ନୟାଗଡ଼ ଅଫିସ,୩୧ା୩: କୃଷିପ୍ରଧାନ ଜିଲା ନୟାଗଡ଼ରେ ଜଳସେଚନର ସୁବିଧା ନାହିଁ । ନଦୀନାଳ ଘେରା ଏହି ଜିଲାରେ ଜଳସେଚନର ସୁବିଧା କରାଯାଇ ନ ଥିବାରୁ ବର୍ଷାଜଳ ହିଁ ଚାଷ ପାଇଁ ଭରସା ସାଜିଛି । ଜିଲାରେ ମହାନଦୀ, ବୃତ୍ତଙ୍ଗ ପରୀ ନଦୀ ପ୍ରବାହିତ ହୋଇଥିଲେ ହେଁ ୨୫ ପ୍ରତିଶତ ଜମି ଜଳସେଚିତ ହୋଇପାରୁ ନାହିଁ । ଏଣୁ ଚାଷୀମାନେ ଅଭିଶପ୍ତ ଜୀବନଯାପନ କରୁଛନ୍ତି । ଅନ୍ୟପକ୍ଷରେ ପ୍ରଥମ ପର୍ଯ୍ୟାୟ ଜଙ୍ଗଲ ଅନୁମତି ଓ ଏଥିନେଇ ଲାଗି ରହିଥିବା ଆଶଙ୍କା ଦୂର ହେବା ପରେ ମଧ୍ୟ ୧୦ ବର୍ଷ ହେଲା ବୃତ୍ତଙ୍ଗ ଜଳଯୋଜନା ଅଟକି ରହଛି ।
ସୂଚନା ଅନୁଯାୟୀ, ଖୋର୍ଦ୍ଧା-ବଲାଙ୍ଗୀର ୫୭ ନଂ. ଜାତୀୟ ରାଜପଥର ଦଶପଲ୍ଲା ବ୍ଲକ ଟାକରାଠାରୁ ୧୦ କି.ମି. ଦୂର ଦୁର୍ଗମ ପାର୍ବତ୍ୟାଞ୍ଚଳରେ ରହିଛି ମଞ୍ଜରୀ ଅଞ୍ଚଳ । ସେଠାରେ ମାଈ ପାହାଡ଼ ଓ ଡାବଳଦେଈ ପାହାଡ଼ ମଧ୍ୟରେ ବନ୍ଧ ପକାଯାଇ ମହାନଦୀର ଅନ୍ୟତମ ଶାଖା ନଦୀ ବୃତ୍ତଙ୍ଗରେ ଏକ ଜଳଯୋଜନା କରିବା ପାଇଁ ୩୮ ବର୍ଷ ହେବ ଦାବି ହୋଇ ଆସୁଥିଲା । ୧୯୭୮ରେ ଦଶପଲ୍ଲାଠାରେ ବୃତ୍ତଙ୍ଗ ଜଳଯୋଜନାର ସର୍ଭେ କାର୍ଯ୍ୟ ସମ୍ପାଦନା ଲାଗି କାର୍ଯ୍ୟାଳୟ ଖୋଲା ଯାଇଥିଲା । ସେହି ସର୍ବେକ୍ଷଣ ଅନୁଯାୟୀ ପ୍ରସ୍ତୁତ ରିପୋର୍ଟରେ ନୟାଗଡ଼ ଜିଲାର ସମସ୍ତ ଅଞ୍ଚଳ ସହ ପ୍ରତିବେଶୀ ଜିଲା ଖୋର୍ଦ୍ଧାର ବୋଲଗଡ଼, ବେଗୁନିଆ, ଜଙ୍କିଆ ଅଞ୍ଚଳରେ ଜଳସେଚନର ବ୍ୟବସ୍ଥାକୁ ତ୍ୱରାନ୍ବିତ କରିବା ଲାଗି ସମନ୍ବିତ ବୃତ୍ତଙ୍ଗ ଜଳଯୋଜନାର ରିପୋର୍ଟ ପ୍ରସ୍ତୁତ କରାଯାଇଥିଲା । କିଛିଦିନର ନୀରବତା ପରେ ୧୯୯୦ରେ ଏଥିପାଇଁ ତପତ୍ରତା ପ୍ରକାଶ ପାଇଥିଲା । ଉଭୟ ପୁରୀ ଓ କଟକ ଜଳସମ୍ପଦ ବିଭାଗ ପକ୍ଷରୁ ପୁନଃ ସର୍ଭେ କାର୍ଯ୍ୟ ତଦାରଖ କରାଯାଇଥିଲା । ଦଶପଲ୍ଲାଠାରେ ଦ୍ୱିତୀୟ ଥର ପାଇଁ ଯେଉଁ ସର୍ଭେ କାର୍ଯ୍ୟାଳୟ ଖୋଲାଯାଇଥିଲା ତାହା ୪ ବର୍ଷ ପରେ ଉଠିଯାଇଥିଲା । ପରିମାର୍ଜିତ ସର୍ଭେ ଅନୁଯାୟୀ ବୃତ୍ତଙ୍ଗ ମଧ୍ୟମ ଜଳଯୋଜନା ଦ୍ୱାରା ନୟାଗଡ଼ ଜିଲାର ୫ ବ୍ଲକ ଅଞ୍ଚଳର ୨୩ହଜାର ୩୦୦ ହେକ୍ଟର ପରିମିତ ଚାଷଜମିରେ ଜଳସେଚନ ଉପଲବ୍ଧ କରାଯିବା ଲାଗି ଆକଳନ କରାଯାଇଥିଲା। ରାଜ୍ୟରେ ବିଜେଡି ସରକାର କ୍ଷମତାକୁ ଆସିବା ପରେ ଉଭୟ ରାଜନୈତିକ ଓ ପ୍ରଶାସନିକସ୍ତରରେ ତପତ୍ରତା ପ୍ରକାଶ ପାଇଥିଲା । ଫଳସ୍ବରୂପ ପ୍ରବଳ ଦାବି ଯୋଗୁ ଏହି ଯୋଜନାକୁ ୨୦୦୦ ଡିସେମ୍ବର ୧୮ରେ ଏନଡିଏ ସରକାରଙ୍କ ଶାସନ କାଳରେ କେନ୍ଦ୍ରୀୟ ଜଳ କମିଶନର ବୈଷୟିକ-ଆର୍ଥିକ ସମୀକ୍ଷା କମିଟି ମଞ୍ଜୁରୀ ଦେଇଥିଲା । ୨୦୦୪ ଅଗଷ୍ଟ ୧୭ରେ କେନ୍ଦ୍ରୀୟ ଜଙ୍ଗଲ ଓ ପର୍ଯ୍ୟାବରଣ ମନ୍ତ୍ରଣାଳୟ ପକ୍ଷରୁ ବାଘ, ହାତୀ ପ୍ରକଳ୍ପ ଆଳରେ ଉକ୍ତ ପ୍ରକଳ୍ପର ପ୍ରସ୍ତାବକୁ ଖାରଜ କରିଦିଆ ଯାଇଥିଲା । ୭ ବାଘ ଓ ୨୫ ହାତୀଙ୍କ ଚଳାଚଳ ବ୍ୟାଘାତ ଆଶଙ୍କା ଦର୍ଶାଯାଇ ଜନଗଣଙ୍କ ଆଶା ଆକଂକ୍ଷାକୁ ଧୂଳିସାତ କରିବାର ଅପଚେଷ୍ଟାକୁ ପ୍ରତିହିତ କରିବା ପାଇଁ ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ହସ୍ତକ୍ଷେପ କରିଥିଲେ । ଏହିପରି ବିଭିନ୍ନ ବିଭାଗ ପକ୍ଷରୁ କ୍ଲିୟରାନ୍ସ ହୋଇଥିଲେ ମଧ୍ୟ ଏହି ଜଳଯୋଜନା କାର୍ଯ୍ୟକାରୀ ହୋଇପାରି ନ ଥିଲା । ପରେ ରାଜ୍ୟ ସରକାର ୨୦୦୫ ମାର୍ଚ୍ଚ ୧୮ରେ ଏନେଇ ଏକ ପ୍ରସ୍ତାବ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟକୁ ଜଙ୍ଗଲ ଅନୁମତି ପ୍ରଦାନ ପାଇଁ ପଠାଇଥିଲେ । ଏଥିରେ ୧୫୨୪.୧୭ ହେକ୍ଟର ଜଙ୍ଗଲ ଜମିକୁ ବ୍ୟବହାର କରିବା ପାଇଁ ଅନୁମତି ଲୋଡ଼ା ଯାଇଥିଲା । ୨୦୧୦ ଅଗଷ୍ଟ ଶେଷ ସପ୍ତାହରେ ବୃତ୍ତଙ୍ଗ ଜଳଯୋଜନାକୁ ପ୍ରଥମ ପର୍ଯ୍ୟାୟ ଜଙ୍ଗଲ ଅନୁମତି ମିଳିଥିଲା । ଅନୁମତି ମିଳିବା ପରେ ଜିଲାରେ ଆନନ୍ଦର ଲହରି ଖେଳିଯାଇଥିଲା । ହେଲେ ସେ ସମୟରେ ବୁଡ଼ି ଅଞ୍ଚଳର ଲୋକମାନେ ବୃତ୍ତଙ୍ଗକୁ ବିରୋଧ କରି ଆନ୍ଦୋଳନକୁ ଓହ୍ଲାଇଥିଲେ । ବୃତ୍ତଙ୍ଗ ବିରୋଧୀ ଆନ୍ଦୋଳନ ଥମିଥିବାବେଳେ କିଛି ମାସ ହେଲା ସପକ୍ଷବାଦୀଙ୍କ ଆନ୍ଦୋଳନ ଚାଲିଥିଲା । ତେବେ ପଞ୍ଚାୟତ ନିର୍ବାଚନ ପୂର୍ବରୁ ସପକ୍ଷ କି ବିପକ୍ଷବାଦୀଙ୍କ ଆନ୍ଦୋଳନ ଆଉ ନାହିଁ । ଏହି ପରିପ୍ରେକ୍ଷୀରେ ନୟାଗଡ଼ ଜିଲାବାସୀଙ୍କ ପାଇଁ ମହାନଦୀରୁ ଜଳସେଚନ ବ୍ୟବସ୍ଥା ସ୍ବପ୍ନ ହୋଇ ରହିଯାଇଛି ା
