିଶ୍ୱ ବ୍ୟାଙ୍କରୁ ନିଆଯାଇଛି। ଆଗାମୀ ୧୦ ବର୍ଷ ପାଇଁ ବିଶ୍ୱ ବ୍ୟାଙ୍କରୁ $୨୦ ବିଲିୟନ ସହାୟତା ପାଇବା ଆଶାରେ ପାକିସ୍ତାନ ଏହି ଭବ୍ୟ ଆୟୋଜନ କରିଛି।
ସେହିପରି ପାକିସ୍ତାନ ପାଇଁ ସିନ୍ଧୁ ନଦୀ ଜଳ ଚୁକ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଗତବର୍ଷ ପହଲଗାମ୍ ଆତଙ୍କବାଦୀ ଆକ୍ରମଣ ପରେ ଭାରତ ଏହି ଚୁକ୍ତିକୁ ସ୍ଥଗିତ ରଖିଛି। ପାକିସ୍ତାନର କୃଷି କ୍ଷେତ୍ରର ୮୦% ଚାଷକାର୍ଯ୍ୟ ସିନ୍ଧୁ ନଦୀ ଉପରେ ନିର୍ଭର କରେ। କୃଷି କ୍ଷେତ୍ର ପାକିସ୍ତାନର ଜିଡିପି (GDP) ର ୨୫% ଅଟେ। ଏହି ବିବାଦରେ ବିଶ୍ୱ ବ୍ୟାଙ୍କର ସମର୍ଥନ ପାଇବା ପାଇଁ ପାକିସ୍ତାନ ସରକାର ଅଜୟ ବଙ୍ଗାଙ୍କୁ ପ୍ରସନ୍ନ କରିବାକୁ ଚେଷ୍ଟା କରୁଛନ୍ତି।
ପାକିସ୍ତାନର ଏହି ଅତ୍ୟଧିକ ଚାଟୁକାରିତାକୁ ନେଇ ସୋସିଆଲ ମିଡିଆରେ ନିଜ ଦେଶର ଲୋକେ ହିଁ ସରକାରଙ୍କୁ ଟ୍ରୋଲ୍ କରୁଛନ୍ତି। ଜଣେ ବ୍ୟାଙ୍କ କର୍ମଚାରୀଙ୍କୁ ଏତେ ବଡ଼ ପ୍ରୋଟୋକଲ୍ ଦେବାକୁ କିଛି ଲୋକ ‘ଭିକ ମାଗିବାର ନୂଆ ଶୈଳୀ’ ବୋଲି କହିଛନ୍ତି। ପ୍ରଧାନମନ୍ତ୍ରୀ ଶେହବାଜ ସରିଫ୍ ମଧ୍ୟ ସ୍ୱୀକାର କରିଛନ୍ତି ଯେ, ବିଦେଶରେ ଭିକ ମାଗିବା ବେଳେ ତାଙ୍କ ମୁଣ୍ଡ ଲାଜରେ ନଇଁଯାଉଛି।
