ପ୍ରିଷ୍ଟିନା,୯ା୮: କୋସୋଭୋର ସଂସଦରେ ଶନିବାର ଜୋରଦାର ହଙ୍ଗାମା ଦେଖିବାକୁ ମିଳିଛି। ସଂସଦୀୟ କାର୍ଯ୍ୟବାହୀ ଚାଲିଥିବା ସମୟରେ ଜଣେ ବିରୋଧୀ ଏମପି କାର୍ଯ୍ୟବାହୀ ପ୍ରଧାନମନ୍ତ୍ରୀ ଆଲବିନ କୁର୍ତିଙ୍କ ଉପରକୁ ଅଣ୍ଡା ଫିଙ୍ଗିଥିଲେ। ଏହା ପରେ ସଂସଦର କାର୍ଯ୍ୟବାହୀକୁ ତୁରନ୍ତ ସ୍ଥଗିତ କରିବାକୁ ପଡ଼ିଥିଲା।
ଏହି ଘଟଣା ସେତେବେଳେ ଘଟିଛି, ଯେତେବେଳେ କୁର୍ତିଙ୍କ ଦଳ Vetevendosje ୭ ଜୁନ୍ ନିର୍ବାଚନ ପରେ ସରକାର ଗଠନ ପାଇଁ ବିରୋଧୀ ଦଳଗୁଡ଼ିକ ସହ ଆଲୋଚନା କରୁଛି । ୧୨୦ ସଦସ୍ୟ ବିଶିଷ୍ଟ ସଂସଦରେ ୫୩ଟି ଆସନ ଜିତି Vetevendosjeସବୁଠାରୁ ବଡ଼ ଦଳ ହୋଇଥିଲେ ମଧ୍ୟ ସରକାର ଗଠନ ପାଇଁ ଆବଶ୍ୟକ ସଂଖ୍ୟାଗରିଷ୍ଠତା ପାଖରେ ନାହିଁ। ବିରୋଧୀ ଦଳ ‘ଆଲାୟନ୍ସ ଫର୍ ଦି ଫ୍ୟୁଚର୍ ଅଫ୍ କୋସୋଭୋ’ (AAK)ର ସାଂସଦ ଟାଇମ୍ କାଦ୍ରିଜାଜ୍ ପ୍ରଥମ ଧାଡ଼ିରେ ବସିଥିବା କୁର୍ତିଙ୍କ ନିକଟକୁ ଯାଇ ତାଙ୍କ ଉପରକୁ ଏକାଧିକ ଅଣ୍ଡା ଫିଙ୍ଗିଥିଲେ। ଏହି ସମୟରେ ସେ କୁର୍ତିଙ୍କୁ ଲକ୍ଷ୍ୟ କରି ଅପଶବ୍ଦ କହିବା ସହ ‘ଲଜ୍ଜା ଲାଗିବା ଦରକାର’ ବୋଲି ଚିତ୍କାର କରିଥିଲେ। ପରିସ୍ଥିତି ନିୟନ୍ତ୍ରଣ ପାଇଁ ସୁରକ୍ଷାକର୍ମୀ ଓ ଅନ୍ୟ ସାଂସଦମାନେ ତୁରନ୍ତ ଆଗକୁ ଆସିଥିଲେ। ଘଟଣା ପରେ ସଂସଦର କାର୍ଯ୍ୟବାହୀ ସ୍ଥଗିତ କରାଯାଇଥିଲା। ସୁରକ୍ଷାକର୍ମୀମାନେ କୁର୍ତିଙ୍କୁ ଘେରି ରଖିବା ପରେ ଚେୟାରପର୍ସନ ଲାଇଭ୍ ଟେଲିଭିଜନ ପ୍ରସାରଣ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ।
ଘଟଣା ପରେ ମଧ୍ୟ କୁର୍ତି ବିଚଳିତ ହୋଇନଥିବା ଦେଖାଯାଇଥିଲା। ସେ କହିଛନ୍ତି, ଯଦି ରାଜନୈତିକ ଆଲୋଚନାକୁ ଜାରି ରଖିବାର ମୂଲ୍ୟ ଅଣ୍ଡା ମାଡ଼ ହୁଏ, ତେବେ ସେ ଏହି ମୂଲ୍ୟ ଦେବାକୁ ପ୍ରସ୍ତୁତ। ସଂସଦର ବୈଠକର ଉଦ୍ଦେଶ୍ୟ ଥିଲା ସ୍ପିକର ପଦ ପାଇଁ ପ୍ରାର୍ଥୀଙ୍କ ନାମ ଘୋଷଣା କରିବା। କିନ୍ତୁ କୁର୍ତି ଏହା ବଦଳରେ ନୂଆ ରାଷ୍ଟ୍ରପତି ନିର୍ବାଚନ ନେଇ ସହମତି ପାଇଁ ଅଧିକ ସମୟ ମାଗିଥିଲେ । ରାଷ୍ଟ୍ରପତି ପଦକୁ ନେଇ ଚାଲିଥିବା ଆଲୋଚନାରେ ଏପର୍ଯ୍ୟନ୍ତ କୌଣସି ସହମତି ହୋଇନଥିବା ସେ ସ୍ୱୀକାର କରିଛନ୍ତି।କୋସୋଭୋ ଦୀର୍ଘଦିନ ଧରି ରାଜନୈତିକ ଅସ୍ଥିରତା ସହ ସଂଘର୍ଷ କରୁଛି। ସଂସଦୀୟ ଅଚଳାବସ୍ଥା ଯୋଗୁଁ ଦୁଇ ବର୍ଷରୁ କମ୍ ସମୟ ମଧ୍ୟରେ ଏଠାରେ ତିନିଥର ସାଧାରଣ ନିର୍ବାଚନ ହୋଇସାରିଛି ।
କୁର୍ତିଙ୍କ ଦଳ ୫୩ଟି ଆସନ ଜିତିଥିବା ବେଳେ ଡେମୋକ୍ରାଟିକ୍ ଲିଗ୍ ଅଫ୍ କୋସୋଭୋ (LDK) ପାଖରେ ୧୮ଟି ଏବଂ କୋସୋଭୋ ଡେମୋକ୍ରାଟିକ୍ ପାର୍ଟି (PDK) ପାଖରେ ୨୨ଟି ଆସନ ରହିଛି। ସରକାର ଗଠନ ପାଇଁ କୁର୍ତିଙ୍କୁ ଏବେ ମଧ୍ୟ ବିରୋଧୀ ଗୋଷ୍ଠୀଙ୍କ ସମର୍ଥନ ଆବଶ୍ୟକ। କୋସୋଭୋର ନିୟମ ଅନୁସାରେ ନିର୍ବାଚନର ଚୂଡ଼ାନ୍ତ ଫଳାଫଳ ଘୋଷଣା ପରେ ୩୦ ଦିନ ମଧ୍ୟରେ ବିଧାନସଭା ଗଠନ ହେବା ଆବଶ୍ୟକ । ତେବେ ଏହି ସମୟସୀମା ଅତିକ୍ରମ କରିସାରିଛି । ଏହା ସହ ରାଷ୍ଟ୍ରପତି ନିର୍ବାଚନ ପାଇଁ ମଧ୍ୟ ଏକ ଅଲଗା ସମୟସୀମା ରହିଛି।
ନିର୍ଦ୍ଧାରିତ ସମୟ ମଧ୍ୟରେ ରାଷ୍ଟ୍ରପତି ନିର୍ବାଚିତ ନହେଲେ ପୁଣି ସଂସଦୀୟ ନିର୍ବାଚନ କରାଇବାକୁ ପଡ଼ିପାରେ। ଏଭଳି ସ୍ଥିତିରେ କୋସୋଭୋରେ ପୁଣି ନିର୍ବାଚନ ହେବାର ସମ୍ଭାବନା ବଢ଼ିଛି।
