ନୟାଗଡ଼ ଅଫିସ,୧୫।୧୨: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତି ବିଭାଗ, ଶିଶୁ, ଶଲ୍ୟ ଓ ମେଡିସିନ ୱାର୍ଡଗୁଡିକରେ ନର୍ସିଂ ଅଫିସରଙ୍କ ଉପତ୍ାତ ବଢ଼ିବାରେ ଲାଗିଥିବା ଅଭିଯୋଗ ହୋଇଆସୁଛି। କେତେଜଣ ନର୍ସିଂ ଅଫିସର ମାଗଣା ସେବା ଯୋଗାଇବାକୁ ଅନିଚ୍ଛୁକ ହେଉଛନ୍ତି। ସ୍ବାସ୍ଥ୍ୟସେବା ମିଳୁନି ବୋଲି ପ୍ରତିବାଦ ଅଥବା ଅଭିଯୋଗ କଲେ ଅନେକ ନର୍ସିଂ ଅଫିସର ଆଚରଣ ଓ ଉଚ୍ଚାରଣରେ ଖରାପ ବ୍ୟବହାର ଦେଖାଉଛନ୍ତି। ତେବେ ହାତଗୁଞ୍ଜା ପାଇଗଲେ ସ୍ବର ନରମି ଯାଇ ଭଦ୍ର ବ୍ୟବହାର ଦେଖିବାକୁ ମିଳୁଛି। ପ୍ରଶ୍ନ ଉଠୁଛି ହାତଗୁଞ୍ଜା ପାଉଥିବା ନର୍ସିଂ ଅଫିସରଙ୍କୁ ଚିହ୍ନଟ କରାଯାଇ କାହିଁକି ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉନି। କେତେଜଣ ନର୍ସିଂ ଅଫିସରଙ୍କ ଯୋଗୁ ସବୁ ନର୍ସିଂ ଅଫିସର କାହିଁକି ସମାଲୋଚନା ହେଉଛନ୍ତି।
ଏ ନେଇ ନୟାଗଡ଼ର ପ୍ରମୋଦ ନାୟକ କହିଛନ୍ତି, ମୋର ଜଣେ ସମ୍ପର୍କୀୟ ମେଡିସିନ ୱାର୍ଡରେ ଗତ ସୋମବାର ଭର୍ତ୍ତି ହୋଇଥିଲେ। ଆମ ରୋଗୀଙ୍କୁ ରକ୍ତ ଦିଆଯାଇଥିଲା। ହେଲେ ତାହା ଠିକ୍ରେ ପାସ କରୁ ନ ଥିଲା। ମଧ୍ୟାହ୍ନରେ କେବଳ ମେଡିସିନ ୱାର୍ଡରେ ଜଣେ ନର୍ସିଂ ଅଫିସର ଉପସ୍ଥିତ ଥିଲେ। ଘଟଣା ସମ୍ପର୍କରେ କହିବାରୁ ସେବା ତ ଦେଲେ ନାହିଁ ଓଲଟି ବିରକ୍ତ ହୋଇଥିଲେ। ଘଟଣା ସମ୍ପର୍କରେ ସିଡିଏମ୍ଓଙ୍କୁ ଅଭିଯୋଗ କରିବାକୁ କହିବାରୁ କିଛି ଫଳ ମିଳିଲା ନାହିଁ। ତେବେ ମୋର ଜଣେ ବନ୍ଧୁ ଫଟୋ ଉଠାଇଥିଲେ। ପରେ ସିଡିଏମ୍ଓଙ୍କୁ ଅଭିଯୋଗ କରିବାକୁ ଯାଇଥିଲୁ। ହେଲେ ସାର୍ ନ ଥିଲେ। ଏଭଳିସ୍ଥଳେ କିଛି ସିକ୍ୟୁରିଟି ଗାର୍ଡ ଓ ପୋଲିସ ଘଟଣାସ୍ଥଳରେ ପହଞ୍ଚତ୍ ଯାଇଥିଲେ। ନିକଟରେ ଥିବା ରୋଗୀ ଭୟଭୀତ ହୋଇ ପଡିଥିଲେ। ସେବା ନ ମଳିବାରୁ ରୋଗୀଙ୍କୁ ଅଟୋ ଯୋଗେ ଅନ୍ୟ ସ୍ବାସ୍ଥ୍ୟକେନ୍ଦ୍ରକୁ ନେଇ ଯାଇଥିଲୁ। ସରକାରୀ ଡାକ୍ତରଖାନାରେ ଏଭଳି ସେବା ମିଳିଲେ ଲୋକେ ଆଉ ଆସିବେ ନାହିଁ। କରଡାର ରୁଷିଆ ପ୍ରଧାନ କୁହନ୍ତି, ମେଡିସିନ୍ ୱାର୍ଡ ହେଉ କି ଶିଶୁ ୱାର୍ଡ। କେତେଜଣ ନର୍ସିଂ ଅଫିସର ଖରାପ ବ୍ୟବହାର ଦେଖାଉଛନ୍ତି। ହାତଗୁଞ୍ଜା ପାଇଗଲେ ସେବା ଠିକ୍ ଦେଉଛନ୍ତି। ହାତଗୁଞ୍ଜା ନ ଥିଲେ ଚିଡଚିଡ ହେଉଛନ୍ତି। କେତେଜଣ ସମ୍ପର୍କୀୟଙ୍କ ସାଙ୍ଗରେ ଆସି ଜିଲା ମୁଖ୍ୟ ଚିକିତ୍ସାଳୟର ସ୍ବାସ୍ଥ୍ୟସେବା ପରଖିଛି। ନିଜେ ବି ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇ ନର୍ସିଂ ଅଫିସରଙ୍କ ବ୍ୟବହାର ଦେଖିଛି। ପ୍ରତିବାଦ କରିଛି। ବୋଲଗଡ ଅଞ୍ଚଳର ପପୁନା ମହାପାତ୍ର କୁହନ୍ତି, ସ୍ତ୍ରୀଙ୍କ ପିଲା ଜନ୍ମ ଅପରେଶନ ପାଇଁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲି। ପେନ୍ ବଢ଼ି ଚାଲିଥିବାବେଳେ ଠିକ୍ ସେବା ମିଳିଲାନି। ଜଣେ ଗଣମାଧ୍ୟମର ପ୍ରତିନିଧିଙ୍କ ସହଯୋଗରେ ଜିଲା ମୁଖ୍ୟ ଚିକିତ୍ସାଳୟର ସୁପରିଣ୍ଟେଣ୍ଡେଣ୍ଟଙ୍କୁ ଭଲ ସେବା ପାଇବା ପାଇଁ ଅବଗତ କରାଇଲି। ନିକଟରେ ଗଣମାଧ୍ୟମର ପ୍ରତିନିଧି ଉପସ୍ଥିତ ଥିଲେ। କାହିଁକି ସୁପରିଣ୍ଟେଣ୍ଡେଣ୍ଟଙ୍କୁ କହିଲ ବୋଲି କହି ଖରାପ ବ୍ୟବହାର ଦେଖାଇଲେ ନର୍ସିଂ ଅଫିସର। ନିକଟରେ ଅନ୍ୟ କେତେଜଣ ଗର୍ଭବତୀ ମହିଳାଙ୍କୁ ଖରାପ ବ୍ୟବହାର ଦେଖାଇଥିଲେ। ନର୍ସିଂ ଅଫିସର ରୋଗୀ ଓ ତାଙ୍କ ସମ୍ପର୍କୀୟଙ୍କୁ କିପରି ବ୍ୟବହାର ଦେଖାଉଛନ୍ତି ଚିକିତ୍ସାଳୟରେ ଲାଗିଥିବା ସିସିଟିଭି ଫୁଟେଜକୁ ଦେଖିଲେ ପ୍ରମାଣ ଦେବାକୁ ପଡିବ ନାହିଁ। ତେବେ ଅଭିଯୋଗ ନାହିଁ କହି ଚିକିତ୍ସାଳୟ କର୍ତ୍ତୃପକ୍ଷ ଚୁପ ରହୁଛନ୍ତି। ଗଣିଆର ମମତା ପ୍ରଧାନ କୁହନ୍ତି, ଶିଶୁମାନେ ଦେଶର ଭବିଷ୍ୟତ। ହେଲେ ସେମାନଙ୍କୁ ମଧ୍ୟ ଠିକ୍ ସେବା ମିଳୁନି। ହାତଗୁଞ୍ଜା ନ ଦେଲେ ନର୍ସିଂ ଅଫିସର ସେବା ଦେବାକୁ ପ୍ରସ୍ତୁତ ହେଉନାହାନ୍ତି। ସେ ସମୟରେ ଅଭିଯୋଗ କଲେ ପୁଣି ହଇରାଣ ହରକତ କରୁଛନ୍ତି। ନର୍ସିଂ ଅଫିସରମାନେ ମାନସିକତାରେ ପରିବର୍ତ୍ତନ ଆଣି କାମ କରିବା ଦରକାର। ଏ ସମ୍ପର୍କରେ ସିଡିଏମ୍ଓ ମକରନ୍ଦ ବେଉରାଙ୍କୁ ପଚାରିବାରେ ଭଲ ସେବା ଦେବାକୁ ଓ ଖରାପ ବ୍ୟବହାର କାହାକୁ ନ କରିବାକୁ ମିଟିଂରେ ବାରମ୍ବାର ନର୍ସିଂ ଅଫିସରମାନଙ୍କୁ ତାଗିଦ୍ କରାଯାଉଛି। ଏହା ପରେ ଯଦି କିଛି ଅବ୍ୟବସ୍ଥା ହେଉଛି ତେବେ ଘଟଣା କେଉଁ ସମୟରେ ଘଟୁଛି ଓ କେଉଁମାନେ ଖରାପ ବ୍ୟବହାର ଦେଖାଉଛନ୍ତି ସେନେଇ ନିର୍ଦ୍ଦିଷ୍ଟ ଭାବେ ଅଭିଯୋଗ କଲେ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ସୁବିଧା ହେବ ବୋଲି ସେ କହିଛନ୍ତି।
