ବାରଙ୍ଗ,୮।୧(ଡି.ଏନ୍.ଏ.): କରୋନାର ନୂଆ ଭାରିଆଣ୍ଟ ଓମିକ୍ରନଙ୍କୁ ଦୃଷ୍ଟିରେ ରଖି ନନ୍ଦନକାନନରେ ଶୁକ୍ରବାରଠାରୁ ପର୍ଯ୍ୟଟକମାନେ କେବଳ ଅନ୍ଲାଇନରେ ଟିକେଟ କରି ବୁଲିବାକୁ ଯାଇପାରିବେ ବୋଲି ଗୁରୁବାର ଘୋଷଣା କରିଥିଲେ। ଶୁକ୍ରବାର ବହୁ ପର୍ଯ୍ୟଟକ ନନ୍ଦନକାନନ ବୁଲିବାକୁ ଆସିଥିଲେ ମଧ୍ୟ ନନ୍ଦନକାନନ ପକ୍ଷରୁ ହୋଇଥିବା ନିଷ୍ପତ୍ତି ବିଷୟରେ ନ ଜାଣିପାରି ହଇରାଣ ହୋଇଥିଲେ। ଅଫ୍ଲାଇନ ଟିକେଟ ବନ୍ଦ ଥିବାର ସୁଯୋଗରେ କେତେଜଣ ଅସାଧୁ ଯୁବକ କଳାବଜାର କରିଥିଲେ। କିଏ ମୋବାଇଲ, କିଏ ଲାପ୍ଟପ୍ ଧରି ଅନ୍ଲାଇନ୍ ଟିକେଟ ପାଇଁ ଡାକୁଥିଲେ। ଫଳରେ ୫୦ଟଙ୍କା ଟିକେଟକୁ ପର୍ଯ୍ୟଟକମାନେ ବାଧ୍ୟ ହୋଇ ୧୦୦ଟଙ୍କାରେ କିଣିଥିବାର ମଧ୍ୟ ଅଭିଯୋଗ ହୋଇଛି। କୋଭିଡ୍ ଗାଇଡ୍ଲାଇନ ଅନୁପାଳନ ପାଇଁ ନନ୍ଦନକାନନ ପକ୍ଷରୁ କୁହାଯାଇଥିବା ବେଳେ ଦିନତମାମ ପ୍ରାଣୀ ଉଦ୍ୟାନ ପ୍ରବେଶ ପଥ, ଗାଇଡ୍ କାର୍ଯ୍ୟାଳୟ ଓ ଟିକେଟ କାଉଣ୍ଟର ମୁଖ୍ୟ ଫାଟକ ଆଗରେ ପ୍ରବଳ ଭିଡ ପରିଲକ୍ଷିତ ହୋଇଥିଲା। ତେବେ ୨୦୨୦ରେ କୋଭିଡ୍ ପାଇଁ ନନ୍ଦନକାନନ ବନ୍ଦଥିଲା। ନନ୍ଦନକାନନ ଅକ୍ଟୋବରରେ ଖୋଲିବା ପାଇଁ ରାଜ୍ୟ ସରକାର ଏକ ମାର୍ଗଦର୍ଶିକା ଜାରି କରିଥିଲେ। ନନ୍ଦନକାନନ ବୁଲିବାକୁ ଦୈନିକ ଅତିବେଶିରେ ୧୫୦୦ ଲୋକଙ୍କୁ ଟିକେଟ ଉଭୟ ଅଫ୍ଲାଇନ ଓ ଅନଲାଇନ ଜରିଆରେ ମିଳିବ ବୋଲି ଅନୁମତି ଦେଇଥିଲେ। ଏଭଳି କିଛି ନିୟମ ଚଳିତବର୍ଷ ମଧ୍ୟ କରିଥିଲେ ଏଭଳି ଅସୁବିଧା ହୁଅନ୍ତା ନାହିଁ ବୋଲି ପର୍ଯ୍ୟଟକମାନେ କହିଥିଲେ। ଅନ୍ୟପଟେ ନନ୍ଦନକାନନକୁ ଶୁକ୍ରବାର ୬୩୬୫ ଓ ବଟାନିକାଲ ଗାର୍ଡେନକୁ ୧୬୯ଜଣ ପର୍ଯ୍ୟଟକ ଆସିଥିଲେ। ଏ ନେଇ ନନ୍ଦନକାନନ ଉପନିର୍ଦ୍ଦେଶ ଡ. ସଞ୍ଜିତ କୁମାର କହିଛନ୍ତି, ଅନ୍ଲାଇନ ବ୍ୟବସ୍ଥା ସୁରୁଖୁରୁରେ ହେବା ପାଇଁ ଦିନେ ଦୁଇଦିନ ସମୟ ଲାଗିବ। ଟେକିନକାଲ ଅବ୍ୟବସ୍ଥାକୁ ସୁଧାରିବା ପାଇଁ ସଜାଗ ହୋଇ ରହିଛୁ। ତେଣୁ ପର୍ଯ୍ୟଟକ ପୂର୍ବରୁ ଟିକଟ କରି ଆସିବା ଆବଶ୍ୟକ ବୋଲି କହିଥିଲେ।
