ନୂଆଦିଲ୍ଲୀ,୩।୬: ଇନ୍ଧନ, ବିଜୁଳି ଏବଂ ଅତ୍ୟାବଶ୍ୟକ ସମ୍ପଦର ସୀମିତ ତଥା ମିତବ୍ୟୟୀ ବ୍ୟବହାର ସୁନିଶ୍ଚିତ କରିବା ପାଇଁ ରାଜ୍ୟ ସରକାର ସରକାରୀ କର୍ମଚାରୀଙ୍କ ପାଇଁ ନୂଆ ମାର୍ଗଦର୍ଶିକା ଜାରି କରିଛନ୍ତି। ଏହା ଅଧୀନରେ ୬ ମାସ ପର୍ଯ୍ୟନ୍ତ ବିଦେଶ ଯାତ୍ରା ଉପରେ କଟକଣା ଲଗାଯାଇଛି ଏବଂ କର୍ମଚାରୀମାନଙ୍କୁ ମଧ୍ୟାହ୍ନ ଭୋଜନ ପାଇଁ ଘରକୁ ଯିବାକୁ ବାରଣ କରାଯାଇଛି। ଏହି ପରିବର୍ତ୍ତନଗୁଡ଼ିକର ମୁଖ୍ୟ ଉଦ୍ଦେଶ୍ୟ ହେଉଛି ଇନ୍ଧନ ବ୍ୟବହାର ହ୍ରାସ କରିବା, ବିଜୁଳି ସଞ୍ଚୟ କରିବା ଏବଂ ସରକାରୀ ସମ୍ପତ୍ତିର ଦକ୍ଷତାର ସହ ବ୍ୟବହାର କରିବା।
ପୁଡୁଚେରୀର କର୍ମଚାରୀ ଏବଂ ପ୍ରଶାସନିକ ସୁଧାର ବିଭାଗର ଅଣ୍ଡର ସେକ୍ରେଟେରୀ (ଅବର ସଚିବ) ଏସ. ମୁରୁଗେସନ ସମସ୍ତ ସରକାରୀ ବିଭାଗ, କାର୍ଯ୍ୟାଳୟ, ସାର୍ୱଜନୀନ କ୍ଷେତ୍ରର ଉଦ୍ୟୋଗ (PSUs) ଏବଂ ସ୍ୱାୟତ୍ତ ଶାସିତ ସଂସ୍ଥାଗୁଡ଼ିକୁ ଏକ ସର୍କୁଲାର ଜାରି କରିଛନ୍ତି। ଏହି ସର୍କୁଲାରରେ କୁହାଯାଇଛି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଇନ୍ଧନ ସଞ୍ଚୟ କରିବା ଆହୱାନ ଏବଂ ମୁଖ୍ୟ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମୀକ୍ଷା ବୈଠକ ଆଧାରରେ ଏହି ନିର୍ଦ୍ଦେଶାବଳୀ ଜାରି କରାଯାଇଛି।
ସର୍କୁଲାରରେ ପରାମର୍ଶ ଦିଆଯାଇଛି ଯେ, ଅନାବଶ୍ୟକ ବିଦେଶ ଯାତ୍ରା, study tours ଆସନ୍ତା ୬ ମାସ ପାଇଁ ସ୍ଥଗିତ ରଖାଯାଉ। ଏହା ବ୍ୟତୀତ ସରକାରୀ ଗାଡ଼ିଗୁଡ଼ିକର ବ୍ୟବହାର ବୁଝିବିଚାରି କରିବାକୁ ଏବଂ ଇନ୍ଧନ ଖର୍ଚ୍ଚ କମାଇବା ପାଇଁ “ଭେହିକିଲ ପୁଲିଂ” (Vehicle Pooling) ବ୍ୟବସ୍ଥା ଆପଣାଇବାକୁ ନିର୍ଦ୍ଦେଶ ଦିଆଯାଇଛି।
ସେହିପରି ଅଧିକାରୀମାନଙ୍କୁ ଅନାବଶ୍ୟକ ସରକାରୀ ଗସ୍ତରୁ ନିବୃତ୍ତ ରହିବାକୁ ପରାମର୍ଶ ଦିଆଯାଇଛି। ଯେତେବେଳେ ସମ୍ଭବ ହେବ, ଭିଡିଓ କନଫରେନ୍ସିଂ ମାଧ୍ୟମରେ ବିଭିନ୍ନ ବିଭାଗ ମଧ୍ୟରେ ବୈଠକ, ସମୀକ୍ଷା ଏବଂ ସମନୱୟ ବୈଠକ କରିବାକୁ କୁହାଯାଇଛି।
ସର୍କୁଲାରରେ ଆହୁରି ମଧ୍ୟ କୁହାଯାଇଛି ଯେ, ସରକାରୀ ଅଧିକାରୀ ଏବଂ କର୍ମଚାରୀମାନେ ସରକାରୀ କାର୍ଯ୍ୟ ପାଇଁ ସାର୍ୱଜନୀନ ପରିବହନ (Public Transport) ର ଅଧିକ ବ୍ୟବହାର କରିବା ଉଚିତ। ଏହା ବ୍ୟତୀତ ବିଜୁଳି ସଞ୍ଚୟ ଉପରେ ଗୁରୁତ୍ୱ ଦିଆଯାଇଛି, ଯେଉଁଥିପାଇଁ ଅଫିସରେ ବ୍ୟବହାର ହେଉନଥିବା ଲାଇଟ, ଏୟାର କଣ୍ଡିସନର (AC) ଏବଂ କମ୍ପ୍ୟୁଟରଗୁଡ଼ିକୁ ତୁରନ୍ତ ବନ୍ଦ କରିବାକୁ କୁହାଯାଇଛି।
ଏହା ବ୍ୟତୀତ, କର୍ମଚାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ ସେମାନେ ମଧ୍ୟାହ୍ନ ଭୋଜନ (ଲଞ୍ଚ ବ୍ରେକ) ସମୟରେ ଅଯଥାରେ ଅଫିସ ପରିସର ବାହାରକୁ ନଯାଇ ନିଜ ଖାଦ୍ୟ (ଟିଫିନ) ଅଫିସକୁ ହିଁ ନେଇ ଆସନ୍ତୁ।
