ନୂଆଦିଲ୍ଲୀ,୧୦।୧୧: ଭାରତୀୟ ମହିଳା କ୍ରିକେଟ୍ରେ ଆରମ୍ଭ ହୋଇଛି ସ୍ମୃତି ମନ୍ଧାନା ଯୁଗ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ସ୍ମୃତି ମନ୍ଧାନାଙ୍କୁ ଟେଷ୍ଟ ଦଳର ଅଧିନାୟିକା ଭାବେ ନିଯୁକ୍ତ କରିଛି। ଏହା ପୂର୍ବରୁ ସେ ଦିନିକିଆ ଓ ଟି-୨୦ ଦଳର ନେତୃତ୍ୱ ନେଉଥିଲେ। ଏବେ ତିନୋଟି ଫର୍ମାଟ୍ରେ ସେ ଭାରତୀୟ ମହିଳା ଦଳର ଅଧିନାୟିକା ହୋଇଛନ୍ତି। ହରମନପ୍ରୀତ କୌରଙ୍କ ସ୍ଥାନରେ ତାଙ୍କୁ ଏହି ଦାୟିତ୍ୱ ମିଳିଛି।
ଡିସେମ୍ବରରେ ହେବାକୁ ଥିବା ଦକ୍ଷିଣ ଆଫ୍ରିକା ଗସ୍ତ ପାଇଁ BCCI ଭାରତୀୟ ଦଳ ଘୋଷଣା କରିଛି। ପୂର୍ଣ୍ଣକାଳୀନ ଅଧିନାୟିକା ହେବା ପରେ ସ୍ମୃତି ପ୍ରଥମ ଥର ପାଇଁ ବିଦେଶ ଗସ୍ତରେ ଭାରତୀୟ ଦଳର ନେତୃତ୍ୱ ନେବେ। ଏସିଆ କପ, ଏସୀୟ କ୍ରୀଡ଼ା ଏବଂ ଘରୋଇ ମାଟିରେ ଜିମ୍ବାୱେ ବିପକ୍ଷ ସିରିଜରୁ ବାଦ ପଡ଼ିଥିବା ଷ୍ଟାର୍ ଖେଳାଳି ଜେମିମା ରୋଡ୍ରିଗ୍ସ ଶେଷରେ ଅନ୍ତର୍ଜାତୀୟ କ୍ରିକେଟକୁ ଫେରିଛନ୍ତି। ତାଙ୍କୁ ତିନୋଟି ଫର୍ମାଟରେ ଦଳରେ ସ୍ଥାନ ମିଳିଛି। ଅଭିଜ୍ଞ ଅଲରାଉଣ୍ଡର ଦୀପ୍ତି ଶର୍ମା ଟେଷ୍ଟ ଓ ଦିନିକିଆ ଦଳର ଉପଅଧିନାୟିକା ରହିବେ। ସେହିପରି ଟି-୨୦ ଫର୍ମାଟରେ ଶେଫାଳି ବର୍ମାଙ୍କୁ ଉପଅଧିନାୟିକା ଦାୟିତ୍ୱ ମିଳିଛି। ଯୁବ ଖେଳାଳି ଜିନ୍ତିମଣି କଳିତାଙ୍କୁ ପ୍ରଥମ ଥର ପାଇଁ ଭାରତୀୟ ଟେଷ୍ଟ ଦଳରେ ସାମିଲ କରାଯାଇଛି। ସେ ଏପର୍ଯ୍ୟନ୍ତ ଭାରତ ପାଇଁ ୩ଟି ଦିନିକିଆ ମ୍ୟାଚ ଖେଳିଛନ୍ତି।
ଅଧିନାୟିକା ଭାବେ ସ୍ମୃତି ମନ୍ଧାନା ଘରୋଇ ମାଟିରେ ଟି-୨୦ ଓ ଦିନିକିଆ ସିରିଜ୍ରେ ବିଜୟ ସହ ନିଜର ଅଭିଯାନ ଆରମ୍ଭ କରିଥିଲେ। ଏବେ ଦକ୍ଷିଣ ଆଫ୍ରିକା ଗସ୍ତରେ ମଧ୍ୟ ସେହି ସଫଳତାକୁ ଜାରି ରଖିବା ତାଙ୍କର ଲକ୍ଷ୍ୟ ରହିବ। ଆସନ୍ତା ଜାନୁଆରୀରେ ହେବାକୁ ଥିବା ମହିଳା ଚାମ୍ପିଅନ୍ସ ଟ୍ରଫି ପୂର୍ବରୁ ଏହି ସିରିଜ ଭାରତୀୟ ଦଳ ପାଇଁ ଗୁରୁତ୍ୱପୂର୍ଣ୍ଣ ହେବ। ଭାରତୀୟ ମହିଳା ଦଳ ଡିସେମ୍ବର ୯ରୁ ୩୦ ତାରିଖ ମଧ୍ୟରେ ଦକ୍ଷିଣ ଆଫ୍ରିକା ଗସ୍ତରେ ଗୋଟିଏ ଟେଷ୍ଟ, ୩ଟି ଦିନିକିଆ ଏବଂ ୩ଟି ଟି-୨୦ ମ୍ୟାଚ ଖେଳିବ।
Dharitri – Odisha’s No.1 Odia Daily
