ମହାକାଳପଡ଼ା, ୧୦।୧୧ (ପ୍ରତାପ ଚନ୍ଦ୍ର ସ୍ୱାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ୍ ଅନ୍ତର୍ଗତ ଜଗରୀଜୋର ହାଟ କାଳୀ ପଡ଼ିଆଠାରେ ମଙ୍ଗଳବାର ସନ୍ଧ୍ୟାରେ ୫ମ ବାର୍ଷିକ ଗହୀରମଥା ମହୋତ୍ସବ ଉଦ୍ଘାଟିତ ହୋଇଯାଇଛି। ପ୍ରଥମେ ମା’ ଶ୍ୟାମା କାଳୀଙ୍କ ଆଳତୀ ଦର୍ଶନ ଓ ଆଶୀର୍ବାଦ ଭିକ୍ଷା ପରେ ବିଧାୟକ ଡକ୍ଟର ଦୁର୍ଗା ପ୍ରସନ୍ନ ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଏହି ମହୋତ୍ସବକୁ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ।
ଗହୀରମଥାର ସାମୁଦ୍ରିକ ନରମ ଓ ଉଷ୍ମ ବାଲୁକା ଶଯ୍ୟା ବିରଳ ଅଲିଭ୍ ରିଡ୍ଲେ କଇଁଛମାନଙ୍କର ଏକ ପ୍ରମୁଖ ତଥା ଉତ୍କୃଷ୍ଟ ଅନ୍ତୁଡ଼ିଶାଳ। ସୁଦୂର ପ୍ରଶାନ୍ତ ମହାସାଗରରୁ ହଜାର ହଜାର ମାଇଲ୍ ବାଟ ଅତିକ୍ରମ କରି ଅଲିଭ୍ ରିଡ୍ଲେ କଇଁଛମାନେ ଏଠାକୁ ଅଣ୍ଡାଦାନ ପାଇଁ ଆସିଥାନ୍ତି। ଅଣ୍ଡାଦାନ ଶେଷ କରି ସେମାନେ ଫେବୃଆରୀ-ମାର୍ଚ୍ଚ ମାସ ସୁଦ୍ଧା ନିଜ ଗନ୍ତବ୍ୟ ସ୍ଥଳକୁ ଫେରିଯାନ୍ତି। ଦିନର ସୂର୍ଯ୍ୟ ଆଲୋକ ଓ ଉତ୍ତାପରେ ଫୁଟୁଥିବା ଅଣ୍ଡାରୁ ମାଈ ଶାବକ ଏବଂ ଶୀତଳ ରାତିରେ ଫୁଟୁଥିବା ଅଣ୍ଡାରୁ ଅଧିକାଂଶ ପୁରୁଷ ଶାବକ ଜନ୍ମ ନିଅନ୍ତି ବୋଲି ପରିବେଶବିତ୍ମାନେ ମତ ପ୍ରକାଶ କରିଛନ୍ତି। ବିଶ୍ୱ ଐତିହ୍ୟରେ ଗହୀରମଥା ଓଡ଼ିଆ ଅସ୍ମିତାର ପ୍ରତୀକ, ଗର୍ବ ଓ ଗୌରବ ବୋଲି ସଭାରେ ଉପସ୍ଥିତ ଅତିଥିମାନେ କହିଥିଲେ। ମହୋତ୍ସବ କମିଟି ସଭାପତି ସମରେନ୍ଦ୍ର ମାହାଳିଙ୍କ ସଭାପତିତ୍ୱରେ ଆୟୋଜିତ ଏହି ସଭାରେ ସମ୍ପାଦକ ସୁବାସ ସ୍ୱାଇଁ ଗହୀରମଥାର ଐତିହାସିକ ଗାରିମା ସମ୍ପର୍କରେ ବିବରଣୀ ପାଠ କରିଥିଲେ।
ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ତନ୍ତିଆପାଳ ସାମୁଦ୍ରିକ ଥାନା ଅଧିକାରୀ ନରେଶ ଚନ୍ଦ୍ର ସାହୁ, ସ୍ଥାନୀୟ ଚିକିତ୍ସକ ରଶ୍ମିତା ମିଶ୍ର, ସରପଞ୍ଚ ଭଗବତୀ ମଣ୍ଡଳ, ଖବରଦାତା ପରେଶ ଦାସ, ସରୋଜ କାନ୍ତ ସାହୁ, ପବିତ୍ର ଚୌଧୁରୀ, ଗଗନ ବିହାରୀ ପ୍ରଧାନ ଓ ମନୋଜ ପାତ୍ର ପ୍ରମୁଖ ଯୋଗଦେଇ ଗହୀରମଥାର ଗାଥା ଉପରେ ଆଲୋକପାତ କରିଥିଲେ। ବିରଞ୍ଚି ନାରାୟଣ ଦାସ ଓ ଅଶୋକ ସ୍ୱାଇଁ ମଞ୍ଚ ପରିଚାଳନା କରିଥିଲେ। ଏହି ଅବସରରେ ଶିଶୁମାନଙ୍କ ଦ୍ୱାରା ନୃତ୍ୟ ଓ ସଙ୍ଗୀତ ପରିବେଷଣ କରାଯାଇଥିବା ବେଳେ କେତେକ ବିଶିଷ୍ଟ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା।
