କୋଲକାତା,୧୩।୮: ପଶ୍ଚିମବଙ୍ଗର କୋଲକାତାସ୍ଥିତ ନୀଲରତନ ସରକାର (NRS) ମେଡିକାଲ କଲେଜ ଏବଂ ହସ୍ପିଟାଲରୁ ଏକ ରହସ୍ୟଜନକ ମୃତ୍ୟୁ ମାମଲା ସାମ୍ନାକୁ ଆସିଛି। ବୁଧବାର ରାତିରେ ଡ୍ୟୁଟିରେ ଥିବା ଜଣେ ଷ୍ଟାଫ୍ ନର୍ସ ରୂପାଲି ବର୍ମନଙ୍କ ମୃତଦେହ ହସ୍ପିଟାଲର ଶୌଚାଳୟରୁ ମିଳିବା ପରେ ସମଗ୍ର ହସ୍ପିଟାଲ ପରିସରରେ ଚାଞ୍ଚଲ୍ୟ ଖେଳିଯାଇଛି । ସହକର୍ମୀଙ୍କ କହିବାନୁଯାୟୀ, ନର୍ସଜଣକ ରାତିର ଡ୍ୟୁଟି ପାଇଁ ସମୟରେ ହସ୍ପିଟାଲରେ ପହଞ୍ଚିଥିଲେ । କିନ୍ତୁ କିଛି ସମୟ ପରେ ଶୌଚାଳୟକୁ ଯାଇ ଆଉ ଫେରି ନଥିଲେ। ଦୀର୍ଘ ସମୟ ପର୍ଯ୍ୟନ୍ତ କୌଣସି ସୂଚନା ନ ମିଳିବାରୁ ପୋଲିସକୁ ଖବର ଦିଆଯାଇଥିଲା। ଘଟଣାସ୍ଥଳରେ ପହଞ୍ଚି ପୋଲିସ ବନ୍ଦ କବାଟ ଭାଙ୍ଗି ଶବ ଉଦ୍ଧାର କରିଛି । ବର୍ତ୍ତମାନ ପର୍ଯ୍ୟନ୍ତ ମୃତ୍ୟୁର ପ୍ରକୃତ କାରଣ ଜଣାପଡି ନଥିବାବେଳେ ପୋଲିସ ତଦନ୍ତ ଜାରି ରଖିଛି।
ପ୍ରାଥମିକ ପୋଲିସ ତଦନ୍ତ ଅନୁଯାୟୀ, ଷ୍ଟାଫ୍ ନର୍ସ ରୂପାଲି ବର୍ମନ ବୁଧବାର ରାତି ପ୍ରାୟ ୮ଟା ସମୟରେ ନିଜର ନାଇଟ୍ ସିଫ୍ଟ ପାଇଁ ହସ୍ପିଟାଲରେ ପହଞ୍ଚିଥିଲେ। ଡ୍ୟୁଟି ସମୟରେ ରାତି ୯ଟାରୁ ୧୦ଟା ଭିତରେ ସେ ଶୌଚାଳୟକୁ ଯାଇଥିଲେ। ସହକର୍ମୀମାନେ ପୋଲିସକୁ କହିଛନ୍ତି ଯେ, ବହୁ ସମୟ ବିତିଯିବା ପରେ ମଧ୍ୟ ଯେତେବେଳେ ସେ ବାହାରକୁ ଆସିଲେ ନାହିଁ, ସେତେବେଳେ ସେମାନେ ପାଖକୁ ଯାଇ ଡାକିବା ଆରମ୍ଭ କରିଥିଲେ। ଭିତରୁ କୌଣସି ପ୍ରକାର ପ୍ରତିକ୍ରିୟା ନ ମିଳିବାରୁ ଚିନ୍ତା ବଢ଼ିଯାଇଥିଲା। ହସ୍ପିଟାଲ କର୍ମଚାରୀମାନେ ଏସମ୍ପର୍ଣ୍ଣ ଘଟଣା ସମ୍ପର୍କରେ ପୋଲିସକୁ ସୂଚନା ଦେଇଥିଲେ। ଖବର ପାଇ ଏଣ୍ଟାଲି ଥାନା ପୋଲିସ ତୁରନ୍ତ ହସ୍ପିଟାଲରେ ପହଞ୍ଚି କବାଟ ବାହାରୁ ଡାକି ପ୍ରତିକ୍ରିୟା ପାଇଁ ଚେଷ୍ଟା କରିଥିଲା। ଭିତରୁ କୌଣସି ଜବାବ ନ ମିଳିବାରୁ ପୋଲିସ ବନ୍ଦ କବାଟକୁ ଭାଙ୍ଗିଥିଲା। ଏହାପରେ ଶୌଚାଳୟ ଭିତରୁ ନର୍ସଙ୍କ ଶବ ଉଦ୍ଧାର କରାଯାଇଥିଲା।
ଏହି ଘଟଣା ପରେ ହସ୍ପିଟାଲ କର୍ମଚାରୀ ଏବଂ ରୋଗୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ପୋଲିସ ଶବକୁ ଜବତ କରି ପୋଷ୍ଟମର୍ଟମ ପାଇଁ ପଠାଇ ଦେଇଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ଅଧିକାରୀମାନେ କହିଛନ୍ତି।
