ଭଞ୍ଜନଗର,୨୮।୭(ବାବୁଲା ପ୍ରଧାନ): ମହାରାଷ୍ଟ୍ରର ଏକ ଘରୋଇ ବିସ୍ଫୋରକ ଉତ୍ପାଦନ କମ୍ପାନୀ ଗଞ୍ଜାମ ଜିଲା ଜଗନ୍ନାଥପ୍ରସାଦ ବ୍ଲକ ଘାଟିପଲ୍ଲୀ ଓ ଲଣ୍ଡେଇହିଲଠାରେ ଗୋଳାବାରୁଦ କାରଖାନା ନିର୍ମାଣ ଯୋଜନା କରୁଛି। ତେଣୁ ଏହାକୁ ସଂପୃକ୍ତ ଅଞ୍ଚଳବାସୀ ଦୃଢ଼ ବିରୋଧ କରୁଛନ୍ତି। ଏହିଭଳି ପରିସ୍ଥିତିରେ ରବିବାର ସିପିଆଇ (ଏମ) ପୂର୍ବତନ ରାଜ୍ୟ ସଂପାଦକ ଅଳି କିଶୋର ପଟ୍ଟନାୟକଙ୍କ ନେତୃତ୍ୱରେ ଏକ ଟିମ ଘଟଣାସ୍ଥଳକୁ ପରିଦର୍ଶନ କରି ଉକ୍ତ ପ୍ରକଳ୍ପ ନିର୍ମାଣ ଯୋଜନାକୁ ବିରୋଧ କରିଥିଲେ। ଏଥିସହ ଏନେଇ ସଂପୃକ୍ତ ଅଞ୍ଚଳବାସୀଙ୍କ ସହ ଆଲୋଚନା କରିଥିଲେ। କାରଖାନା ଯେଭଳି ସେଠାରେ ନହେବ ସେଥିପାଇଁ ରାଜ୍ୟସାରା ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ପଟ୍ଟନାୟକ ଗଣମାଧ୍ୟମ ସମ୍ମୁଖରେ କହିଛନ୍ତି। ଗୋଳାବାରୁଦ କାରଖାନା ହେଲେ ତାହାର କୁପ୍ରଭାବ ୧୦ କି.ମି.ପର୍ଯ୍ୟନ୍ତ ପଡିବ। ବେଲଗୁଣ୍ଠା ଏବଂ ଜଗନ୍ନାଥପ୍ରସାଦ ସହରରେ ମଧ୍ୟ ତାହାର କୁପ୍ରଭାବ ପଡିବ। କାରଖାନା ନିର୍ମାଣ ହେଲେ ମାତ୍ର ୧୫୦ ଜଣ ମଧ୍ୟରେ ନିଯୁକ୍ତି ପାଇବେ। କିନ୍ତୁ ଏହାର କୁପ୍ରଭାବ ଦେଢ଼ ଲକ୍ଷ ଲୋକଙ୍କ ଉପରେ ପଡିବ। ବାୟୁ, ଜଳ ,ଜଙ୍ଗଲ ଉପରେ ପ୍ରଭାବ ପଡିବ। ତେଣୁ ସରକାର ଏନେଇ କିଛି ପଦକ୍ଷେପ ନେବାକୁ ଦାବି ହୋଇଛି। ସିପିଆଇଏମ ଗଞ୍ଜାମ ଜିଲା ସମ୍ପାଦକ ଯୁଧିଷ୍ଠିର ବେହେରା, କ୍ଷେତ ମଜଦୂର ସମ୍ପାଦକ ବିଦ୍ୟାଧର ଜେନା , ଓଡିଶା କୃଷକ ସଭା ଜିଲା ସମ୍ପାଦକ ହରି କୃଷ୍ଣ ରେଡି,ବିଭୁ ପ୍ରସାଦ ପାଣିଗ୍ରାହୀ, ନୀଳମଣି ଗୁରୁ, ଯୁବ ନେତା ଦିଲ୍ଲୀପ ପଗଡ଼,ଦୀନ ବନ୍ଧୁ ଜେନା,ବରିଷ୍ଠ ଆଇନଜୀବୀ ତଥା ସିପିଆଇ (ଏମ) ନେତା ଅଭିମନ୍ୟୁ ଗୌଡ଼ ପ୍ରମୁଖ ଟିମରେ ସାମିଲ ଥିଲେ। କମ୍ପାନୀ ପାଇଁ ଆସନ୍ତା ୩୦ରେ ହେବାକୁ ଥିବା ଜନ ଶୁଣାଣି ଶିବିରକୁ ସ୍ଥଗିତ କରିବା ସହ ଜନ ସାଧାରଣଙ୍କ ସ୍ବାର୍ଥ ଦୃଷ୍ଟିରୁ ଏହାକୁ ବନ୍ଦ କରିବାକୁ ସରକାରଙ୍କ ପାଖରେ ଦାବି କରାଯାଇଥିଲା।
