ବଇଣ୍ଡା,୩୦।୧୧(ଡି.ଏନ.ଏ.)- କିଶୋରନଗର ବ୍ଲକ ବଇଣ୍ଡା ରାମଦେଓ ଉଚ୍ଚ ବିଦ୍ୟାଳୟ ଛାତ୍ରାବାସକୁ ସୋମବାର କିଶୋରନଗର ତହସିଲ ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ଏହି ଉଚ୍ଛେଦକୁ ବିଦ୍ୟାଳୟ ପରିଚାଳନା କମିଟି, ବଇଣ୍ଡା ଗ୍ରାମବାସୀ, କିଶୋରଗଞ୍ଜ ପ୍ରାଥମିକ ବିଦ୍ୟାଳୟର ମୋ ସ୍କୁଲ ଅଭିଯାନ କମିଟି ପକ୍ଷରୁ ବିରୋଧ କରାଯାଇଥିଲା। ଜାତୀୟ ରାଜପଥ ସମ୍ପ୍ରସାରଣ କରୁଥିବା ଠିକାସଂସ୍ଥାର କର୍ମଚାରୀ ଜିଲା ପ୍ରଶାସନ ପକ୍ଷରୁ ଏକ ଚିଠି ଆଣି ପ୍ରଧାନଶିକ୍ଷୟିତ୍ରୀଙ୍କୁ ଦେବା ପରେ ଉଚ୍ଛେଦ ପକ୍ରିୟା ଆରମ୍ଭ ହୋଇଥିଲା। ତେବେ ଆବାସରେ ଥିବା ସାମଗ୍ରୀଗୁଡିକ ବାହାର କରିବା ପାଇଁ ସମୟ ଦିଆଯାଇ ନ ଥିବା ଯୋଗୁ ଗ୍ରାମବାସୀ ବିରୋଧ କରିଥିଲେ। କିଶୋରନଗର ତହସିଲଦାର ଶାନ୍ତି ସ୍ବରୂପ ମିଶ୍ର, ବଇଣ୍ଡା ଫାଣ୍ଡି ଅଧିକାରୀ ଅରୁଣ ପଣ୍ଡା, ବଇଣ୍ଡା ରାଜସ୍ବ ଅଧିକାରୀ, କମ୍ପାନୀ ଅଧିକାରୀଙ୍କ ସମେତ ପୋଲିସ କର୍ମଚାରୀ ଉପସ୍ଥିତରେ ଉଚ୍ଛେଦ କରାଯାଇଥିଲା। ଗ୍ରାମବାସୀ କହିଛନ୍ତି, କିଶୋରଗଞ୍ଜ ପ୍ରାଥମିକ ବିଦ୍ୟାଳୟକୁ ବିଦ୍ୟାଳୟ ନିକଟରେ ସ୍ଥାପନ କରିବା ପାଇଁ ଗ୍ରାମବାସୀ ଦାବି କରୁଥିଲେ। ହେଲେ ବଇଣ୍ଡା ଅଞ୍ଚଳର କେତେଜଣ ଲୋକ ଓ ପ୍ରଶାସନିକ ଅଧିକାରୀମାନେ ହାଇସ୍କୁଲ ନିକଟରେ କିଶୋରଗଞ୍ଜ ସ୍କୁଲ ନିର୍ମାଣ ପାଇଁ ଯୋଜନା କରିବା ସହ ଛାତ୍ରାବାସ ଉଚ୍ଛେଦ କରିଛନ୍ତି। କିଶୋରନଗର ତହସିଲଦାର ଶାନ୍ତିସ୍ବରୂପ ମିଶ୍ର କହିଛନ୍ତି, ଜିଲା ପ୍ରଶାସନର ନିର୍ଦ୍ଦେଶକ୍ରମେ ଛାତ୍ରାବାସ ଉଚ୍ଛେଦ କରାଯାଇଛି।
ଫଟୋ-ଜେସିବି ମେଶିନ ସହାୟତାରେ ଛାତ୍ରାବାସ ଉଚ୍ଛେଦ କରାଯାଉଛି।
