କାଠମାଣ୍ଡୁ,୨୮।୮: ନେପାଳରେ ବିନାଶକାରୀ ବନ୍ୟା ମଧ୍ୟରେ ଅପର ତ୍ରିଶୂଳୀ ହାଇଡ୍ରୋପାୱାର ପ୍ରକଳ୍ପର ଏକ ସୁଡ଼ଙ୍ଗ ଶତାଧିକ ଲୋକଙ୍କ ପାଇଁ ଜୀବନରକ୍ଷକ ପାଲଟିଛି। ବନ୍ୟାଜଳ ସହ ମାଟି, ପଥର ଓ ଆବର୍ଜନା ତଳ ଅଞ୍ଚଳରେ ତାଣ୍ଡବ ରଚୁଥିବା ବେଳେ ପ୍ରାୟ ୩୫୦ ଜଣ ଏହି ସୁଡ଼ଙ୍ଗ ଭିତରେ ଆଶ୍ରୟ ନେଇ ନିଜ ଜୀବନ ବଞ୍ଚାଇଥିଲେ । ନେପାଳୀ ସେନା ଅତ୍ୟନ୍ତ ଚ୍ୟାଲେଞ୍ଜିଂ ପରିସ୍ଥିତିରେ ଅଭିଯାନ ଚଳାଇ ସେମାନଙ୍କୁ ସୁରକ୍ଷିତ ଭାବେ ବାହାର କରିଛି।
ଉଦ୍ଧାର ହୋଇଥିବା ଲୋକଙ୍କ ମଧ୍ୟରେ ଅନେକ ଭାରତୀୟ ନାଗରିକ ମଧ୍ୟ ଥିବା ସୂଚନା ମିଳିଛି। ତେବେ ସୁଡ଼ଙ୍ଗ ଭିତରେ ଏବଂ ଏହାର ଆଖପାଖରେ ଆହୁରି କିଛି ଲୋକ ଫସିଥିବା ଆଶଙ୍କା ରହିଛି। ସେମାନଙ୍କୁ ଖୋଜି ବାହାର କରିବା ପାଇଁ ଉଦ୍ଧାର ଅଭିଯାନ ଜାରି ରହିଛି। ରସୁୱା ଜିଲାରେ ବନ୍ୟା ପରିସ୍ଥିତି ଅତ୍ୟନ୍ତ ଭୟଙ୍କର ହୋଇପଡ଼ିଥିଲା। ତୀବ୍ର ବେଗରେ ପାଣି ସହ ବଡ଼ ବଡ଼ ପଥର ଓ ଆବର୍ଜନା ଆସିବାରୁ ଖୋଲା ସ୍ଥାନରେ ରହିବା ବିପଦପୂର୍ଣ୍ଣ ହୋଇଥିଲା। ଏହି ସମୟରେ ଅପର ତ୍ରିଶୂଳୀ ହାଇଡ୍ରୋପାୱାର ପ୍ରକଳ୍ପର ସୁଡ଼ଙ୍ଗ ଲୋକଙ୍କ ପାଇଁ ସୁରକ୍ଷିତ ଆଶ୍ରୟ ପାଲଟିଥିଲା।ସୁଡ଼ଙ୍ଗ ଭିତରେ ରହିବା ଯୋଗୁଁ ଶତାଧିକ ଶ୍ରମିକ ଓ ଅନ୍ୟ ଲୋକ ବନ୍ୟାର ସିଧାସଳଖ ପ୍ରଭାବରୁ ବଞ୍ଚିପାରିଥିଲେ।
କଠିନ ଭୌଗୋଳିକ ପରିସ୍ଥିତି, ପାଣି ଓ ଆବର୍ଜନା ମଧ୍ୟରେ ପ୍ରଶିକ୍ଷିତ ଯବାନମାନେ ଆଧୁନିକ ଉପକରଣର ସହାୟତାରେ ଅଭିଯାନ ଚଳାଇଥିଲେ । ଏପର୍ଯ୍ୟନ୍ତ ପ୍ରାୟ ୩୫୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ଉଦ୍ଧାର ଅଭିଯାନ ସତ୍ତ୍ୱେ ସୁଡ଼ଙ୍ଗ ଭିତରେ ଏବଂ ନିକଟବର୍ତ୍ତୀ ଅଞ୍ଚଳରେ ଆହୁରି କିଛି ଲୋକ ଫସିଥିବା ଆଶଙ୍କା କରାଯାଉଛି। ତେଣୁ ନେପାଳୀ ସେନାର ଟିମ୍ଗୁଡ଼ିକ ସୁଡ଼ଙ୍ଗର ପ୍ରତ୍ୟେକ ଅଂଶ ଓ ଆଖପାଖ ଅଞ୍ଚଳରେ ତଲାସୀ ଜାରି ରଖିଛନ୍ତି।
୨୬ ଅଗଷ୍ଟରେ ତିବ୍ବତ-ନେପାଳ ସୀମା ନିକଟରେ ହଠାତ୍ ଆସିଥିବା ଫ୍ଲାସ୍ ଫ୍ଲଡ୍ ପରେ ଏହି ସଙ୍କଟ ସୃଷ୍ଟି ହୋଇଥିଲା। ପ୍ରବଳ ବେଗରେ ଆସିଥିବା ପାଣି ଭୋଟେକୋଶୀ ଓ ତ୍ରିଶୂଳୀ ନଦୀ ପ୍ରଣାଳୀକୁ ପ୍ରଭାବିତ କରିଥିଲା। ପାଣି ସହ ବହୁ ପରିମାଣର ମାଟି ଓ ପଥର ଆସିବାରୁ ରସୁୱା ସମେତ ଅନେକ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି।ବନ୍ୟା ପରେ ନେପାଳରେ ଉଦ୍ଧାର ଓ ରିଲିଫ୍ କାର୍ଯ୍ୟ ଏବେ ବି ଜାରି ରହିଛି।
