ରିଷିଡା, ୨୩।୬ (ସୁଶାନ୍ତ ମଲ୍ଲିକ): କିଛି ଦିନ ତଳେ ଧରିତ୍ରୀ ଖବରକାଗଜରେ ଏକ ଅସହାୟ ପରିବାରର ଦୁଃଖଦ ଅବସ୍ଥା ସମ୍ପର୍କରେ ଖବର ପ୍ରକାଶିତ ହୋଇଥିଲା। କଳାହାଣ୍ଡି ଜିଲା ନର୍ଲା ନିର୍ବାଚନମଣ୍ଡଳୀ ଅନ୍ତର୍ଗତ ରାଜପୁର ଗ୍ରାମର ବାସିନ୍ଦା ୮୦ ବର୍ଷୀୟ ସାହେବ ସାହୁଙ୍କ ପରିବାରର ଦୟନୀୟ ସ୍ଥିତି ସମ୍ପର୍କରେ ଏହି ଖବରରେ ଉଲ୍ଲେଖ ହୋଇଥିଲା। ଖବର ପ୍ରକାଶ ପାଇବା ପରେ ନର୍ଲା ବିଧାୟିକା ମନୋରମା ମହାନ୍ତି ରାଜପୁର ଗ୍ରାମକୁ ଯାଇ ପରିବାରକୁ ଭେଟି ବ୍ୟକ୍ତିଗତ ଭାବେ ଆର୍ଥିକ ସହାୟତା ପ୍ରଦାନ କରିଥିଲେ।
ସୂଚନାଯୋଗ୍ୟ, ସାହେବ ସାହୁଙ୍କ ଝିଅ ଓ ଜ୍ୱାଇଁ ତାଙ୍କ ସହ ରହୁଥିଲେ। କିନ୍ତୁ ଝିଅଙ୍କ ଅକାଳ ମୃତ୍ୟୁ ହେବାର କିଛି ମାସ ପରେ ଜ୍ୱାଇଁଙ୍କର ମଧ୍ୟ ପରଲୋକ ଘଟିଥିଲା। ଫଳରେ ସେମାନଙ୍କର ତିନିଜଣ ନାତୁଣୀଙ୍କ ଦାୟିତ୍ୱ ବର୍ତ୍ତମାନ ବୃଦ୍ଧ ଅଜା ସାହେବ ସାହୁଙ୍କ ଉପରେ ନ୍ୟସ୍ତ ହୋଇଛି। ବୟସର ଅପରାହହ୍ନ ମାସକୁ ମିଳୁଥିବା ମାତ୍ର ଏକ ହଜାର ଟଙ୍କା ଭତ୍ତାରେ ତିନି ନାତୁଣୀଙ୍କ ଭରଣପୋଷଣ କରିବା ତାଙ୍କ ପାଇଁ କଷ୍ଟସାଧ୍ୟ ହୋଇପଡ଼ିଛି।
ଏହି ଖବର ଧରିତ୍ରୀରେ ପ୍ରକାଶ ପାଇବା ପରେ ମଙ୍ଗଳବାର ମଦନପୁର-ରାମପୁର ରାଜ ପରିବାରର ସଦସ୍ୟ ନୀଳମାଧବ ସିଂ ଦେଓ ରାଜପୁର ଗ୍ରାମକୁ ଯାଇ ସାହେବ ସାହୁଙ୍କ ପରିବାରକୁ ଭେଟିଥିଲେ। ସେ ତିନିଜଣ କୁନି ନାତୁଣୀଙ୍କ ସହ ସାକ୍ଷାତ କରି କିଛି ଆର୍ଥିକ ସହାୟତା ପ୍ରଦାନ କରିବା ସହ ମଝିଆ ଝିଅ ରାଖୀ ସାହୁଙ୍କ ସମସ୍ତ ଶିକ୍ଷା ଖର୍ଚ୍ଚ ବହନ କରିବାର ଦାୟିତ୍ୱ ନେଇଥିଲେ।
ଏଥିସହ ସେ ପରିବାରକୁ ଆବାସ ଯୋଜନାରେ ଘର, ବୃଦ୍ଧ ସାହେବ ସାହୁଙ୍କ ଭତ୍ତା ଓ ନଳକୂପ ସୁବିଧା ଯୋଗାଇଦେବା ପାଇଁ କର୍ଲାମୁଣ୍ଡା ବିଡିଓଙ୍କ ସହ ଆଲୋଚନା କରି କାର୍ଯ୍ୟକୁ ତ୍ୱରାନ୍ୱିତ କରିବାକୁ ଅନୁରୋଧ କରିଥିଲେ।
ସିଂ ଦେଓଙ୍କ ଏହି ଗସ୍ତ ସମୟରେ ବହୁ ସଂଖ୍ୟକ ଗ୍ରାମବାସୀ ଉପସ୍ଥିତ ଥିବା ସହ ବିଭିନ୍ନ ସମସ୍ୟା ଓ ଦାବି ତାଙ୍କ ନିକଟରେ ଉପସ୍ଥାପନ କରିଥିଲେ। ଗ୍ରାମବାସୀଙ୍କ ଦାବି ଶୁଣି ସିଂ ଦେଓ ପ୍ରଧାନମନ୍ତ୍ରୀ ଆବାସ ଯୋଜନା ସମେତ ଅନ୍ୟାନ୍ୟ ସରକାରୀ ସୁବିଧା ଯୋଗାଇଦେବା ପାଇଁ ପ୍ରୟାସ କରିବେ ବୋଲି ପ୍ରତିଶ୍ରୁତି ଦେଇଥିଲେ।
