ଭୁବନେଶ୍ୱର,୨୯ା୭(ବ୍ୟୁରୋ): ୟୁନାଇଟେଡ୍ ନେସନ୍ସ (ମିଳିତ ଜାତିସଂଘ)ର ‘କ୍ଲାଇମେଟ୍ ଚେଞ୍ଜ’ ବା ଜଳବାୟୁ ପରିବର୍ତ୍ତନ ୟୁଥ୍ ଆଡ୍ଭାଇଜରି ଗ୍ରୁପ୍ରେ ସ୍ଥାନ ପାଇଛନ୍ତି ଜଣେ ଓଡ଼ିଆ ଝିଅ। ସୁନ୍ଦରଗଡ଼ ଜିଲାର ଖଡ଼ିଆ ଆଦିବାସୀ ସମ୍ପ୍ରଦାୟର ଝିଅ ଅର୍ଚ୍ଚନା ସୋରେଙ୍ଗ ଭାରତରୁ ପ୍ରତିନିଧିତ୍ୱ କରିବାକୁ ମନୋନୀତ ହୋଇଛନ୍ତି। ସମଗ୍ର ବିଶ୍ୱରୁ ମାତ୍ର ୭ଜଣ ଏହି ଆଡ୍ଭାଇଜରି ଗ୍ରୁପ୍ର ସଦସ୍ୟ ହେବାକୁ ମନୋନୀତ ହୋଇଥିବାବେଳେ ଏମାନଙ୍କ ମଧ୍ୟରେ ଅର୍ଚ୍ଚନା ଅଛନ୍ତି। ଅର୍ଚ୍ଚନାଙ୍କ ଏହି ସଫଳତା ରାଜ୍ୟବାସୀଙ୍କ ପାଇଁ ଗୌରବ ଆଣିଦେଇଛି।
ମିଳିତ ଜାତିସଂଘ ବା ୟୁନାଇଟେଡ୍ ନେସନ୍ସ (ୟୁଏନ୍)ର ମହାସଚିବଙ୍କ ଦ୍ୱାରା ପ୍ରତିଷ୍ଠିତ ଏହି ଗ୍ରୁପ୍ ୟୁଏନ୍ ୟୁଥ୍ ଷ୍ଟ୍ରାଟେଜିର ଏକ ପ୍ରମୁଖ ଅଂଶ। ଗତ ୨୭ ତାରିଖରେ ୟୁଏନ୍ ମହାସଚିବ ଆଣ୍ଟୋନିଓ ଗୁଟେରେସ୍ ୧୮ରୁ ୨୮ବର୍ଷ ବୟସ ମଧ୍ୟରେ ଏହି ୭ଜଣିଆ ସଦସ୍ୟଙ୍କ ନାମ ଘୋଷଣା କରିଛନ୍ତି। ଆଗାମୀ ଦିନରେ ଏହି ଯୁବ କ୍ଲାଇମେଟ୍ ଲିଡରମାନେ ଆଣ୍ଟୋନିଓଙ୍କୁ ବିଶ୍ୱରେ ଜଳବାୟୁ ପରିବର୍ତ୍ତର ସ୍ଥିତି, ଏହାର ପ୍ରଭାବ, ସମାଧାନ ଏବଂ ରାଷ୍ଟ୍ରମାନେ ଗ୍ରହଣ କରୁଥିବା ପଦକ୍ଷେପ ସମ୍ପର୍କରେ ଅବଗତ କରାଇବେ। ବିଶ୍ୱ ଏବେ ଏକ ସଙ୍କଟଜନକ ପରିସ୍ଥିତି ମଧ୍ୟଦେଇ ଗତି କରୁଥିବାବେଳେ ଜଳବାୟୁ ପରିବର୍ତ୍ତନ ଏକ ଜରୁରିକାଳୀନ ସ୍ଥିତିରେ ପହଞ୍ଚତ୍ଛି। ତେଣୁ ତ୍ୱରିତ କାର୍ଯ୍ୟାନୁଷ୍ଠାନ ନିଆ ନ ଗଲେ ଭବିଷ୍ୟତରେ କୋଭିଡ୍-୧୯ ଭଳି ସମସ୍ୟା ଅଧିକ ଉପୁଜିବ ବୋଲି ଆଣ୍ଟୋନିଓ ଭିଡିଓ କନ୍ଫରେନ୍ସରେ ଏହି ଯୁବ ନେତୃତ୍ୱମାନଙ୍କୁ କହିଛନ୍ତି। ଏହି ୭ଜଣିଆ ଗ୍ରୁପ୍ରେ ଭାରତ ସମେତ ସୁଦାନ, ଫିଜି, ଯୁକ୍ତରାଷ୍ଟ୍ର ଆମେରିକା, ଫ୍ରାନ୍ସ, ମାଲ୍ଡିଭସ୍ ଏବଂ ବ୍ରାଜିଲର ଜଣେ ଜଣେ ପ୍ରତିନିଧି ରହିଛନ୍ତି। ଅର୍ଚ୍ଚନା ମୁମ୍ବାଇର ଏକ ଶିକ୍ଷାନୁଷ୍ଠାନରୁ ଆର୍ଟସରେ ମାଷ୍ଟର ଡିଗ୍ରୀ ହାସଲ କରିଛନ୍ତି। ବର୍ତ୍ତମାନ ସେ କଟକସ୍ଥିତ ଷ୍ଟେ ହୋମ୍ ‘ବସୁନ୍ଧରା’ର ରିସର୍ଚ୍ଚ ଅଫିସର ଭାବେ କାର୍ଯ୍ୟ କରିଛନ୍ତି। ଜଳବାୟୁ ପରିବର୍ତ୍ତନ ସମ୍ପର୍କିତ ବହୁ ଆଲୋଚନାରେ ସାମିଲ ହୋଇଥିବା ଅର୍ଚ୍ଚନାଙ୍କ ନିବନ୍ଧ ଜାତୀୟ ଓ ଅନ୍ତର୍ଜାତୀୟ ୟୁଥ୍ ଓ୍ବେବ୍ସାଇଟ୍ରେ ପ୍ରକାଶିତ ହୋଇଛି। ସେହିଭଳି ଆଞ୍ଚଳିକସ୍ତରରେ ସେ ବହୁ ଯୁବଗୋଷ୍ଠୀ ସହ ଜଡ଼ିତ ରହି ଓଡ଼ିଶାର ଜନଜାତି ସମ୍ପ୍ରଦାୟର ସୁରକ୍ଷା ଦିଗରେ କାର୍ଯ୍ୟ କରୁଛନ୍ତି। ଜନଜାତି ନୃତ୍ୟ ଓ ସଙ୍ଗୀତରେ ତାଙ୍କର ବିଶେଷ ଆଗ୍ରହ ରହିଛି।
