ଭୋଗରାଇ, ୧୦।୯ (ଡି.ଏନ.ଏ.)-ଇକୋ ଟୁରିଜମ୍ସ୍ଥଳୀ ଭାବେ ମାନ୍ୟତା ପାଇଛି ବଙ୍ଗୋପସାଗର କୂଳରେ ଥିବା ବାଲେଶ୍ୱର ଜିଲା ଭୋଗରାଇ ବ୍ଲକର ବିଚିତ୍ରପୁର। ୮କି.ମି. ଲମ୍ବ ଓ ୫ କି.ମି. ପରିଧି ମଧ୍ୟରେ ଏଠାରେ ରହିଛି ୪ଟି ଛୋଟ ଛୋଟ ଆକର୍ଷଣୀୟ ଦୀପପୁଞ୍ଜ। ଜଙ୍ଗଲ ବିଭାଗ ପକ୍ଷରୁ ୫୦ ଏକର ଜାଗାରେ ବନୀକରଣ କରାଯାଇ ବିରଳ ପ୍ରଜାତିର ଗଛଲତା ସୃଷ୍ଟି କରାଯାଇଛି। ଗୋଟିଏ ଦିଗରେ ନୀଳଦରିଆର ଆକର୍ଷଣ, ଅନ୍ୟ ଦିଗରେ ପ୍ରକୃତିରାଣୀର ଶୋଭା, ପକ୍ଷୀଙ୍କ କାକଳିରେ ପରିବେଶ ମୁଖରିତ ହୋଇଉଠୁଛି। ଜଳକ୍ରୀଡ଼ା ସାଙ୍ଗକୁ ମନଲୋଭା ପରିବେଶ ବିଶେଷ ଭାବେ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ଏହି ଦୀପଗୁଡ଼ିକରେ ଗେଣ୍ଡାଳିଆ, ଦାବେଣ୍ଟିଆ, ସାରସ, ଧଳା, କଳା ବଗ ଓ ବିଭିନ୍ନ ପ୍ରଜାତିର ପକ୍ଷୀଙ୍କ କଳରବରେ ପରିବେଶ ଗୁଞ୍ଜରିତ ହୋଇଥାଏ। ଏହାବ୍ୟତୀତ ଅରଣା ମହିଷୀ, ବାର୍ହା, ବାଘ ଭଳି ଦେଖାଯାଉଥିବା ପଶୁ, ଘୁଷୁରି ଆଦି ବନ୍ୟପ୍ରାଣୀ ଦେଖାଯାନ୍ତି। ଶୀତ ଋତୁରେ ବିଦେଶାଗତ ନାନାଦି ପକ୍ଷୀ ଏହି ନିଃଶବ୍ଦ ବନାନୀରେ ଅତିଥି ଭାବେ ସାମିଲ ହୋଇଥାନ୍ତି। ଜଳରାଶିରେ ନାଲି କଙ୍କଡ଼ାର ଲୁଚକାଳି ଖେଳ, ସମୁଦ୍ର କୂଳରେ ଅଲିଭରିଡ୍ଲେ କଇଁଛର ଅଣ୍ଡାଦାନ, ଡଲଫିନ୍ର ଜଳକ୍ରୀଡ଼ା ପର୍ଯ୍ୟଟକଙ୍କୁ ବିମୋହିତ କରେ।
ସାମୁଦ୍ରିକ ଝଡ଼ ଓ ସମୁଦ୍ରର ଉତ୍ତାଳ ଢ଼େଉ କୂଳଆଡ଼କୁ ମାଡ଼ି ଆସି ମୃତ୍ତିକା କ୍ଷୟ କରୁଥିବାରୁ ବିଶାଳ ଝାଉଁ ଜଙ୍ଗଲ ସୃଷ୍ଟି କରାଯାଇ କୂଳକୁ ସୁରକ୍ଷା କରାଯାଇପାରୁଛି। ଝାଉଁ ଜଙ୍ଗଲର ସୁଲୁସୁଲିଆ ପବନ ସାଙ୍ଗକୁ ସୁ ସୁ ଶବ୍ଦ, ସୂର୍ଯ୍ୟୋଦୟ ଓ ସୂର୍ଯ୍ୟାସ୍ତର ଅପୂର୍ବ ଶୋଭା ପର୍ଯ୍ୟଟକଙ୍କୁ ବାନ୍ଧି ରଖେ। ଏଠାରେ ପର୍ଯ୍ୟଟକଙ୍କ ଆଗମନ ଓ ରହଣି ନିମନ୍ତେ ସବୁଜ ବନାନୀ ମଧ୍ୟରେ ନିର୍ମାଣ ହୋଇଛି ପ୍ରକୃତି ନିବାସ। ଶୀତତାପ ନିୟନ୍ତ୍ରିତ ୬ଟି ଟେଣ୍ଟ ଓ ୪ଟି କଟେଜ କରାଯାଇଛି। ଏଠାରେ ରହିବା ପାଇଁ ପର୍ଯ୍ୟଟକଙ୍କୁ ୩୬ଶହରୁ ଊର୍ଦ୍ଧ୍ୱ ଶୁଳ୍କ ଦେବାକୁ ପଡ଼ିଥାଏ। ଟ୍ୟୁରିଜମ୍ ସ୍ପଟରୁ ବିଭିନ୍ନ ଦ୍ୱୀପପୁଞ୍ଜ ଉପଭୋଗ କରିବାକୁ ଜଳରାଶିରେ ୨ଟି ସୌଖୀନ ଯନ୍ତ୍ରଚାଳିତ ଡଙ୍ଗା ବିଭାଗ ପକ୍ଷରୁ ଯୋଗାଇ ଦିଆଯାଇଛି। ପ୍ରତ୍ୟେକ ଡଙ୍ଗାରେ ୪ରୁ ୮ଜଣ ପର୍ଯ୍ୟଟକ ଟିକେଟ କାଟି ଦ୍ୱୀପପୁଞ୍ଜ ବୁଲି ମଜା ନେବାର ସୁବିଧା କରାଯାଇଛି। ୨୦୧୩ରେ ୪୦ଲକ୍ଷ ଟଙ୍କା ବ୍ୟୟ ଅଟକଳ କରାଯାଇ ଅଫିସ୍ ଗୃହ ସମେତ ପରିଧି ମଧ୍ୟରେ ଗୋଟିଏ ସଙ୍କୀର୍ଣ୍ଣ ରାସ୍ତା ନିର୍ମାଣ କରାଯାଇଛି। ଭିତ୍ତିଭୂମି ସୁଦୃଢ଼ ଥିବା ଓ ଅନେକ ଆକର୍ଷଣ ଥିବା ପର୍ଯ୍ୟଟକଙ୍କ ସକାଶେ ରାସ୍ତାଘାଟକୁ ଆଲୋକୀକରଣ କରି ସଜେଇ ରଖିବା ସହ ପାନୀୟ ଜଳ ସଙ୍କଟକୁ ଦୂରୀଭୂତ କରିବାକୁ ସ୍ବତନ୍ତ୍ର ଆର୍ଥିକ ପ୍ୟାକେଜ୍ ଆବଶ୍ୟକତା ରହିଛି ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି। ଗତ ୟାସ୍ ବାତ୍ୟାରେ ବହୁ ମୂଲ୍ୟବାନ ଗଛ ଧରାଶାୟୀ ହୋଇଛି। ୧୩ରୁ ୧୪ଫୁଟ୍ ଉଚ୍ଚରେ ଜୁଆର ମାଡ଼ିଆସି ବହୁ କ୍ଷତି କରିଥିବାରୁ ଓଡ଼ିଶା ସରକାର ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ପର୍ଯ୍ୟଟନସ୍ଥଳୀର ବିକାଶ ନିମନ୍ତେ ରାଜ୍ୟ ସରକାର ସଚେତନ ରହି ପର୍ଯ୍ୟାୟକ୍ରମେ ସ୍ବତନ୍ତ୍ର ଆର୍ଥିକ ଅନୁଦାନ ଯୋଗାଇ କାର୍ଯ୍ୟ କରୁଛନ୍ତି ବୋଲି ପୂର୍ବତନ ମନ୍ତ୍ରୀ ତଥା ଜିଲା ଯୋଜନା ବୋର୍ଡ଼ ଅଧ୍ୟକ୍ଷ ଭୋଗରାଇ ବିଧାୟକ ଅନନ୍ତ ଦାସ ମତ ଦେଇଛନ୍ତି। ରାଜ୍ୟ ଓ କେନ୍ଦ୍ର ସରକାର ଏହି ପର୍ଯ୍ୟଟନସ୍ଥଳୀର ଉନ୍ନତି ପାଇଁ ସ୍ବତନ୍ତ୍ର ଆର୍ଥିକ ପ୍ୟାକେଜ୍ ଘୋଷଣା କଲେ ଭିତ୍ତିଭୂମି ସୁଦୃଢ଼ ହେବ ବୋଲି ବନପାଳ ଅଜୟ ଜେନା ପ୍ରକାଶ କରିଛନ୍ତି। ରାଜ୍ୟ ଓ କେନ୍ଦ୍ର ସରକାରଙ୍କ ଇଚ୍ଛାଶକ୍ତିର ଅଭାବ ଯୋଗୁ ପର୍ଯ୍ୟଟନ ଶିଳ୍ପର ବିକାଶ ହୋଇପାରୁନାହଁି ବୋଲି କଂଗ୍ରେସ ନେତା ସତ୍ୟଶିବ ଦାସ ପ୍ରତିକ୍ରିୟାରେ ଜଣାଇଛନ୍ତି।
